Embandizo 21 - Ebibulia 2001

Okuzarwa kwa Isaka

¹ Omukama ashuba abonekera Sara mara amukolera nk'okwo yabaire aragaine.

² Sara atwara enda azalira Aburahamu omwana w'obwojo omu bugurusibwe, omu bukiro obwo Ruhanga yabaire amugambiire.

³ Omutabani owo Sara yamuzaliire, Aburahamu amuruka eibara Isaka.

⁴ Kayagobize ebiro munana amutahiri nk'okwo Ruhanga yabaire amuragiire.

⁵ Aburahamu akaba aina emyaka kikumi orwo yazaire Isaka.

⁶ Sara agamba ati, “Ruhanga anshekize, na buli omoi arakihulira arankwasa ensheko.”

⁷ Ati, “N'ohai ayakugambiire Aburahamu okwo nakwonkize abaana? Kyonkai mbwenu muzalire omwana w'obwojo omu bugurusibwe.”

⁸ Omwana akura, achuka. Kiro ekyo yachuka Aburahamu akora obugenyi buhango.

Okubingwa kwa Hagari n'omutabani Ishimaeli

⁹ Sara agya abona omwana wa Hagari Omumisiri, owo yazaliire Aburahamu nazana n'omutabani Isaka.

¹⁰ Aho agambira Aburahamu ati, “Obinge omuzana ogu n'omwanawe, aha rw'okuba omwana w'omuzana talikwija kusika hamoi na mwana wange Isaka.”

¹¹ Ekigambo ekyo kitama muno Aburahamu aha rw'omutabani Ishimaeli.

¹² Kyonkai Ruhanga agambira Aburahamu ati, “Otatamwa aha rw'enshonga y'omwana wawe n'omuzana wawe. Kyona kyona ekyo Sara arakugambira okikore nk'okwo yakikugambira, aha rw'okuba baijukuru bawe balyetelerwa ahali Isaka.

¹³ Kandi omwana w'omuzana ndimuhindura ntabuko y'eihanga kuba nawe mwana wawe.”

¹⁴ Aburahamu aimuka bwankya karai akwata ekyakulya n'enfulebe y'amaizi, abiha Hagari, abimuta aha ibega, amubinga n'omwana. Hagari agenda ajenjera omw'irungu lya Berisheba.

¹⁵ Orwo amaizi gahoire omu nfulebe, Hagari anaga omwana aha kishaka kimoiho.

¹⁶ Agendaho akatambi, ashuntama ayolekeire mbali omwana ali, nka mbali wakurasha omwambi gukagoba, nagamba ati, “Kantabona mwana nafa.” Orwo yabaire ashuntamire ayolekeire mbali ali, omwana atungika eiraka alira.

¹⁷ Ruhanga ahulira eiraka ly'omwana; n'omumalaikawe ayeta Hagari ayemire omw'iguru, amubaza ati, “Hagari, ekilikukushasa kiki? Otatiina, aha rw'okuba Ruhanga yahulira eiraka ly'omwana mbali ali.

¹⁸ Imuka oshuture omwana omumaramare, ahakuba ndimuhindura ntabuko y'eihanga lihango.”

¹⁹ Ruhanga amuburuza amaisho abone eiziba ly'amaizi; agenda aijuza enfulebe amaizi, anyoisa omwana.

²⁰ Ruhanga ayemamu omwana akura, atura omw'irungu, aba mubuya w'okurasha emyambi.

²¹ Eirungu elyo yatwiremu ni Parani; nyina amushwelerera omukazi kuruga omu nsi ya Misiri.

Aburahamu naragana na Abimeleki

²² Omu makiro ago Abimeleki na Fikoli omukuru w'ihelye, agambira Aburahamu ati, “Ruhanga nakwemamu omuli byona eby'olikukora;

²³ mbwenu aha rw'ekyo onnahilire omw'ibara lya Ruhanga ogwo okwo otalimpinduka, anga kuhinduka baana bange na baijukuru bange. Nk'okwo nkubeleire mwesigwa obe nikwo ombera mwesigwa, n'ensi ey'ofurukiiremu ogibere mwesigwa.”

²⁴ Aburahamu agamba ati, “Inye ninahira.”

²⁵ Ka Aburahamu yagelekire Abimeleki aha rw'eiziba ly'amaizi ely'abairube babaire bakwete,

²⁶ Abimeleki agamba ati, “Akozire ekintu eki tindikumumanya. Tongambiire, mara tinkakihuliire kuhika kir'eki.”

²⁷ Aho Aburahamu akwata entaama n'enumi aziha Abimeleki; bombili bakora endagano.

²⁸ Aburahamu ashorora omu buhyobwe emiagazi y'obutaama mushanju.

²⁹ Abimeleki abaza Aburahamu ati, “Emiagazi y'obutaama mushanju eyo washorora eina nshongaki?”

³⁰ Aburahamu amuhorora ati, “Emyagazi y'obutaama obu mushanju nimbukuha obutore, obe mujulizi wange okwo nalimire eiziba eli.”

³¹ Aha rw'ekyo omwanya ogwo guketwa Berisheba, aha rw'okuba niho bombili baraganiire.

³² Endagano bakagikolera Berisheba. Abimeleki aimukya na Fikoli omukuru w'ihelye, bagaruka omu nsi y'Abafilisiti.

³³ Aburahamu abyara omuti gw'omuhesheli omuli Berisheba, afukamira Omukama Ruhanga w'eirai lyona.

³⁴ Aburahamu omu nsi y'Abafilisiti mbali yabaire afurukiire, akaturamu ebiro bingi.