Emigani 29 - Ebibulia 2001

¹ Ahanwa emirundi nyingi akashuba akagumangana omutima, alihendeka ataraliire mara talikira.

² Abagorogoki kabahabwa obutwazi abantu bashemelerwa, kyonkai ababi kabatwara abantu bachura.

³ Agonza obumanyi ashemeleza ishe, kyonkai ashemera n'abamalaya anaganag'ebye.

⁴ Omukama akoza amazima niwe aikaza ensiye omu milembe, kyonkai ayenza abantu rushwa, agiisa.

⁵ Omuntu ajebeka mutahiwe, aba namunaga omu mutego.

⁶ Omubi entambaraze zimwisa, kyonkai omugorogoki ahoya ashanduka.

⁷ Omugorogoki amanya ehaki z'abaanaku, omubi amagezi nk'aga tagashobokerwa.

⁸ Abajumangana bachumika ekigo omuliro, kyonkai abamanyi batanga karai ebiraleta ekiniga.

⁹ Omumanyi k'ahakana n'omufera, omufera asheka kushai anga anigara, eba yombo yonkai.

¹⁰ Abaita abantu banoba nyakatetere, ababi bagonza kumwita.

¹¹ Omufera k'anigara anigalira kimoi, kyonkai omumanyi akimiliramu mpora mpora.

¹² Omutwazi k'ahuliliza ebishuba, n'abakurube bona baba babi.

¹³ Omunaku n'amugingiiza bateranira hamoi, bombili Omukama niwe yabahaire amaisho.

¹⁴ K'omukama aramuza omunaku amazima, enketoye erama ebiro bingi.

¹⁵ Omwana akabukirwa akaterwa ekishanju, niwe aija akagira obumanyi, kyonkai ow'okuleka akakora okwo yayenda ashonaza nyina.

¹⁶ Orwo ababi babona obutwazi, entambara zeyongera, kyonkai balisilika basigeho abagorogoki.

¹⁷ Omwana wawe omutere aha mutwe, nirwo olimwebuga ebiro byona, alikuha ebyera aha mutima.

¹⁸ Mbali hatali barangi abantu tibakunda kutwarwa, akwata Amateka aba muberwa.

¹⁹ Ebigambo bishai tibitera mwiru aha mutwe, kuba n'orwo arashobokerwa, arayanga bwanga.

²⁰ Omufera agiramu orwonkwatibaanagwa, kushaga omuntu ayanguhya kugamba.

²¹ Omwiru wawe k'omwiha buto nomuha buli kamoi ako yayenda, ahanyuma olishanga naba musika wawe.

²² Omuntu w'ekiniga aimukya endwano, n'omuntu ayanguha kutamwa afakara muno.

²³ Ekyeju ky'omuntu kimushaijuruza, kyonkai ayetohya alikunirwa.

²⁴ Ayayema n'omushuma aba nayenoba, ahulira nibamukena kyonkai taihyamu kantu.

²⁵ Eby'abandi bagamba aha muntu bikamuhukura, bimunaga omu kabi, kyonkai k'ayesiga Omukama agira emilembe.

²⁶ Bangi bahiga obuganzi aha mutwazi, kyonkai Omukama niwe akolera omuntu amazima.

²⁷ Omugorogoki azirana n'omuntu mubi, kandi omubi ogwo azirana n'omugorogoki.