Embandizo 22 - Ebibulia 2001

Ruhanga naragira Aburahamu kutamba Isaka

¹ Ebyo kabyahoire, Ruhanga alenga Aburahamu; amweta ati, “Aburahamu.” Ogu ahorora ati, “Kaboneke waitu!”

² Ruhanga amugambira ati, “Okwate Isaka mutabani wawe omumoi, omugonzibwa wawe, ogende omu nsi ya Moria, omutambe ekitambo ky'okwokibwa aha ibanga limoiho elyo ndakugambira.”

³ Aho Aburahamu aimuka bwankya karai, ayara endogobeye, agendaho n'abairu babili n'omutabani Isaka. Ayasa enkwi z'okwokesa ekitambo, aimukya, agenda mbali Ruhanga yabaire amugambiire.

⁴ Aha kiro kya kashatu Aburahamu kunaga amaisho alengera mbali yabaire nagya.

⁵ Nikwo kugambira abairube ati, “Mwikare aha n'endogobe, inye n'omwana tugye kulinya tufukame, turagaruka tubashangeho.”

⁶ Aburahamu akwata enkwi z'okwokesa ekitambo azitweka omutabani Isaka. Atwara omuliro n'omuhyo, bombili bagenda hamoi.

⁷ Isaka ayeta Aburahamu ishe ati, “Tata!” Ishe amuhorora ati, “Ndi aha mwana wange.” Amubaza ati, “Twina omuliro n'enkwi, kyonkai entaama y'ekitambo ky'okwokibwa elihai?”

⁸ Aburahamu amuhorora ati, “Mwana wange, Ruhanga wenene arayezolera entaama y'ekitambo ky'okwokibwa.” Aho bombili bagenda hamoi.

⁹ Kabagobire mbali Ruhanga yabaire amugambiire, Aburahamu ayombekaho ealutare, atahoge enkwi, aboha omutabani Isaka, amuta ahali ealutare aha nkwi eiguru.

¹⁰ Akwata omuhyo, aimukya omukono kwita omutabani.

¹¹ Nawe omumalaika w'Omukama amweta ayemire omw'iguru ati, “Aburahamu, Aburahamu!” Ndi ogu ayetaba ati, “Kaboneke waitu!”

¹² Omumalaika amugambira ati, “Otaziza mukono aha mwana anga kumukoraho kyona kyona; mbwenu namanya okw'otina Ruhanga, orwo otanyangira mwana wawe, omwana wawe omumoi.”

¹³ Aburahamu kugya kunaga amaisho enyumaye abona empaya y'entaama, amahembe gayo gakwatire omu kishaka. Agenda akwata empaya egyo, agitamba ekitambo ky'okwokibwa aha mwanya gw'omutabani.

¹⁴ Aho omwanya ogwo agweta Yehovayire, nk'okwo gulikwetwa na kir'eki, nikyo bagambira bati, “Aha ibanga ly'Omukama ekitambo kirazoka.”

¹⁵ Omumalaika w'Omukama ayeta Aburahamu omurundi gwa kabili ayemire omw'iguru,

¹⁶ nagamba ati, “N'inyerahira obuso bwange, alikugamba ninye Omukama. Orwo wakor'otyo otayangira mwana wawe omumoi,

¹⁷ mazima ndikuha omugisha, baijukuru bawe mbakanyise nk'enyanyinyi z'aha iguru; mbahindure bangi nk'omushenye gw'omwegego gw'enyanja. Baijukuru bawe abo balitera ekigo ky'ababisha babo, babatware.

¹⁸ Kandi omuli baijukuru bawe nimwo amahanga gona g'ensi galiherwa omugisha, aha rw'okuba wahulira ekyo nakuragira.”

¹⁹ Aburahamu agaruka agoba abairube, baimukya bagenda hamoi Berisheba, aba nimwo atura.

Oruzaro rwa Nahori

²⁰ Ebi kabyabaire byahoire bagambira Aburahamu bati, “Murumuna wawe Nahori akazara abaana ahali Milika.

²¹ Omuzigaijo ni Uzi, nahonderwaho omurumuna Buzi na Kemueli ishe Aramu.

²² Abarumuna abandi ni Kesedi, Hazo, Pilidashi, Yidilafu na Betueli.”

²³ Betueli niwe ishe Rebeka. Aba munana nibo Nahori murumuna Aburahamu yazaire ahali Milika.

²⁴ Kandi ensholekeye eyayetwaga Reuma ekazara Teba, Gahamu, Tahashi na Maka.