Embandizo 2 - Ebibulia 2001

¹ Nikwo eiguru n'ensi byahoire bityo n'ebikabilimu byona enkuyanja.

² Aha kiro kya mushanju Ruhanga akaba yamazire omulimogwe gwona ogw'okutonda; aho ahumura.

³ Ekiro ekyo kya mushanju akiha omugisha, akikuza. Aha rw'okuba nikyo yahumuliireho orwo yamazire omulimogwe gwona ogw'okutonda.

⁴ Egyo niyo baruro y'okutondwa kw'eiguru n'ensi. Orwo Omukama Ruhanga yatonzire eiguru n'ensi,

Ebaruro ya kabili y'okutonda

⁵ ensi ekaba etainamu bimera. Kandi taliho mbibo zabaire zigimeziremu, aha rw'okuba akaba atakagwisize njura, n'ensi ekaba etakaboine wa kugilima.

⁶ Kyonkai amaizi garuga okuzimu ensi eitikilira.

⁷ Ahanyuma Omukama Ruhanga akwata eitaka alibumbamu omuntu, amuhuha omwoyo gw'oburora omu nyindo, nikwo omuntu kurora.

⁸ Aho Omukama Ruhanga alima ebusitani ya Edeni, mukono gw'oburugaizoba; agitamu omuntu owo yabumbire.

⁹ Ebusitani egyo Omukama Ruhanga agimeza emiti mirungi eya buli ngeli ey'ebiraba by'okulya. Kandi omugati y'ebusitani amezamu omuti gw'oburora, ogw'okumanyisa ebirungi n'ebibi.

¹⁰ Omuli Edeni hakaba nihatabukwamu omugera, nigwo gwaitiliraga ebusitani. Kagwamaraga kuturuka Edeni gubeganukamu emiga enai.

¹¹ Eibara ly'ogwa mbere ni Pishoni; nigwo gugera niguzingora Havila yona, ensi y'ezahabu,

¹² mara ezahabu y'ensi egyo eba nungi. Ensi egyo ya Havila egira bedola n'amabare g'eiguzi.

¹³ Eibara ly'omwiga gwa kabili ni Gihoni. Nigwo gugera niguzingora ensi yona ya Kushi.

¹⁴ Eibara ly'omwiga gwa kashatu ni Tigirisi. Nigwo gugelera oburugaizoba bwa Asiria. Omwiga ogwa kanai ni Efurati.

¹⁵ Omukama Ruhanga akwata omushaija amuta omu busitani ya Edeni, kugilima n'okugimanya.

¹⁶ Amuhangira nagamba ati, “Buli muti omu busitani wakugulyaho okwo olikwenda;

¹⁷ kyonkai aha muti gw'okumanyisa ebirungi n'ebibi, otaligulyaho. Aha rw'okuba kiro ky'oligulyaho, olifa.”

¹⁸ Ahanyuma ashuba agamba ati, “Ti kurungi muntu kuba wenkai. Ndamuteraho omujuni alikumushusha.”

¹⁹ Aho akwata eitaka abumba buli nyamaishwa na buli kinyonyi, abiletera omushaija kubona arabyeta atai. Buli okwo omushaija yarukire ekitondwa ekilikurora nilyo lyabaire ibara lyakyo.

²⁰ Aruka ebitunganwa byona amabara, n'ebinyonyi, n'enyamaishwa zona; kyonkai omuli ebyo byona tiyaboinemu mujuni alikumushusha.

²¹ Aho Omukama Ruhanga anagiza omushaija ogwo oturo tungi. Kayabaire anagire amwihyamu orubanda rumoi, azibikamu enyama omu mwanya gwarwo.

²² Orubanda orwo Omukama Ruhanga yaihire omu mushaija arukoramu omukazi, amumuletera.

²³ Aho omushaija agamba ati, “Mbwenu aha eli igufa elyaruga omu magufa gange, mara mubili ogwaruga aha mubili gwange. Arayetwaga mukazi aha rw'okuba yaruga aha mushaija.”

²⁴ Aha rw'ekyo omushaija arasigahoga ishe na nyina ajwangane na mukaziwe, nabo babe mubili gumoi.

²⁵ Omushaija na mukaziwe bombili bakaba bali bushai, kyonkai tibakwetwe nshoni.