Embandizo 7 - Ebibulia 2001

Omutunga nigwija

¹ Omukama agambira Noa ati, “Otahe omu bwato iwe n'omutungo gwawe gwona, aha rw'okuba mboine okwo n'iwe oli murungi wenkai alikunshemeleza omu muzarwa ogu.

² Omu bigunju byona ebilikwera okwatemu mushanju mushanju, ekishaija n'ekikazi kyakyo; kandi omu bigunju ebitalikwera bibili bibili, ekishaija n'ekikazi kyakyo;

³ n'omu binyonyi kwakwo mushanju mushanju, ekishaija n'ekikazi; obilinde bitalija bikachweka mu nsi.

⁴ Aha rw'okuba ebiro kabirakya mushanju ndagwisa enjura ebiro makumi ganai, na buli kintu ekirora ekyo natonzire nkisilikye omu nsi.”

⁵ Noa akora byona eby'Omukama yamuragiire.

⁶ Noa akaba aina emyaka rukaga orwo omutunga gw'amaizi gwabunzire ensi.

⁷ Wenene, n'abatabani, na mukaziwe, n'abakamwana bataha omu bwato babone kukira aha mutunga.

⁸ Omu bigunju ebilikwera n'ebitalikwera, n'omu binyonyi n'omuli byona ebyekurura:

⁹ Bibili bibili, ekishaija n'ekikazi, akaikara nabyo omu bwato nk'okwo Ruhanga yabaire amuragiire.

¹⁰ Ebiro mushanju kabyahingwire, omutunga gw'amaizi gwabunda ensi.

¹¹ Kiro ekyo Noa yagobya emyaka rukaga n'emyezi ebili n'ebiro ikumi na mushanju, enchuro zona okuzimu owa dondondo zifumuka amaizi, n'eiguru likinguka.

¹² Enjura egwa ebiro makumi ganai kiro na mushana.

¹³ Aha kiro kyonene kyonene Noa, mukaziwe n'abatabani Shemu, Hamu na Yafeti, n'abakamwana bonshatu, bataha omu bwato.

¹⁴ Bakabutahamu na buli kigunju kuhonderana n'engeli yakyo, n'ebitunganwa byona kuhonderana n'engeli zabyo, na buli kintu ekyekurura aha itaka kuhonderana n'engeli yakyo, na buli kinyonyi kuhonderana n'engeli yakyo.

¹⁵ Ebigunju n'ebinyonyi bitaha na Noa omu bwato ekishaija n'ekikazi

¹⁶ nk'okwo Ruhanga yabaire amuragiire. Ahanyuma Omukama amukingirana.

¹⁷ Omutunga gukamara omu nsi ebiro makumi ganai. Amaizi geyongera, geleza obwato, bwelera eiguru.

¹⁸ Gakanya muno, gaijura ensi, geleza obwato.

¹⁹ Gakanya muno munonga nangu gashweka n'amabanga gona agarai garai omu nsi yona.

²⁰ Gakanya muno gashaga amabanga emita mushanju.

²¹ Byona ebyabaire bina oburora omu nsi bifa: Ebinyonyi, ebitunganwa, ebigunju, n'ebitondwa byona ebigenda omujumbi na buli muntu.

²² Buli kintu omu nsi ekyabaire kina omwoyo nikikya kikafa.

²³ Buli kimoi ekyabaire kina oburora omu nsi Omukama akakisilikya: Abantu, ebigunju, ebyekurura n'ebinyonyi. Noa wenkai niwe yasigaireho n'abo yabaire ainabo omu bwato.

²⁴ Amaizi gakabunda ensi ebiro kikumi mwo makumi gatanu.