Emigani 15 - Ebibulia 2001

¹ Empororo nungi emara ekiniga, kyonkai okukabuka kukiimukya.

² Orulimi rw'omumanyi rugamba eby'amagezi, kyonkai akanwa k'omufera kagambaijurwa ebujaibuja.

³ Omukama abona buli hantu, abona omubi n'omurungi.

⁴ Orulimi rurungi ruba muti gw'oburora, kyonkai karugamba ebitokoire ruhenda omutima.

⁵ Omufera agaya omuhano gwa ishe, kyonkai agambirwa akahulira ogwo aba ali mugezi.

⁶ Omw'omugorogoki habamu eitunga lingi, kyonkai eitunga ely'omubi ligwerwa ebyemba.

⁷ Akaana k'omumanyi kagamba eby'amagezi, kyonkai abafera tikwo bagira.

⁸ Ekitambo ky'omubi Omukama takikunda n'akake, kyonkai enshara y'omugorogoki emushemelera.

⁹ Ebigiro by'omubi Omukama bimutama muno, kyonkai agonza akora eby'obugorogoki.

¹⁰ Achwa emihango abona ekibonabonyio kihango, enyanga kugambirwa elifa.

¹¹ Omukama yabona ebili Sheoli na Abadoni, aije aburwe kubona ebili omu mitima y'abantu?

¹² Ow'eigayangane tayenda kuhanwa, tayehanuza aha mumanyi.

¹³ Aina ebyera aha mutima bimuboneka aha maisho, kyonkai ow'obujune azoka achunchubaire.

¹⁴ Omugezi aitanira obumanyi, kyonkai abafera bashemelerwa obutamanya.

¹⁵ Omushashe agira enaku ebiro byona, kyonkai ow'omutima gulikushanduka aikara nashemelerwa.

¹⁶ Hakili kugira bike kyonkai okatina Omukama, kushaga okugira eitunga lingi likakubonesa enaku.

¹⁷ Hakili kugonjanyia mukaraagira omulili, kushaga okuragira enyama eshaire okwo nimunobangana.

¹⁸ Omwangu w'okunigara aleta endwano, kyonkai ow'ekiniga kigufi araza enkungana.

¹⁹ Omunafu agira enaku zonkai omu burora, kyonkai oburora bw'omugorogoki buba bw'emilembe yonkai.

²⁰ Omwana omugezi ashemeleza ishe, kyonkai omufera agaya nyina.

²¹ Obufera bushemelera ataina magezi, kyonkai omugezi akora eby'obugorogoki.

²² K'otategekeirwe eby'olikwenda kukora bigenda kubi, kyonkai kabakutegekera bangi aho bigendage.

²³ Omuntu ashemelerwa empororo eyaizira omu kanya kayo, n'ekigambo ekyagambirwa omw'ibanga lyakyo tikishemera pai!

²⁴ Ow'obumanyi araba omu muhanda gw'oburora, ataija akagya Sheoli okuzimu.

²⁵ Omukama akambura enju y'ow'eikuru, kyonkai akataka k'entumbwakazi akalinda.

²⁶ Ebitekelezo by'omubi bitama muno Omukama, kyonkai ebigambo by'omugorogoki bimushemelera.

²⁷ Omuntu arurukira eitunga ly'okukwangura abonesa ekaye enaku, kyonkai atamwa rushwa ogwo alirora.

²⁸ Omugorogoki atekeleza muno okwo arahorora, kyonkai omubi agamba kubi omu kanwa.

²⁹ Enshara y'omugorogoki Omukama agihulira, kyonkai omubi tamuhulira nakati.

³⁰ Abashemelerwa bashemelera abandi, kandi amakuru garungi gagomora.

³¹ Omuntu ahulira omuhano gw'omugasho, ogwo nawe aligira obumanyi.

³² Enyanga kugambirwa eyeshasa, kyonkai akunda kugambirwa ogwo agira amagezi.

³³ Ayayegesibwa eby'obumanyi atina Omukama, kandi k'ogonza ekitinwa obanza oba mwetohya.