Emigani 21 - Ebibulia 2001

¹ Omukama niwe aina obushobora aha mutwazi, nk'okwo okumworobera kuhabura omugera gw'amaizi.

² Omuntu eby'akora byona wenene abona bili birungi, kyonkai Omukama niwe amanya ebili aha mutima.

³ Okukora eby'obugorogoki n'amazima, nibishemelera Omukama kushaga ebitambo.

⁴ Omubi amanyikira aha ikuru n'eisinini, mara obwo buba bufu.

⁵ Omwegendeleza atekeleza ebiramugasha muno, kyonkai buli omoi atuhya tabona kantu.

⁶ Eitunga ly'okulyomejanyia lyamuuka nk'orwoya, mara liba mutego gwa rufu.

⁷ Ababi obukatili bwabo bulibaisa, aha rw'enshonga banga kukora eby'amazima.

⁸ Omufakare akora ebikiikamire, kyonkai omurungi akora ebigendukire.

⁹ Hakili kutura omu rushwi omu pembe, kushaga okushwera omukazi emparangani.

¹⁰ Omubi ayegomba ebibi, tagilira mutahiwe buganyizi.

¹¹ Agaya banu k'abona enaku, omulenga amanyiraho, orwo omumanyi bamwegesa amanya.

¹² Omugorogoki aikara alebire okwo eka y'omubi eliba, ababi bakuntuka ahansi basilika.

¹³ Atakirwa omunaku akanga kuhulira ametagege, na wenene alitaka kyonkai tibalihulira ky'alikwetaga.

¹⁴ K'omuntu anigara okagira ekyo wamuha omu kabobombo kimuchuleza, kandi kumuha rushwa omu shelekwa emumara ekiniga kingi.

¹⁵ Amazima kagabaho omugorogoki agira ebyera, kyonkai abakora kubi bahahanwa emitima.

¹⁶ Omuntu atakora bya magezi alifa.

¹⁷ Agonza okujama aliba munaku, agonza edivai n'amajuta talitunga.

¹⁸ Omubi eby'agonza kukora omugorogoki bimushubaho, kutyo n'atali mwesigwa eby'agonza kukora omurungi.

¹⁹ Hakili kutura omw'irungu, kushaga okushwera omukazi emparangani atahwa nkungana.

²⁰ Eitunga kamaanya tilihwa mwa mugezi, kyonkai omufera alimirangura.

²¹ Akora eby'obugorogoki n'obufura, alibona oburora n'ekitinwa.

²² Omumanyi atemba eboma y'ekigo ky'emanzi, eboma egyo eyo besiga agikambura.

²³ Alinda kanwake na rulimirwe, ayekiza aha mishango.

²⁴ Ow'eikuru n'eisinini bamweta njumangani, eby'akora ebikoza eituli.

²⁵ Eky'omunafu ayegomba kimushasa kimugobya aha kanya, aha rw'okuba emikonoye tekunda kukora.

²⁶ Ekiro kyona omuntu mubi asiiba nayegomba ebya banu, kyonkai omugorogoki aha, taima.

²⁷ Ekitambo ky'omubi kizirwa, leronu kukileta aina omugendelero gubi!

²⁸ Ajulira ebishuba alichweka, kyonkai ayagamba ekyo ahuliire obujulizibwe bukundwa.

²⁹ Omubi ayeyomayomya aha maisho, kyonkai omugorogoki akora ekyo atekeleize.

³⁰ Obumanyi, amagezi n'entegeka, tibyakukiza Mukama mani.

³¹ Efarasi bagitekatekera ekiro ky'endashana, kyonkai okusinga kuba kw'Omukama.