Embandizo 1 - Ebibulia 2001

Ebaruro ya mbere y'okutonda

¹ Obubere Ruhanga akatonda eiguru n'ensi.

² Ensi ekaba eli bushai etaina mishusire yona yona. Kandi enyanja ekaba ebunzirwe omwilima, na Mwoyo wa Ruhanga yarabaga aha nyanja egyo eiguru.

³ Ruhanga agamba ati, “Habeho ekitangara.” Ekitangara kibaho.

⁴ Ruhanga abona ekitangara okwo kili kirungi, akitaishurana n'omwilima.

⁵ Ekitangara akyeta nyemishana, n'omwilima agweta kiro. Buba bwankya buba bwaigoro, ekyo kiro kya mbere.

⁶ Ruhanga agamba ati, “Habeho eiguru omugati y'amaizi, ligataishurane.”

⁷ Atonda eiguru, eiguru elyo litaishurana amaizi: Aga gagya eiguru yalyo, aga gagya ahansi yalyo. Nikwo byabaire bityo.

⁸ Elyo alyeta Iguru. Buba bwankya buba bwaigoro, ekyo kiro kya kabili.

⁹ Ruhanga agamba ati, “Amaizi agali omu nsi gateranire omu mwanya gumoi, habeho orukaru.” Biba bityo.

¹⁰ Orukaru arweta Nsi, n'amaizi agateraniire hamoi ageta Nyanja. Aleba abona okwo bili birungi.

¹¹ Ashuba agamba ati, “Ensi emerwe ebimera, ebiraba enjuma n'emiti eraba ebiraba by'enjuma, buli kimoi omu ngeli yakyo.” Biba bityo.

¹² Ensi emerwa ebimera ebya buli ngeli ebiraba enjuma n'emiti y'ebiraba etali emoi. Aleba abona okwo bili birungi.

¹³ Buba bwankya buba bwaigoro, ekyo kiro kya kashatu.

¹⁴ Ruhanga agamba ati, “Aha iguru habeho ebilikwaka eby'okutaishurana nyemishana n'ekiro, mara bibe bumanyiso bw'ebirumo, n'ebiro, n'emyaka.

¹⁵ Bibe ebilikwaka aha iguru byakize ensi.” Biba bityo.

¹⁶ Atonda ebilikwaka bibili ebihango. Ekilikwaka ekihango kibe kya nyemishana, kandi ekilikuhonderaho kibe ky'ekiro. Kwakwo atonda n'enyanyinyi.

¹⁷ Ebilikwaka ebyo abiteka aha iguru kuta nibyakiza ensi,

¹⁸ ebya nyemishana n'eby'ekiro bibinge omwilima habone. Aleba abona okwo bili birungi.

¹⁹ Buba bwankya buba bwaigoro, ekyo kiro kya kanai.

²⁰ Ruhanga agamba ati, “Omu nyanja habemu ebitondwa bingi muno ebina oburora. N'ebinyonyi biharare eiguru.”

²¹ Kityo atonda ebinyamugenge by'amani eby'omu nyanja, n'ebitondwa byona ebina oburora ebigenda ebya buli ngeli ebijwire omu nyanja, n'ebinyonyi ebiharara ebitali bimoi. Aleba abona okwo bili birungi.

²² Abiha omugisha nagamba ati, “Muzare mukanye mwijure enyanja, n'ebinyonyi bikanye omu nsi.”

²³ Buba bwankya buba bwaigoro, ekyo kiro kya katanu.

²⁴ Ashuba agamba ati, “Ensi ebemu ebitondwa ebina oburora ebya buli ngeli: Ebitunganwa, n'ebyekurura, n'enyamaishwa ezitali zimoi.” Biba bityo.

²⁵ Ruhanga atonda enyamaishwa ez'engeli zingi, n'ebitunganwa ebitali bya mishusire emoi, n'ebyekurura kutyo. Aleba abona okwo bili birungi.

²⁶ Nirwo yagambaiire ati, “Mbwenu tutonde abantu abalikutushusha, abalikushusha ichwe. Batware enfuru, n'enyanja, n'ebitunganwa, n'ebyekurura ebya buli ngeli, n'ensi yona.”

²⁷ Kityo Ruhanga atonda abantu abalikumushusha, abalikushusha wenene. Atonda omushaija n'omukazi.

²⁸ Abaha omugisha abagambira ati, “Muzare mukanye, mwijure ensi mugigelere. Mutware enfuru n'ebinyonyi, na buli kintu omu nsi ekina oburora ekigenda.”

²⁹ Agamba ati, “Nabaha ebimera byona omu nsi yona, eby'enjuma, buli muti ogw'ebiraba by'enjuma, bibe byakulya byanyu,

³⁰ Omu nsi omu buli nyamaishwa, buli kinyonyi, ebyekurura byona na buli kimera n'ebina oburora byona, nabibaha bibe byakulya byanyu. Biba bityo.”

³¹ Ruhanga abona buli kintu ekyo yatonzire okwo kili kirungi muno. Buba bwankya buba bwaigoro, ekyo kiro kya mukaga.