Emigani 13 - Ebibulia 2001

¹ Omwana omugezi ahulira ebyo ishe amwegesa, kyonkai ow'eikuru tahanwa akahulira.

² Omuntu omurungi eby'agamba babimusiimira, kyonkai omuntu engobya aitanira obukatili.

³ Alinda kanwake aitanira burorabwe, kandi agambaijurwa ayeisa.

⁴ Omunafu ekyo ayegomba takibona, kandi enkozi y'emilimo ebona bingi.

⁵ Omugorogoki atamwa okugamba ebishuba, kyonkai omuntu omubi ahemuka.

⁶ Obugorogoki bulinda omugorogoki, kyonkai omubi obufu bumwisa.

⁷ Haliho omuntu ayegamba eitunga okwo ataina kantu, kandi ondijo ayehindura munaku okwo eitunga aina lingi.

⁸ Eitunga ly'omuntu nigwo guba mukwatogwe, kyonkai omunaku tagira kyona kyona kya kukwatiliza.

⁹ Omugorogoki ashusha ekitangara ekyakizege, kyonkai omubi ashusha etara elikwaka ekizimandara.

¹⁰ Eikuru ly'entagambirwa nilyo limujemeesa, kyonkai abakunda kugambirwa bagira obumanyi.

¹¹ Eitunga ely'obwangubwangu likendeera bwangu, kyonkai abona kake kake ogwo atumbisa.

¹² Okushuburugukwa kurwaza omuntu, kyonkai omuntu kubona eky'alikwenda ashusha aboine omuti gw'oburora.

¹³ Enyanga kugambirwa eyeletera enaku, kyonkai ahikya emihango alirongorwa.

¹⁴ Eby'omumanyi ayegesa eba nchuro y'oburora, manyasi bijuna omuntu kutantara emitego ya rufu.

¹⁵ Amagezi garungi gasiimwa, kyonkai abataina bwesigwa ebyo bakora bibaisa.

¹⁶ Omuntu omugezi eby'akora byona abikoza amagezi, kyonkai omufera ayeyolekya okwo ali mufera.

¹⁷ Entumwa mbi enaga abantu omu kabi, kyonkai entumwa nungi eleta emilembe.

¹⁸ Omuntu atakunda kuhanwa anakwara mara agoka, kyonkai omuntu agambirwa ogwo akunirwa.

¹⁹ Omuntu k'abona ekyo alikwenda ashemelerwa, kyonkai abafera tibenda n'akake kulekera kukora kubi.

²⁰ Ayaikara n'abaina obumanyi agira obumanyi, kyonkai ayaikara n'abafera abona enaku.

²¹ Enaku zigwera abafakare, kyonkai abagorogoki babona egoshoko.

²² Omuntu omurungi asigira abaijukuru eitunga, kyonkai eitunga ly'omufakare litwarwa omugorogoki.

²³ Ensi etalikulimwa yakuba elimwa abaanaku beza ebyakulya bingi, kyonkai abandi bagilyangishanyia bagitwara.

²⁴ Ataha mwanawe kibonabonyio aba namutamwa, kyonkai alikumugonza ayanguha kumuhana.

²⁵ Omugorogoki agira bingi eby'okulya akaiguta, kyonkai orubunda rw'omubi rwikara bushai.