Eby'abalevita 8 - Ebibulia 2001

Okutendekwa kwa Aroni n'abatabani

¹ Omukama agambira Musa ati,

² “Otware Aroni n'abatabani, aha mulyango gw'Eihema ly'Omuterano, otware n'ebijwaro, amajuta g'ousiiga, n'enumi y'ekihongo ky'enyatano y'obufu, empaya z'entaama ibili, entukuru y'emikate etatumbisiibwe.

³ Ahanyuma ohuruze enteko yona eterane aho.”

⁴ Musa akora nk'okwo Omukama yamuhangira, enteko agihuruliza aha mulyango gw'Eihema ly'Omuterano.

⁵ Agambira enteko egyo ati, “Ebyo ndikwija kukora nibyo Omukama yahanga.”

⁶ Aleta Aroni n'abatabani, abaanabisa n'amaizi.

⁷ Ajweka Aroni ekanzu, amukoma omuyondo, amujweka enyambarwa, amutaho n'efodi agimukomeranaho.

⁸ Amutaho akendo k'aha kifuba, kandi omu kendo atamu Urimu na Thumimu.

⁹ Amujweka ekilemba omu mutwe, n'aha kilemba omu maisho atekaho orukinga rw'ezahabu, kalinda ntakatifu nk'okwo Omukama yamuhangiire.

¹⁰ Aho Musa akwata amajuta g'okusiiga, agasiiga ekiikaro na byona ebyabaire bikilimu, abiha omugisha.

¹¹ Agandi agashaimulira alutare emirundi mushanju, na alutare agisiiga amajuta n'ebikwato byayo byona, orunabiro n'eichuba lyarwo, kubiha omugisha.

¹² Omutwe gwa Aroni agusheshaho amajuta, amukora amajuta amutendeka.

¹³ Akwata batabani ba Aroni abajweka enyambarwa, abakoma emiyondo, abajweka ekofira za bituli, nk'okwo Omukama yabaire amuhangiire.

¹⁴ Aho aleta enumi y'ekihongo ky'enyatano y'obufu; Aroni n'abatabani bagitaho emikono aha mutwe.

¹⁵ Musa agiita, akwata obwamba abutesa orukumurwe aha mahembe ga alutare kugizingora, ahasilira alutare. Obwamba abushesha aha amaguru ga alutare, agiha omugisha, agihasilira.

¹⁶ Akwata ebishaju byona ebyabaire bili aha mara, n'ekiteko ky'eine, n'ensigo zombili n'ebishaju byazo, Musa abyokeza ahali alutare.

¹⁷ Kyonkai enumi n'oruhu rwayo n'enyama zayo n'efo yayo abyokesa omuliro enjai y'orusisira, nk'okwo Omukama yabaire amuhangiire.

¹⁸ Aho aleta empaya y'entama y'ekihongo ky'okwokibwa, Aroni n'abatabani bagitaho emikono aha mutwe.

¹⁹ Musa agiita, obwamba abushaimulira alutare kugizingora.

²⁰ Orwo empaya y'entama yachebachebwirwe, agyokya hamoi n'omutwe gwayo n'ebishaju.

²¹ Kandi orwo yamazire kwogya amara n'ebilenge omu maizi, empaya y'entama yona agyokeza ahali alutare, kili kikaba kihongo ky'okwokibwa, akatachu akashemelera Omukama. Musa akakora ebyo Omukama yabaire amuhangiire.

²² Ahanyuma Musa aleta empaya y'entama endijo, ey'eitendeka. Aroni n'abatabani bateka emikono yabo aha mutwe gwayo.

²³ Musa agiita, aihyaho obwamba bwayo abuteka aha mbarakutwi ya Aroni eya bulyo, n'aha kyara kishaija eky'omukono gwa bulyo, n'aha kyara kishaija ky'okuguru kwa bulyo.

²⁴ Baleta batabani ba Aroni, Musa abatekaho obwamba aha mbarakutwi za bulyo n'aha byara bishaija by'emikono yabo eya bulyo n'aha byara bishaija by'amaguru gabo aga bulyo. Obwamba ashuba abushaimulira alutare kugizingora.

²⁵ Aho akwata ebishaju, n'ebishaju by'eikira, n'ebishaju byona ebyabaire bili aha mara n'ekiteko ky'eine, n'ensigo zombili n'ebishaju byazo, n'ekirumbu kya bulyo.

²⁶ Omu ntukuru y'omukate gutatumbisibwe eyabaire eli omu maisho g'Omukama, aihyamu ekeki emoi etaina itumbyo, n'omukate gumoi ogwinamu amajuta, n'echapati emoi, abiteka aha bishaju n'aha kirumbu kya bulyo;

²⁷ Byona ebi abikwasa Aroni n'abatabani, babichunkeza omu maisho g'Omukama.

²⁸ Ahanyuma abibatora, abyokejanyia n'ekihongo ky'okwokibwa ahali alutare kili kihongo ky'eitendeka, akatachu akashemelera Omukama.

²⁹ Musa akwata enkoro agichunkeza omu maisho g'Omukama. Enkoro egyo y'empaya y'entama y'eitendeka gwabaga mushondo gwa Musa. Ebyo akabikora nk'okwo Omukama yabaire amuhangiire.

³⁰ Aho Musa akwataho amajuta g'okusiiga n'obwamba obwabaire buli ahali alutare, abushaimulira Aroni n'ebijwarobye, n'abatabani kwakwo n'ebijwaro byabo. Kityo Aroni n'abatabani n'ebijwaro byabo aba nikwo abakuza atyo.

³¹ Musa agambira Aroni n'abatabani ati, “Muchumbire enyama aha mulyango gw'Eihema ly'Omuterano, mumare mugiliireho n'omukate oguli omu ntukuru y'ebihongo by'eitendeka, nk'okwo naragiire nti, ‘Eralibwa Aroni n'abatabani.’

³² Enyama erasigaraho n'omukate kwakwo mubyokese omuliro.

³³ Aha mulyango gw'Eihema ly'Omuterano mumareho ebiro mushanju, mutarugaho kuhika orwo ebiro by'okutendekwa kwanyu biragobelera, aha rw'okuba okubatendeka kuratwara ebiro mushanju.

³⁴ Nk'okwo byaba mbwenu, nikwo Omukama ahangire kabikorwa bityo kubagilira enyatano.

³⁵ Mwikare aha mulyango gw'Eihema ly'Omuterano ebiro mushanju kiro na mushana, nimukora eby'Omukama ahangire, mutaija mukafa; ahakuba nikwo mpangiirwe.”

³⁶ Aroni n'abatabani bakora ebintu byona eby'Omukama yahangiire omuli Musa.