Emigani 23 - Ebibulia 2001

¹ K'olishuntama kulya n'omutwazi, ow'olikulya nawe omulebege.

² K'oliba nomanya okwo agira akaruru, oyeshoke omuhyo aha mumiro.

³ Otalirujuukira byakulyabye ebilikunura, aha rw'okuba haliho orwo yakuba nakutega.

⁴ Eitunga otalilihigisa mani, obe mugezi, oyefutatire.

⁵ Kulitaho oti amaisho lyahoireho, kuba limera amapapa aho n'aho, liharara litungeire eiguru nk'enkwaju.

⁶ Omunyarwango otalilya kyakulyakye, n'eby'achumbirege otabyegomba,

⁷ aha rw'okuba nashusha alikukweta aha katima ati, “Ija olye, onywe,” kyonkai atakutaireho mutima.

⁸ Olitanaka obw'oliba oliire, n'eby'oliba ogambire kumunuliza bikufere bushai.

⁹ Otaligamba kigambo mufera nakuhulira, enshonga yakwija agaya emigambire yawe ey'obumanyi.

¹⁰ Otalisimbura kiramura kya bagurusi, anga kutaha mw'itaka lya ntabwa,

¹¹ kuba Omuchunguzi wabo agira amani, naija kubaramulira akakubonabonyia.

¹² Ebyo bakwegesa obiteho omutima, n'ebigambo by'obumanyi obihulire.

¹³ Otaliburwa kuhana mwana, k'oramutera ekishanju talikwija kufa.

¹⁴ K'oramutera ekishanju oramukiza ahali Sheoli.

¹⁵ Mwana wange k'oligira obumanyi aha mutima, nanye omutima gwange gulishemelerwa.

¹⁶ Omwoyo gwange gulishemelerwa, k'oragambaga ebili by'amazima.

¹⁷ Omutima gwawe gutalichubira bafakare, shana omushana gwona osiibe notina Omukama.

¹⁸ Omu mazima amakiro galija, orwo eshubi yawe eligobelera.

¹⁹ Mwana wange, ohulire mara obe muntu w'obumanyi, eby'orakora obikore obigendeleire.

²⁰ Otaligya mu kisimba kya ntamiizi za divai, anga abarurukira enyama.

²¹ Entamiizi n'ab'omururu balinakwara, k'oliikara omu kurombera olijwara ebishambalita.

²² Ohulirega sho ayakuzaire, kandi otaligaya nyoko mu bukaikurubwe.

²³ Ogure amazima otaligaguza, ogire empiya ogure obumanyi, bakwegese, kandi obone amagezi.

²⁴ Ishe omwana omugorogoki alishanduka muno, omuntu alizara omwana aina obumanyi aramushemelerwaga.

²⁵ Sho na nyoko obahe ebyera, n'omukazi yakuzaire ashanduke.

²⁶ Mwana wange, ebyo ndikukugambira obiteho omutima, olebere ahali inye.

²⁷ Omumalaya nashusha ekinyanga ekili okuzimu, omukazi endaya nashusha eiziba elifunzire,

²⁸ azimbira okw'obona omushuga, n'abantu ajangisa bangi.

²⁹ Enaku zigirw'ohai? Obujune bugirw'ohai? N'ohai ayeboroboita? Amahuta ga bushai gagirw'ohai? Atukura amaisho ab'ohai?

³⁰ Ebyo bigirwa abanywa bakakeisa, nibo baruga aha nibagya aha, nibaroza edivai erungire.

³¹ Otaleba divai ngu orwo yatukura! Otagileba ngu orwo yatwaka omu kikompe ekasongokage aha mumiro!

³² Orw'okuba ahanyuma eruma nk'enjoka, etema nk'empili.

³³ Orwo wanyoire obona enyawalinga, kandi ogamba n'ebitaragiirwe,

³⁴ oshusha abyamire omu nyanja omugati, nk'abyamire aha mulingoti omu katwetwe.

³⁵ Mara aho nirwo oija okagamba oti, “Banjugize, kyonkai timputaire, bantera tinahuliramu kantu. Isi ndasisimuka maki? Kanshube mpige amarwa agandi.”