Emigani 24 - Ebibulia 2001

¹ Abantu ababi otalibachubira, handiki kwegomba okutera nabo ekisimba,

² kuba bonene bagonza endwano, n'akanwa kabo kagamba eby'eitima lishai.

³ Ow'obumanyi niwe ayombeka enju, enju eyombekwa alikushobokerwa,

⁴ ow'amagezi niwe aijuza ebiyumba byayo buli kamoi ak'eiguzi lingi n'eitunga elirungi.

⁵ Omumanyi amani nagakiza ainago, n'ow'amagezi nashaga ow'amani.

⁶ K'oyenda kwimukya endashana obanze oyehanuze, kugya kusinga endashana egyo orabe aha bategeki bangi muno.

⁷ Omufera eby'obumanyi bimulema muno, omu rukiko tatengya kanwa.

⁸ Ayenda okukora kubi, bamweta munyaitima.

⁹ Ekitekelezo ky'omufera kiba bufu, n'ayajumangana abantu bamutamwa muno.

¹⁰ Kawakurambabara kili kiro ky'amatangwa, amani gawe nigaba gali gajege.

¹¹ Abalikugya kwashwa obachungure, abalikusiraituka bagiire kwitwa obarokore.

¹² K'olikugamba oti, “Leba, ichwe eki tubaire tutalikukimanya.” Isi olinya amanya emitima nawe abaire atalikukimanya? Wenene amanya ebikuli omu mwoyo nakimanya, mara aha omuntu ekibonabonyio kuhonderana n'eby'akozire.

¹³ Mwana wange, lya obwoki aha rw'okuba buba burungi, obulye bukunulire.

¹⁴ Okwo olikunulirwa obwoki nikwo n'obumanyi bulikunulira omwoyo gwawe, k'oligira obumanyi oligoshoka n'eby'oyenda olibibona.

¹⁵ Otalizimbira muntu nk'okwo omuntu mubi azimbira omugorogoki omwe, otalimwitira ka.

¹⁶ N'orwo omugorogoki yakugwa emirundi mushanju ashuba aimuka, kyonkai ababi bamarwaho enaku.

¹⁷ Otalishemelerwa ngu orwo omubisha wawe yaterwa naku, kandi atalisitara iwe okashemelerwa.

¹⁸ Omukama ataija akabona wagir'otyo akakutamwa, kandi aba atakimubonabonyia.

¹⁹ Abakora kubi batalikuhwahwanisa, ababi otalibachubira,

²⁰ omubi tarama, afa bwangu.

²¹ Mwana wange, otine Ruhanga n'omukama, mara bombili obahulire,

²² manya ekibonabonyio ekyabo kigwa kibandagara, isi wakumanya oti Ruhanga anga omukama yakusindika kibonabonyioki?

²³ Leba, n'ezi ziba nfumu z'abamanyi, ekigonzi omw'iramu tikiba kirungi.

²⁴ Ow'okugambira omubi ati, “Iwe oli nyakatetere,” ogwo aliraamwa enganda, n'amahanga gamukeene.

²⁵ Kyonkai abalikabukira ababi abo baligira ebyera, baligira omugisha.

²⁶ Omuntu ahorora amazima, aba mutahi w'amazima.

²⁷ Obanze okore emilimo yawe ey'aheru, olime kurungi n'endimiro yawe, ahanyuma obe nirwo oyombeka enju.

²⁸ Otalihangilira bushai mutahi wawe, kandi eminwa yawe etaligamba bishuba.

²⁹ Otaligamba oti, “Ndamukora okwo yankora, ndamwehoroza.”

³⁰ Ndabire aha ndimiro y'omunafu, aha ndimiro y'emizabibu y'omuntu ataina magezi.

³¹ Leba yona emezirwe amahwa ekanzire, ebunzirwe engenyi, n'orugo rwayo orw'amabare rukumbire.

³² Aho kanamazire kubona ntyo, ntekeleza aha mutima, ntangara mara ngira ekyo nayegamu omwo.

³³ Okugira oti, “Kanagireho kake, kansombeho, kambyameho nyikye,”

³⁴ obunaku bulikubunda okw'obona omushuga, obworo bukukwate omwisherukare.