Embandizo 11 - Ebibulia 2001

Omunara gwa Babeli

¹ Ensi yona ekaba eina orulimi rumoi n'emigambire emoi.

² Orwo abantu babaire nibafuruka kuruga oburugaizoba bagwamu omuteleka omu nsi ya Shinari, batura omwo.

³ Aho bagambirangana bati, “Mwije tubumbe amatofari, tugokyege.” Bayombekesa amatofari omu mwanya gw'amabare, mara bagombekesa elami omu mwanya gw'einoni.

⁴ Bagamba bati, “Mwije twombeke ekigo, n'akatwetwe k'omunara kagobe omw'iguru, tubone eiranga batutine, batalija bakatupapaaza bakatumazaho ensi.”

⁵ Omukama asongoka kuleba ekigo n'omunara ogwo abantu abo babaire bombekire.

⁶ Agamba ati, “Abantu aba bona ihanga limoi, mara baina orulimi rumoi. Egi mbandizo y'ebyo barakora, mara taliho kyo barategeka kukora kikabalema.

⁷ Mwije tusoke tugye tubatangure orulimi rwabo, balekere kushobokerwangana omu migambire.”

⁸ Aho Omukama abapapaaza, abemya aha kigo kyabo abamalira omu nsi zona, n'elyombeka ly'ekigo balinagaho.

⁹ Nikwo ekigo ekyo kwetwa eibara Babeli, kuba aho niho Omukama yatabanguliire orulimi rw'ensi yona, mara ho niho yabemiza kubapapaaza akabamalira omu nsi zona.

Baish'enkuru Aburamu

¹⁰ Aba nibo baijukuru ba Shemu. Shemu orwo yabaire aina emyaka kikumi, nirwo yazaire Aripakishadi, emyaka ebili omutunga guhoiremu.

¹¹ Kayamazire kuzara Aripakishadi, arora emyaka endijo bikumi bitanu. Mara omwo azara abojo abandi n'abaisiki.

¹² Aripakishadi kayabaire aina emyaka makumi gashatu n'etanu nirwo yazaire Sela.

¹³ Kayamazire kuzara Sela, arora emyaka endijo bikumi binai n'eshatu. Mara omwo azara abojo abandi n'abaisiki.

¹⁴ Sela kayabaire aina emyaka makumi gashatu, nirwo yazaire Eberi.

¹⁵ Kayamazire kuzara Eberi, arora emyaka endijo bikumi binai n'eshatu. Mara omwo azara abojo abandi n'abaisiki.

¹⁶ Eberi kayabaire aina emyaka makumi gashatu n'enai nirwo yazaire Pelegi.

¹⁷ Kayamazire kuzara Pelegi, arora emyaka endijo bikumi binai n'eshatu. Mara omwo azara abojo abandi n'abaisiki.

¹⁸ Pelegi kayabaire aina emyaka makumi gashatu nirwo yazaire Reu.

¹⁹ Kayamazire kuzara Reu, arora emyaka endijo bikumi bibili na mwenda. Mara omwo azara abojo abandi n'abaisiki.

²⁰ Reu kayabaire aina emyaka makumi gashatu n'ebili nirwo yazaire Serugi.

²¹ Kayamazire kuzara Serugi, arora emyaka endijo bikumi bibili na mushanju. Mara omwo azara bojo abandi n'abaisiki.

²² Serugi kayabaire aina emyaka makumi gashatu nirwo yazaire Nahori.

²³ Kayamazire kuzara Nahori, arora emyaka endijo bikumi bibili. Mara omwo azara abojo abandi n'abaisiki.

²⁴ Nahori kayabaire aina emyaka makumi gabili na mwendai nirwo yazaire Tera.

²⁵ Kayamazire kuzara Tera, arora emyaka endijo kikumi mwo ikumi na mwendai. Mara omwo azara abojo abandi n'abaisiki.

²⁶ Tera kayabaire aina emyaka nshanju nirwo yazaire Aburamu, Nahori na Harani.

Oruzaro rwa Tera

²⁷ Aba nibo baijukuru ba Tera. Tera akazara Aburamu, Nahori na Harani; Harani akazara Loti.

²⁸ Harani akafera mbere Tera, ishe, yagwa omu nsi y'obuzarebwe, Uri ey'Abakalidayo.

²⁹ Aburamu na Nahori bakashwera abakazi. Muka Aburamu eibaralye ni Sarai, na muka Nahori eibaralye ni Milika, muhara wa Harani. Harani nashuba nazara Isika.

³⁰ Sarai akaba ali mugumba, ataina mwana.

³¹ Tera akwata Aburamu omutabani, n'omwijukuru Loti mutabani wa Harani, n'omuka Sarai omukamwana Aburamu, baruga Uri ey'Abakalidayo kugya Kanaani. Kyonkai kabagobire Harani baba nimwo batura.

³² Ebiro bya Tera byona hamoi myaka bikumi bibili n'etanu, mara akagwa Harani.