Emigani 12 - Ebibulia 2001

¹ Omuntu agonza obwegendeleza agonza okumanya kyonkai omufera atamwa okumanya.

² Omuntu murungi Omukama amusingira, kyonkai agonza okukora kubi amuramura.

³ Omuntu omubi tarama, kyonkai omugorogoki taliyuga ebiro byona.

⁴ Omukazi murungi aba rukinga ahali iba, kyonkai omuhemu ahali iba ashusha endwara ya kansa.

⁵ Omugorogoki atekeleza ebisaine, kyonkai omubi ahanura eby'obugobya.

⁶ Omubi agamba eby'okwita omuntu atamanyire, kyonkai omugorogoki agamba ebirarokora abantu.

⁷ Ababi basilika bahwaho, kyonkai eka y'omugorogoki elirama.

⁸ Omuntu asiimwa kuhonderana n'ebirungi eby'akora, kyonkai ow'amagezi gafire agahywa.

⁹ Hakili kuba muntu wa buli kiro ow'omulimo ogwa buli kiro, kushaga okuba muntu muhango okarumwa enjara.

¹⁰ Omugorogoki afaho ebitunganwabye, kyonkai omubi tagira buganyizi shana obukatili.

¹¹ Omulimi arabonaga ebyakulya bingi, kyonkai aikara aho bushai aba ataina magezi.

¹² Omubi amanige gona gamufera bushai, kyonkai omugorogoki k'ayemelera asimba omuzi.

¹³ Omuntu omubi akanwake kakahena kamwisa, kyonkai omugorogoki tagwa mu naku.

¹⁴ Omuntu asiimirwa aha byo agambire, kandi ebyo akora abirongolerwa.

¹⁵ Eby'omufera akora bishemelera wenene wenkai, kyonkai omumanyi kabamuhanulira ahuliliza.

¹⁶ Omufera kabamutamisa ashanshamuka aho n'aho, kyonkai omugezi kabamujuma tabyetaho.

¹⁷ Omugambi w'amazima agamba ekyo aboinekwo, kyonkai omugambi w'ebishuba agamba ekyo ataboine.

¹⁸ Haliho ayanguha kugamba ebilikuchumita nk'embanda, kyonkai orulimi rw'omugezi rukiza.

¹⁹ Omugambi w'amazima arama ebiro byona, kyonkai omugambi w'ebishuba tatura.

²⁰ Ab'omutima gubi nibo batekeleza kubi, kyonkai ab'omutima gurungi bagira ebyera.

²¹ Taliho naku zigwera mugorogoki, kyonkai ababi enaku bagira zingi.

²² Eminwa ebeihya Omukama tagyenda n'akake, kyonkai abesigwa bamushemelera.

²³ Omugezi tayeyolekya kwo alikumanya, kyonkai abafera batarangya obufera bwabo.

²⁴ Okujwahukira emilimo kurakuhaisaga ekitinwa, nawe omunafu baramujarabaga kukora emilimo.

²⁵ Okuhahanwa omutima kutebesa omuntu, kyonkai ekigambo kirungi kimushandukya.

²⁶ Omugorogoki ayenyinya ekili kibi, kandi eby'ababi bakora bibaanaga.

²⁷ Omunafu eky'ahiiga takibona, kyonkai omugezi alibona eitunga lingi.

²⁸ Obugorogoki nigwo muhanda gw'oburora, kyonkai okukora kubi kwisa.