Eby'abalevita 9 - Ebibulia 2001

Aroni natamba ebitambo

¹ Aha kiro kya munana Musa ayeta Aroni n'abatabani n'abebembezi ba Isiraeli.

² Agambira Aroni ati, “Okwate ebuguma y'enumi aha rw'ekihongo ky'enyatano y'obufu, n'empaya y'entama y'ekihongo ky'okwokibwa, byombili enzira kamogo, obihonge omu maisho g'Omukama.

³ Ogambire Abaisiraeli oti, ‘Mukwate empaya y'embuzi aha rw'ekihongo ky'enyatano y'obufu, enyana n'omwana gw'entama, byombili by'omwaka gumoi, enzira kamogo aha rw'ekihongo ky'okwokibwa,

⁴ enumi n'empaya y'entama aha rw'ebihongo by'emilembe, by'okutambira omu maisho g'Omukama, ekihongo ky'emyaka kitabirainwe n'amajuta, aha rw'enshonga kir'eki Omukama naija kubabonekera.’ ”

⁵ Ebyo Musa yaragiire babileta omu maisho g'Eihema ly'Omuterano, enteko yona egob'aho eyemelera omu maisho g'Omukama.

⁶ Musa agamba ati, “Eki nikyo kigambo eky'Omukama abahangiire kukora; Omukama arababonekera omu kitinwakye.”

⁷ Ashuba agambira Aroni ati, “Ija ahali alutare, ohonge ekihongo kyawe ky'enyatano y'obufu n'ekihongo kyawe eky'okwokibwa, oyegilire enyatano, iwe n'abantu. Kandi olete ekihongo ky'abantu obagilire enyatano, nk'okwo Omukama ahangire.”

⁸ Kityo Aroni agoba alutare, aita enyana y'ekihongo ky'enyatano y'obufu eyabaire egizirwe aha rwa wenene.

⁹ Abatabani bamuletera obwamba, abwibikamu orukumu abuteka aha mahembe ga alutare, kandi obwamba abushesha aha maguru gayo.

¹⁰ Kyonkai ebishaju n'ensigo n'ekiteko ky'eine, ebyarugire aha kihongo ky'enyatano y'obufu abyokeza ahali alutare, nk'okwo Omukama yabaire ahangiire Musa.

¹¹ Enyama n'oruhu abyokeza enjai y'orusisira.

¹² Aita n'ekihongo ky'okwokibwa, abatabani bamuheleza obwamba, abushaimulira alutare kugizingora.

¹³ Bamuhereza n'ekihongo ky'okwokibwa akachweka aha kandi, n'omutwe; abyokeza ahali alutare.

¹⁴ Ayogya amara n'ebilenge abyokejanyia n'ekihongo ky'okwokibwa.

¹⁵ Aho ahonga ekihongo ky'abantu, akwata embuzi y'ekihongo ky'enyatano y'obufu eyabaire egizirwe aha rw'abantu, agiita, agihonga aha rw'enyatano y'obufu nk'ekihongo ky'enyatano y'obufu ekya mbere.

¹⁶ Ahonga ekihongo ky'okwokibwa, mara akihonga kuhonderana n'ekiragiro.

¹⁷ Ahonga ekihongo ky'emyaka, akiyoraho ekikamato akyokeza ahali alutare, ekihongo ky'okwokibwa ekya bwankya kitabulimu.

¹⁸ Kwakwo aita enumi n'empaya y'entama, ekitambo ky'ebihongo by'abantu eby'emilembe. Abatabani bamuheleza obwamba, obwamba obwo abushaimulira alutare kugizingora.

¹⁹ Ebishaju by'enumi n'eby'empaya y'entama, ebishaju by'eikira, n'orushaju rw'amara, ensigo, n'ekiteko ky'eine,

²⁰ babitungika aha nkoro, babitwara byona alutare. Ebishaju Aroni abyokeza aha alutare,

²¹ kyonkai enkoro n'ekirumbu kya bulyo Aroni abichunkeza omu maisho g'Omukama, nk'okwo Musa yabaire aragiire.

²² Aho Aroni aimukya emikono ayolekeire abantu abaha omugisha. Kayamazire kuhonga ekihongo ky'enyatano y'obufu n'eky'okwokibwa n'ebihongo by'emilembe, asongoka.

²³ Musa na Aroni bataha omw'Ihema ly'Omuterano. Orwo baturukire baha abantu omugisha, N'Omukama omu kitinwakye abonekera abantu bona.

²⁴ Omuliro guzibuka omu maisho g'Omukama, gwokeza kimoi ekihongo ky'okwokibwa n'ebishaju ahali alutare. Orwo abantu bona baguboine, batamu enduru, bajumara ahansi.