Embandizo 4 - Ebibulia 2001

Kaini na Abeli

¹ Adamu amanya Eva mukaziwe, atwara enda. Azara Kaini, agamba ati, “Omukama yambera nazara omwana w'omwojo.”

² Ashuba azara omurumuna Abeli. Abeli akaba ali mushumba w'entaama, kandi Kaini akaba ali mulimi.

³ Ebiro kabyahingwireho Kaini aletera Omukama ekihongo aha byoyayelize.

⁴ Abeli omu mizigaijo y'obuhyobwe aletaho omwana gw'entaama n'ebishaju byagwo. Omukama ashemelerwa Abeli n'ekihongokye.

⁵ Aho Kaini anigara muno akabaraza n'obuso.

⁶ Omukama abaza Kaini ati, “Kubaki onigaire? Isi kiki kukabaraza obuso?

⁷ Kuba waba okozirege wakubaire noshemelerwa. Kyonkai k'olikukora kubi obufu bukuhuniire aha rwigi. Nibugonza kukukiza amani kyonkai noragirwa kubusinga.”

⁸ Kaini agambira omurumuna Abeli ati, “Tuturuke aheru.” Orwo babaire bali aheru, Kaini achokera omurumuna Abeli, amwita.

⁹ Aho Omukama abaza Kaini ati, “Abeli murumuna wawe alihai?” Ahorora ati, “Tindikumanya; inye ndi mulinzi wa murumuna wange?”

¹⁰ Omukama amubaza ati, “Wakoraki? Obwamba bwa murumuna wawe bwemire omw'itaka nibuntakira!

¹¹ Mbwenu aha ensi eyanywa obwamba bwa murumuna wawe owo waita yakuraama.

¹² K'oragilimaga telikweleza kantu. Mara omu nsi omu olyenjera, oliba nyenjezi.”

¹³ Kaini agambira Omukama ati, “Ekibonabonyio kyange kihango kushaga okwo nakukyemera.

¹⁴ Leba kir'eki wambinga munu, wanchwa kanyenjera nkaba mbungezi omu nsi; mara wena wena aramboneraga okunyita.”

¹⁵ Aho Omukama amugambira ati, “Tikwo, wena wena aliita Kaini alyehorozibwa emirundi mushanju.” Amutaho akabonero omuntu we na we na atalimubona akamwita.

¹⁶ Aho Kaini aruga omu maisho g'Omukama, atura omu nsi ya Nodi oburugaizoba bwa Edeni.

Oruzaro rwa Kaini

¹⁷ Kaini amanya mukaziwe, atwara enda azara Henoki. Kaini ayombeka ekigo akyetelera eibara ly'omutabani Henoki.

¹⁸ Henoki azara Iradi, Iradi azara Mehuyaeli, Mehuyaeli azara Metushaeli na Metushaeli azara Lameki.

¹⁹ Lameki ashwera abakazi babili, omoi eibaralye ni Ada, ondijo eibaralye ni Sila.

²⁰ Ada azara Yabali; niwe ishenkuru abatungi b'ebitunganwa abatura omu mahema.

²¹ Murumuna Yabali ni Yubali; niwe ishenkuru abatezi b'enanga n'emilere.

²² Sila ogwo azara Tubalikaini omuhesi w'ebikwato byona by'omulinga n'ekyoma. Munyanya Tubalikaini akaba ali Nama.

²³ Lameki agambira bakazibe ati, “Ada na Sila hulira eiraka lyange, inywe baka Lameki huliliza ekigambo kyange. Omuntu amputaize namwita, omusigazi yantema namwihya aha mushozi.

²⁴ Ka Kaini araba ali w'okweholerwa emirundi mushanju, aho alinyita alyeholerwa emirundi nshanju na mushanju.”

Okuzarwa kwa Seti na Enoshi

²⁵ Adamu ashuba amanya mukaziwe. Omukazi azara omwana w'omwojo, eibara amweta Seti, ati, “Ruhanga yampa omwana ondijo aha mwanya gwa Abeli owo Kaini yaisire.”

²⁶ Na Seti kwakwo azara omwana w'omwojo, eibara amweta Enoshi. Omu makiro ago abantu babanza kutakira Omukama.