Emigani 25 - Ebibulia 2001

¹ Egi nayo migani ya Solomoni ey'abashaija b'Omukama Hezekia owa Yuda bahandikire ekopi.

² Ruhanga k'agira ebyo yasheleka tumuha ekitinwa, kyonkai abakama ekitinwa tukibaha orwo batumanyisa ebishelekire.

³ Okwo eiguru lili eiguru muno, n'ensi okwo egoba okuzimu owa dondondo, nikwo n'omuntu atakutaburura magezi ga bakama.

⁴ Juguta embare oihyemu efeza, omuhesi agire eky'okuheshamu ekikwato.

⁵ Ihya ababi omu mabona g'omukama, enketoye eikare omu bagorogoki.

⁶ Otalyebeleka mu mabona ga mukama, anga kwemelera mu mwanya gwa bahango.

⁷ Hakili bakugambire bati, “Izira kimoi kunu,” kushaga okukushonaza omu maisho g'omukuru.

⁸ Ebyo amaisho gawe gabona, otarahuka kubigobya mw'iramuliro, isi aha nyuma oragir'otai, orwo mutahi wawe arakukwasa enshoni.

⁹ Hakili ekigambo kyawe okimare nawe wenene, otalyata nama y'ondijo.

¹⁰ Ayahulira noyata enama egyo ataija akakushonaza, kandi aho okagokera kimoi.

¹¹ Ekigambo ekigambirwe omu kanya kakyo, nikishusha amapera g'ezahabu omu kiibo ky'efeza.

¹² Okw'obona empeta y'ezahabu anga omulengyo gw'ezahabu, nikwo omumanyi ahana banu ashusha aha bamuhuliliza.

¹³ Okwo embeho y'eseluji eshusha omu biro by'eigesha, nikwo n'entumwa enyesigwa eshusira abagitumire, kuba eshemeleza bakama bayo.

¹⁴ Omuntu ayeshalingya kukuha ekintu atakikuhe, ashusha ebichwi n'omuyaga ebitaina njura.

¹⁵ K'otagiliza omutwazi omutwara mporampora, n'akalimi karungi kata eigufa.

¹⁶ K'okwasa obwoki olyaho obw'okukumara engomba, otaija kandi okabwiguta muno okabutanaka.

¹⁷ Omwa mutahi wawe oleke kugiisa akalibatiliro, ataija akakwirwa akakunokera.

¹⁸ Omuntu ahangilira mutahiwe akamukomeeka, ashusha enkoni y'omutuli ey'endashana, anga embanda anga omwambi gw'obwogi.

¹⁹ Okwesiga atalikwesigwa orwo atangirwe, ni nk'okugira elino elilikuneganega anga amaguru agalemaire.

²⁰ Ahoyera ajunaire omutima, ni nk'ajura omwendo omu mbeho.

²¹ K'omubisha wawe aligira enjara, omuhe ekyakulya alye, kandi k'aligira eiliho omuhe amaizi anywe.

²² Kuba aho oliba nomutuuma amakara g'omuliro aha mutwe, mara Omukama alikurongora.

²³ Okwo omuyaga gwa bikara guleta enjura, nikwo orulimi rugeya rutamisa abantu.

²⁴ Hakili kutura omu rushwi omu pembe, kushaga okushwera omukazi emparangani.

²⁵ Amakuru garungi agarugire harai, gashusha amaizi galikuhora aha muntu ow'eiliho.

²⁶ Omugorogoki kugwelera akaha omubi omwanya, naba ashusire enchuro y'eshabo anga eiziba elitokoire.

²⁷ Okulya obwoki bungi ti kurungi, kutyo n'okuhiga muno eibara.

²⁸ Omuntu atalikushobora kwetanga kiniga, nashusha ekigo ekitabaliirwe mara ekisigara kitaina boma.