Emigani 18 - Ebibulia 2001

¹ Ayeshorora omu bandi aba nayegonza, ebyo banu babona bili by'amazima wenene tabikiliza.

² Omufera eby'amagezi tibimushemelera, shana wenene agonza kugamba okwo alikutekeleza.

³ Obufu n'enshoni bigenda hamoi, kandi k'omuntu agoka ahemuka.

⁴ Ekigambo ekyaruga omu kanwa k'omuntu nikishusha enyanja engundu, entabuko y'obumanyi ni nk'omwiga ogulikuhinda.

⁵ Ti kirungi kugilira omubi ekigonzi, anga omugorogoki kutamukolera mazima.

⁶ Akanwa k'omufera kaimukya endwano, mara kamuteza.

⁷ Akanwa k'omufera kamwisa, eby'agamba bimunaga omu kabi.

⁸ Ebigambo eby'ow'orunwa bishusha ebyakulya ebilikunura, bisongokage aha mumiro bitaha omw'ibunda.

⁹ Anafalira eikora, wenene n'omwisi barumuna.

¹⁰ Eibara ly'Omukama nilishusha omunara ogugumire, omugorogoki nigwo airukiramu akarokoka.

¹¹ Eitunga aha mutungi kigokye ekihamire, ni nka eboma eimukire nemulinda.

¹² Eikuru ly'omuntu limurugiramu orufu, kyonkai obwetohya buzarukanwamu ekitinwa.

¹³ Omuntu k'ahorora eky'atahuliire, akora eky'obufera mara ashonara.

¹⁴ Omuntu yakwemera endwara, kyonkai n'ohai ow'okwemera obujune?

¹⁵ Omugezi niwe abona obumanyi, omumanyi niwe agonza kuhulira eby'amagezi.

¹⁶ Ayagenda n'entukuru niwe baha omwanya, entukuru egyo emugobya omu maisho g'abakuru.

¹⁷ Omu ntongana omuntu abanza aboneka oti ali omu mazima, kuhika orwo ondijo aija akaleba ebigambobye.

¹⁸ Ekura echwa empaka, eramura abaina empaka ab'amaani.

¹⁹ K'ojuna murumuna wawe naiwe akushusira ekigo ekigumire, kyonkai enkungana eshusha emihingo ya nyaruju.

²⁰ Eby'omuntu agamba nibyo bimumara enanu, ekimuruga omu kanwa nikyo kimushemelera.

²¹ Orulimi rwisa anga rukiza, abagonza okugamba balikebona.

²² Abona omukazi w'okushwera aba aboine ekirungo, mara n'Omukama amusingira.

²³ Omunaku agamba natagiliza muno, kyonkai omutungi ahoroza ekikabwe.

²⁴ Haliho abatahi abezora ati batahi, kyonkai aliho omutahi ow'okukushagira murumuna wawe.