Emigani 16 - Ebibulia 2001

¹ Omuntu agendelera ebyo arakora, kyonkai Omukama niwe ashara ekigambo.

² Omuntu eby'akora byona abona bili birungi, kyonkai Omukama aleba eky'omutima gugendeleire.

³ Emilimo yawe ogikwase Omukama, eby'olikugendelera kukora bije bishoboke.

⁴ Buli kimoi eky'Omukama yatonzire akakitaho omugendelero gwakyo, nangu n'ababi akabatonda kabasilika.

⁵ Omukama atamwa muno buli muntu ow'eikuru, mazima ekibonabonyio talikihungaho.

⁶ Ebikorwa birungi n'obwesigwa nibyo biiza entambara, kandi k'omuntu atina Omukama ayelinda obufu.

⁷ Orwo omuntu akorage akashemeleza Omukama, alemwa ashobokeranganwa n'ababishabe.

⁸ Hakili okugira bike okaba mugorogoki, kushaga okutungira omu kulyomejanyia.

⁹ Omuntu agira migendeleroye, kyonkai Omukama niwe amuhabura.

¹⁰ Eby'omukama agamba aba abikyanuliirwe, eiramu elye aramura ely'amazima.

¹¹ Omukama niwe agira omunzani ogutaiba, n'amabare gagwo gona niwe yagatonzire.

¹² Abakama kuhena liba ihano, aha rw'okuba enketo ehangwa obugorogoki.

¹³ Ayagamba amazima niwe ashemeleza omukama, omukama agonza ayagamba amazima.

¹⁴ Ekiniga ky'omukama kishura rufu, kandi ow'obumanyi akichuleza.

¹⁵ Orwo omukama amwenya omanya okwo agumire, kandi k'aronka omuntu ekyo kishusha ebichwi by'enjura y'omuhanguko.

¹⁶ Kirungi kitai kugira obumanyi kushaga ezahabu! Hakili kugira amagezi kushaga okutunga efeza.

¹⁷ Eby'omugorogoki akora byona bizirana n'ebibi, ayelinda akiza oburorabwe.

¹⁸ Eikuru lirugwamu orufu rubi, ayekuza ashuba enyuma.

¹⁹ Hakili okuba mwetohya okaikara n'abaanaku, kushaga kushemera n'aba'eikuru nangu bakakuha n'aha minyago.

²⁰ Ahanwa agoshoka, kandi muberwa ayesiga Omukama.

²¹ Ow'obumanyi bamweta muntu w'amagezi, efumoroye enulira abantu.

²² Ow'obumanyi obumanyi bumubera nchuro y'oburora, kyonkai obufera bw'abafera nikyo kibonabonyio kyabo.

²³ Ow'obumanyi agamba eby'amagezi, ashuba agamba ebilikunura.

²⁴ Ebigambo ebilikunura ni nk'ekigabo ky'obwoki, binulira omwoyo mara bishemeza omubili.

²⁵ Haliho ekishemelera omuntu akakikora, kyonkai endekelero yakyo ruba rufu.

²⁶ Enda y'enkozi niyo emusindika kukora emilimo, n'akanwake niko kamusindika kukora.

²⁷ Kihundiba agonza okukora kubi, n'efumoroye eyokya nk'omuliro.

²⁸ Omuntu mubi ahujanyia abantu, kandi ow'orunwa aterana abatahi.

²⁹ Omunyaitima abeiyabeiya mutahiwe, amunaga omu muhanda gutali gurungi.

³⁰ Omuntu atera banu akalari aba aina omugendelero gubi, kandi anena akabai niwe aba nayenda kukora kubi.

³¹ Omutwe gw'enjwi rukinga rw'ekitinwa, kuba omuntu omugorogoki niwe amerwa enjwi ezo.

³² Atanigara bwangu murungi kushaga emanzi, kumoi n'omuntu ayefutatira kushaga omutwazi w'ekigo.

³³ Abantu baraguza nibatelera enshoga aha ruhu, kyonkai eiramu lyona liruga aha Mukama.