Emigani 27 - Ebibulia 2001

¹ Ebya nyenkya otabyesimira, aha rw'okuba tolikumanya eby'obwire buraija nabyo.

² Leka ondijo akutende, iwe wenene otetenda, omugenyi abe niwe akusingiza, otesingiza iwe wenene.

³ Eibare lisikiira, n'omushenye gulemeera, kyonkai ekibi kyakorwa omufera nikisikiira kubishaga byombili.

⁴ Ekiniga tikiganyira, kandi okunigara kwita, kyonkai ow'okwemera ekiisho n'ohai?

⁵ Hakili kugambira omuntu akature, kushaga okumugonza atamanyire.

⁶ Munywanyi wawe n'orwo yakukuhutaza naba aina omugendelero gurungi, kyonkai omubisha kukunywegera muno aba nakugobeza.

⁷ Aigusire atamwa obwoki, kyonkai omujara kyona ekilikushaalira abona nikinura.

⁸ Omuntu anagaho ekaye, ashusha ekinyonyi ekiinagaho ekishunkuli kyakyo.

⁹ Nk'okwo amajuta g'amarasi gashanyukya omutima, nikwo omuntu ananurwa ebyo mutahiwe amuhanulira bimurugire aha mutima.

¹⁰ Munywanyi wawe na munywanyi wa sho otalibaanaga, kandi kiro eky'enaku zilikutanga otaligya kweta murumuna wawe.

¹¹ Mwana wange, obe mumanyi, omutima gwange gushemelerwe, nyije mbone agahorora atura nanjuma.

¹² Omugezi k'abona akabi ayesheleka, kyonkai abalenga bafufulika baketumbikamu.

¹³ K'omuntu alyesimbira omwizi, otware ekijwarokye, kandi k'alyesimbira abanyamahanga, wenene abe niwe aba mukwato gwawe.

¹⁴ Alimuka bwankya karai akaha mutahiwe omugisha atungikire eiraka, balimulenga bati namukeena.

¹⁵ Omukazi emparangani nashusha enjura y'orube,

¹⁶ okusiza ogwo noshusha alikusiza omuyaga, anga kubumbatira amajuta omu mukono gwa bulyo.

¹⁷ Ekyoma kihyora ekyoma, n'omuntu ahyora ondijo.

¹⁸ Agomolera omuti gw'etini alilya ebiraba byagwo, n'alinda mukamawe alihabwa ekitinwa.

¹⁹ Okwo omuntu ayebona obusobwe omu maizi, n'ebitekelezobye nibyo bimwoleka okwo wenene ayemire.

²⁰ Okwo Sheoli na Abadoni bitaiguta, nikwo n'amaisho g'omuntu gataiguta.

²¹ Efeza bagijuguta omu ruhija n'ezahabu bagijuguta omu rumota rw'omuliro, kityo n'omuntu aramulirwa aha misimirweye.

²² Omufera omutwangirane n'engano omu kitwangiro, kyonkai obuferabwe tibumurugeho.

²³ Omanyuruze okwo amahyo gawe g'entaama gali, kandi amahyo gawe g'ente ogahyahyanire,

²⁴ orw'okuba eitunga tilirama, n'orukinga tiruturaho biro byona.

²⁵ Obunyasi babwihya, n'obw'omu mabanga babushara, ashuba amerwa obuhya.

²⁶ Entama olizihyamu ekijwaro, wakuguzaho n'embuzi ogura eitaka.

²⁷ Embuzi olizibonamu amata gangi g'okulya, olise n'omutungo gwawe n'abaana bawe kwakwo.