Emigani 1 - Ebibulia 2001

Omugasho gw'emigani

¹ Egi migani ya Solomoni mutabani wa Daudi, omukama wa Isiraeli.

² Abantu babone kwega n'okugira obumanyi, n'amagezi.

³ Bege okutura kurungi, babe bagorogoki, ab'amazima n'obwesigwa.

⁴ Abalenga babe bamanyi, abasigazi bagire amagezi n'obushobokerwa.

⁵ N'omumanyi ahulire, kandi ayege ebishagireho, kandi omugezi agire obubuya,

⁶ ashobore kushobokerwa omugani, eby'abamanyi bagamba, n'emigani eyo bachwa.

⁷ Okutina Omukama niyo ntandikiro y'obumanyi, abafera bagaya obumanyi kandi tibakunda kwegesibwa.

⁸ Mwana wange, hulira sho akwegese, kandi n'ebyo nyoko alikukwegesa otabyanga.

⁹ Aha rw'okuba ebyo nirwo rukinga rurungi rwawe rw'omu mutwe, n'emikofu yawe y'omu ngoto.

¹⁰ Mwana wange, abafakare kabarakwohya otakunda.

¹¹ Kabaragamba bati, “Tugende hamoi tuzimbire omuntu tumwite, tuzimbire nyakatetere tumukwate,

¹² buli muntu tumumire wena narora, okwo amirwa Sheoli, bashushe abasongoka omu kiina,

¹³ nitwija kuhiga buli kantu ak'eiguzi, turaijuza amaju gaitu eminyago,

¹⁴ eby'oinabyo obituletere ichwena tugire enshaho emoi.”

¹⁵ Mwana wange otabarondora, ebyo balikukora otabikora.

¹⁶ Ahakuba okukora ekibi nikubahanguhira, mara okwita omuntu nikuborobera.

¹⁷ Okutega akatimba ekinyonyi kikulebire, nokora bushai.

¹⁸ Kyonkai abantu aba nibenaga omu kabi, nibagonza kweisa.

¹⁹ Abanyagi bona eby'ababi nibyo bakora, baita abantu batwara ebyabo.

Emihano ya Bumanyi

²⁰ Bumanyi nakungeleza omu kigo, natungamya eiraka omu mijajaro,

²¹ nagamba muno ayemire aha nkuta eiguru, nagamba ayemire aha bigi by'ekigo.

²² “Inywe bafera, muraberahai n'okugonza obufera? Isi abasheki baraberahai n'okusheka n'abafano kutamwa obumanyi?

²³ Muhulilize mbahane, leba, mbagambire ebitekelezo byange, mbibamanyise.

²⁴ Mbesire mwayanga kuhuliliza, naimukya omukono kubeta kyonkai taliho ahuliire.

²⁵ Ebyo mbategekeire byona mubyangire, nabahana timwaikiliza.

²⁶ Aho nanye ndabashekelera enaku zibateire, orwo murahukuka mbashekelere.

²⁷ Mbashekelere orwo murahukuka nk'abateirwe enkomaizi, enaku zikababunda nk'akazimu, akabi kakababunda mukahahanwa emyoyo.

²⁸ Aho balinyeta kyonkai tindyetaba, balimpiga muno kyonkai tibalimbona.

²⁹ Kuba bakanga kumanya, bayanga n'okutina Omukama.

³⁰ Nikyo bayangire kimoi ebyo nabategekeire, mara bakagaya byona ebyo nabahanire,

³¹ aha rw'ekyo ebyo balikukora balibyebona, ebibi byabo bilibashubaho.

³² Abafera baitwa obufera bwabo n'abafano eikuru lyabo libasilikya,

³³ kyonkai omuntu alimpuliliza eligira emilembe, achulere, talibaho kabi ka kumutinisa.”