Emigani 14 - Ebibulia 2001

¹ Omukazi w'obumanyi ayombeka eka, kyonkai omufera ekaye agyekambulira wenene.

² Akora eby'obugorogoki atina Omukama, kyonkai akora ebitaragiirwe aba namugaya.

³ Omufera eikurulye limugambisa bingi, kyonkai omumanyi agamba nayebalira.

⁴ Mbali atali nte za kulimisa tibagira myaka, kyonkai mbali bazilimisa emyaka beza nyingi.

⁵ Omujulizi omwesigwa tabeiya, kyonkai omujulizi ataina mazima agamba ebishuba byonkai.

⁶ Ow'eigayangane ahiga obumanyi atabubone, kyonkai omugezi okuhiga obumanyi kumworobera.

⁷ Omufera omurugeho, aha rw'okuba toina kumwihyaho bigambo bya magezi.

⁸ Okugonza kweshobokerwa nibwo bumanyi bw'omugezi, kyonkai obufera bw'abafera kuba okugamba ebishuba.

⁹ Ababi Ruhanga abashekelera, kyonkai ahabukira omugorogoki.

¹⁰ Enaku z'aha mutima zimanywa mukama wazo, kandi taliho muntu ondijo amanya byera ebyo mutahiwe ainabyo aha mutima.

¹¹ Eka y'omubi elisilika, kyonkai eka y'omugorogoki n'orwo eli njege eligoshoka.

¹² Haliho ekishemelera omuntu akakikora, kyonkai endekelero yakyo rufu.

¹³ Omuntu yakusheka okwo aina obujune aha mutima, kandi ebyara bibanza, obushasi bwija ahanyuma.

¹⁴ Omuntu omubi eby'akora bimushubaho, kandi omurungi ebigirobye bimugoshora.

¹⁵ Omulenga ayesiga buli kimoi, kyonkai omugezi aleba mbali alikugya.

¹⁶ Ow'obumanyi ayelinda mara takora kubi, kyonkai omufera agajabuka ashuba akora okwo yayenda.

¹⁷ Omwangu w'okunigara takoza magezi, kandi omugezi ayegumisiliza.

¹⁸ Omulenga ayenda obulenga, kyonkai obumanyi nirwo ruba rukinga rw'omugezi.

¹⁹ Ababi balibandamira abarungi, baliirukira omw'abagorogoki.

²⁰ Omunaku anobwa nangu n'omwatani, kyonkai omutungi abatahi agira bangi.

²¹ Agaya mutahiwe aba mufakare, kyonkai muberwa agilira omunaku ekisha.

²² Isi abagendelera okukora kubi tibashobya? Abagendelera okukora kurungi besigwa mara bakunirwa.

²³ Buli mulimo gugira amagoba, kyonkai amagambo gashai ganakwaza.

²⁴ Ab'obumanyi obumanyi bwabo nirwo rukinga rwabo, kyonkai abafera obufera bwabo rukinga rwabo.

²⁵ Omujulizi omwesigwa arokora abandi, kyonkai agamba ebishuba aba mbanzi.

²⁶ Omu kutina Omukama nimwo ali obwesigwa obuhamire, n'abaanabe balibona obuhungiro.

²⁷ Okutina Omukama niyo eba nchuro y'oburora, omwo nimwo omuntu ashobora kukilira aha mitego ya rufu.

²⁸ Embaga niyo eba kitinwa ky'omukama, kyonkai omukama ataina bantu bamwita.

²⁹ Atali mwangu wa kunigara agira amagezi gangi, kyonkai ayanguha kutamwa azora obuferabwe.

³⁰ Omutima gutebekaine nibwo burora bw'omubili, kyonkai obushanshame eba ndwara ya kansa.

³¹ Ashasa omunaku aba najuma omutonziwe, kyonkai agilira omwanje ekisha aba nakunisa omutonzi ogwo.

³² Omubi okuhenakwe kumwisa, kyonkai omugorogoki oburungibwe bumubonesa obuhungiro.

³³ Omuntu omugezi niwe agira obumanyi, kyonkai omufera obumanyi tibumumanyikaho.

³⁴ Obugorogoki buhaisa eihanga ekitinwa, kyonkai eihanga elyafakara lihemuka.

³⁵ Omwiru akoza obumanyi aganja omukama, kyonkai omukama ogwo ashuba anigalira omugoke.