Emigani 26 - Ebibulia 2001

¹ Okwo eseluji etaragiirwe kubaho omu kyanda, anga enjura kugwa omw'igesha, nikwo n'omufera ataragiirwe kuhabwa kitinwa.

² Okwo akanyaimunywa katunta, n'okwo entaratamba eharara, nikwo n'omuraamo gwa bushai gutainaza.

³ Efarasi teburwaho rushanju, endogobe teburwaho tamika, n'abafera tibaburwaho nkoni mu mugongo.

⁴ Omufera atalikora bya bufera okamuhorora, otalija iwe kandi okamushusha.

⁵ Omufera omuhorore nk'omufera, ataija akebona aina obumanyi.

⁶ Ow'okuhandika ebarua akagitweka omufera, aba nashusha alikweguturaho amaguru mara aba nayetumbika omu kabi.

⁷ Okwo omulema amaguruge gatamugasha kantu, nikwo n'omugani gutagasha mufera aguchwire.

⁸ Nk'akoma eibare omu kihubeezo, niwe muntu aha omufera ekitinwa.

⁹ Okwo eihwa lichumita omutamiire ekiganja, nikwo omufera achwa omugani gukamuberagwo.

¹⁰ Omuntu agwamu omufera anga omutamiire akamwinika, nashusha omurasi w'omwambi ahutaza buli muntu.

¹¹ Omufera agarukamu ekikorwakye eky'obufera, nashusha embwa eyegarukana entanaki yayo.

¹² Omufera fera nashaga omuntu ayebona okwo alikumanya okwo atalikumanya.

¹³ Omunafu agamba ati, “Omu muhanda halimu entare! Entare eli omu mbarabara!”

¹⁴ Nk'okwo orwigi ruhindukira aha pata zarwo, nikwo omunafu ahindukira aha kitandakye.

¹⁵ Omunafu ajumbika omukono omu kihuro, ashuba alemwa kwetamika.

¹⁶ Omunafu ayebona aina obumanyi, kushaga abantu mushanju abagamba nibekengera.

¹⁷ Ayetahya omu ndwano etamukwete, nashusha abona embwa neyegendera akagikwata amatwi.

¹⁸ Okw'obona omuraru nashabura enkanzi z'omuliro, n'emyambi n'ebiso,

¹⁹ niwe muntu agobeza mutahiwe, nagamba ati, “Ninkushanzira kushai!”

²⁰ Enkwi kazihwa omu kyoto omuliro gurara, na mbali hatali mujugutiliza endwano elekera.

²¹ Nk'okwo bongera amakara aha rumota rw'omuliro, n'enkwi bakazongera omu kyoto, nikwo n'omuntu emparangani akanyisa endwano.

²² Eby'omuntu agamba omu buhwi bishusha ebyakulya bilikunura, bishenshera omu mubili.

²³ Omuntu ow'akalimi karungi kyonkai omutima aina gubi, nashusha enyungu y'eibumba eyo basiigire aluminiumu.

²⁴ Anoba banu agamba eby'okubakambulira, kandi omu mutimagwe aijwizemu obugobya.

²⁵ Ogwo atalifumorage okamwesiga, orw'okuba aha mutima ainaho amahano mushanju.

²⁶ Obugobyabwe bwakusheleka enobi eyo ainayo, kyonkai ebibi by'alikukora buli omoi nabimanya.

²⁷ Alima ekiina akigwamu, n'ahilingisa eibare ligaruka litera wenene.

²⁸ Orulimi rubeiya runoba emputa zarwo, kandi akanwa kajebeka kaisa abantu.