Embandizo 41 - Ebibulia 2001

Yozefu naitoitora ebiroto bya Farao

¹ Emyaka ebili yona kayabaire yahingwire, Farao arota ayemeleire aha Mwiga gwa Naili.

² Abona ente mushanju zirungi mara zigomokire, niziruga omuli Naili, zilya ebibimbili.

³ Kandi ashuba abona ente ezindi mushanju zitebire zihoire aha magufa, ziruga omuli Naili zizemeleraho aha rukunguru rw'omwiga.

⁴ Ente ezitebire zihoire aha magufa ziliira kimoi omushanju ezirungi ezigomokire. Aho Farao aita eisisimuka.

⁵ Ashuba anagira, arota omurundi gwa kabili. Abona ebikumba mushanju bihulingiliire mara birungi bimezire aha kiti kimoi.

⁶ Ashuba abona ebikumba mushanju, bitutura bishoroimire, bihotoirwe omuyaga gw'eirungu ly'oburugaizoba.

⁷ Ebikumba ebishoroimire bimilira kimoi ebikumba mushanju ebihulingiliire mara ebijwire enjuma. Farao aita eisisimuka, abona okwo yaba ali omu kiroto.

⁸ Aho bwankya ahwahwana omwoyo; ayeta abafumu bona ba Misiri n'abamanyi bayo bona, abarotorolera ekirotokye, kyonkai tiyazokire muntu wa kushobora kukimwitoitorolera.

⁹ Ahanyuma omukwasi mukuru w'enkorogo amugambira ati, “Kir'eki naijuka okwo nashobize.

¹⁰ Orwo Farao yabaire anigaliire abairube, inye n'omuyondo mukuru w'emikate akatufunga jela omw'omukuru w'abalinzi,

¹¹ tukarota omu kiro kimoi, inye na wenene. Buli omoi aina ekiroto ekye n'enshonga yakyo.

¹² Tukaba twinamu omusigazi Omuheburania, ali mwiru w'omukuru w'abalinzi. Katwamugambire atwitoitorolera ebiroto byaitu; aitoitorolera buli muntu kuhonderana n'ekirotokye.

¹³ Mara okwo yatwitoitoroleire nikwo byabaire. Inye bakangarura aha muruka gwange, omuyondo w'emikate bamuhanika.”

¹⁴ Aho Farao atumaho Yozefu, bamwihya jela bwangu bwangu. Kayabaire yamoisize yahindwire n'emyendoye, aija omu mabona ga Farao.

¹⁵ Farao amugambira ati, “Ndosire, mara taliho n'omoi ayakukitoitora. Inye nahulira nibakugamba ngu k'ohulira ekiroto oshobora kukitoitora.”

¹⁶ Yozefu amuhorora ati, “Waitu inye tindikushobora, shana Ruhanga niwe arashobora kukikwitoitorolerage.”

¹⁷ Aho Farao amugambira ati, “Ndosire nyemeleire aha rukunguru rwa Naili.

¹⁸ Ente mushanju zirungi zigomokire ziruga omuli Naili zilya ebibimbili.

¹⁹ Ezindi mushanju zibi zija, mara zitebire muno zihoire aha magufa ezo ntakabonaga mu nsi ya Misiri.

²⁰ Ente ezo ezitebire zihoire aha magufa ziliira kimoi omushanju eza mbere ezigomokire.

²¹ Kyonkai orwo zibaire zaziliire taliho yakumanyire okwo zazilya aha rw'okuba zibaire zihoire aha magufa nk'aha mbandizo. Aho nyita eisisimuka.

²² Nshubire narota ebikumba mushanju bimezire aha kiti kimoi, birungi bijwire enjuma;

²³ n'ebikumba ebindi mushanju bihotokire, bishoroimire, bihotoirwe omuyaga gw'eirungu ly'oburugaizoba, bitutura.

²⁴ Ebishoroimire bimilira kimoi omushanju ebirungi. Ekiroto nakigambira abafumu, kyonkai taliho yashobora kukinshoborora.”

²⁵ Aho Yozefu agambira Farao ati, “Ekiroto kyawe rugaba, kili kimoi. Ruhanga yakushurulira ekyo alikwija kukora.

²⁶ Ente mushanju ezirungi nizo myaka mushanju; n'ebikumba mushanju ebirungi niyo myaka mushanju, ekiroto kili kimoi.

²⁷ Ente mushanju ezishoroimire, ezitebire zihoire aha magufa, ezizirugire enyuma niyo myaka mushanju, kandi ebikumba mushanju ebili bushai bihotoirwe omuyaga gw'eirungu ly'oburugaizoba, egyo myaka mushanju y'eifa.

²⁸ Kili nk'okwo nakugambira rugaba, Ruhanga yakwoleka ekyo alikwija kukora.

