Embandizo 12 - Ebibulia 2001

Ruhanga nayeta Aburamu

¹ Omukama agambira Aburamu ati, “Ruga omu nsi yanyu, n'omu ruganda rwanyu, n'omwanyu, ogye omu nsi eyo ndakwoleka.

² Ndakuhindura ihanga lihango, nkuhe omugisha nkuhindure kiranganwa, obone kuba mugisha.

³ Abalikuha omugisha ndibaha omugisha, n'alikuraama ndimuraama. Kandi amahanga gona omu nsi galiherwa omugisha omuli iwe.”

⁴ Aho Aburamu agenda nk'okwo Omukama yabaire amugambiire; na Loti agenda nawe. Aburamu akaba aina emyaka nshanju n'etanu orwo yarugire Harani.

⁵ Aimukya na mukaziwe Sarai na Loti omutabani ow'omurumuna, n'eitunga lyabo lyona elyo babaire bainalyo, n'abairu bona abo babaire batungiire Harani, baimukya kugya omu nsi ya Kanaani. Kababaire bagobire Kanaani,

⁶ Aburamu arambura ensi egyo kuhika Shekemu, aha mwaloni gwa More. Omu makiro ago ensi egyo ekaba neturwamu Abakanaani.

⁷ Aho Omukama abonekera Aburamu amugambira ati, “Baijukuru bawe ndibaha ensi egi.” Honene aho nikwo Aburamu kwombekeraho Omukama ealutare.

⁸ Arugayo agya omu mabanga g'oburugaizoba bwa Beteli, aterayo eihemalye. Beteli eli oburugaizoba bwa Ai, na Ai eli oburugaizoba. Honene halinya ayombekeraho Omukama ayabaire amubonekeire, ealutare amutakira.

⁹ Agendera kimoi agiire Negebu.

Aburamu omuli Misiri

¹⁰ Omu nsi ya Kanaani hakaba halimu eifa. Aho Aburamu agya Misiri aba niyo afurukira, kuba eifa likaba lili lingi omuli Kanaani.

¹¹ Kayabaire ali haihi kutaha Misiri, agambira mukaziwe Sarai ati, “Nimanya okwo oli mukazi murungi aha maisho.

¹² Abamisiri kabarakubona nibaija kugamba bati, ‘Ogu ni mukaziwe,’ aho banyite. Kyonkai iwe barakuleka, tibalikwija kukwita.

¹³ Ogambe okwo oli munyanyazi, aho baraba batakinkora kubi kuntura iwe; baraba batakinyita.”

¹⁴ Aburamu kutaha Misiri, Abamisiri babona okwo muka Aburamu ali murungi muno.

¹⁵ Abaramata ba Farao kabamuboine, bamutenda ahali Farao. Nikwo kumumutwalira.

¹⁶ Aha rwa Sarai ogwo Farao akolerage Aburamu. Amuha entaama, ente, endogobe, engamia, abairu n'abazana.

¹⁷ Kyonkai Omukama ateza Farao n'ekaye ebibundo by'amani nabatura Sarai muka Aburamu.

¹⁸ Ahanyuma Farao ayeta Aburamu amubaza ati, “Kiki eki eky'onkoleire? Kubaki otangambiire okwo ogu ali mukazi wawe?

¹⁹ Nshongaki kugamba oti, ‘Ni munyanyazi,’ inye nkamushwera? Mbwenu mukazi wawe ngugwo, omutware, mara ogende.”

²⁰ Farao aragira abashaija okwo baramugilira. Batyo baba nikwo bamushendekeleza namukaziwe na byona ebyo yabaire ainabyo.