²⁹ Harabaho emyaka mushanju y'omwero gungi omu nsi yona ya Misiri;

³⁰ kyonkai egyo erahonderwa emyaka mushanju y'eifa, n'omwero gwebeke omuli Misiri. Eifa lilimaraho ensi,

³¹ n'omwero tigulimanyika mu nsi aha rw'enshonga y'eifa elyo elilihonderaho aha rw'okuba liliba lingi muno.

³² Okurota kabili kwa Farao nikwoleka okwo ekigambo ekyo kitairweho Ruhanga, mara naija kukigobesheleza bwangu.

³³ Mbwenu aha rw'ekyo rugaba, oronde omuntu enyegendeleza mara omugezi, omuhe kugelera ensi ya Misiri.

³⁴ Oshube oteho abalebelezi omu nsi, mara okwate ekichweka kya katanu ky'ebirata nibyera omuli Misiri omu myaka egyo mushanju y'omwero.

³⁵ Bashombokye ebyakulya byona by'emyaka emirungi elikwija, babibiike omu bigo omu bushobora bwa Farao.

³⁶ Ekyakulya ekyo kiliba mpanika y'ensi omu myaka mushanju y'eifa elilitera Misiri, litaija likagisilikya.”

Yozefu naba mugelezi wa Misiri yona

³⁷ Ekigambo eki kishemelera Farao n'abaramatabe bona.

³⁸ Ababaza ati, “Twakuzora omuntu nk'ogu aina Mwoyo wa Ruhanga?”

³⁹ Aho agambira Yozefu ati, “Orwo Ruhanga yakwoleka ebi byona, taliho n'omoi enyegendeleza mara omugezi nka iwe okw'oli.

⁴⁰ Iwe oragelera eka yange, n'abantu bange bona bakore nk'okwo orabaragira. Shana okuba mukama nikwo ndakushagyaho kwonkai.”

⁴¹ Ashuba amugambira ati, “Leba, nakuhindura mugelezi wa Misiri yona.”

⁴² Aihya empetaye y'omuhuri aha mukono agiteka aha mukono gwa Yozefu, amujweka emyendo ya kitani nungi n'omukofu gw'ezahabu omu ngoto;

⁴³ amukuubisa omu galiye eya kabili. Abamwebembeire bagenda nibagamba bati, “Muteke amajwi!” Nikwo yamuhindiwre mugelezi w'ensi yona ya Misiri.

⁴⁴ Mara amugambira ati, “Inye ndi Farao. Kyonkai iwe eky'otaikiliize taliho muntu araimukya mukono anga kuguru omuli Misiri yona.”

⁴⁵ Farao ayeta Yozefu eibara Safenatipanea; kandi amusiigira Asenati muhara wa Potifera omukuhani wa Oni. Aho Yozefu agya kurambura ensi yona ya Misiri.

⁴⁶ Yozefu akaba aina emyaka makumi gashatu orwo yabandize kukolera Farao omukama wa Misiri. Aruga omu kikaare kya Farao agya kurambura ensi yona ya Misiri.

⁴⁷ Omu myaka mushanju y'omwero ensi ekeza muno.

⁴⁸ Yozefu ashombokya ekyakulya kyona ky'emyaka mushanju orwo habaire haliho omwero omuli Misiri. Abika ebyakulya omu bigo. Buli kigo yakibikagamu ebyakulya ebyarugaga omu misiri eyabaga ekyataine.

⁴⁹ Akabika emyaka nyingi muno nk'omushenye gw'enyanja alemwa alekera kugipima aha rw'okuba ekagoba aha kutapimwa.

⁵⁰ Emyaka y'eifa etakagobire Yozefu akazara abaana b'abojo babili ahali mukaziwe Asenati muhara wa Potifera omukuhani wa Oni.

⁵¹ Omuzigaijogwe akamweta Manase, nagamba ati, “Ruhanga anyebesize enaku zange zona n'ab'omwaitu bona.”

⁵² Owa kabili akamweta Efuraimu, nagamba ati, “Ruhanga ampaire oruzaro omu nsi eyo naboneiremu enaku.”

⁵³ Emyaka mushanju y'omwero ogwabaireho omuli Misiri ehwa;

⁵⁴ n'emyaka mushanju ey'eifa ebanza, nk'okwo Yozefu yabaire agambaire. Eifa likaba lili omu nsi zona, kyonkai Misiri ekaba eina ebyakulya.

⁵⁵ Orwo eifa lyayemire kubi ensi yona ya Misiri, abantu batakira Farao kubaha ebyakulya. Farao agambira Abamisiri bona ati, “Mugende ahali Yozefu, ekyo arabagambira mukore.”

⁵⁶ Eifa libamba ensi yona, liba lingi muno omuli Misiri. Aho Yozefu akingura amahanika gona aguza Abamisiri ebyakulya.

⁵⁷ Mara kandi ensi zona zaijaga Misiri ahali Yozefu kugura ebyakulya ebyo, enshonga eifa likaba lili lingi muno buli hantu.