Eby'abalevita 27 - Ebibulia 2001

Enyongelera

¹ Omukama agambira Musa ati,

² “Ogambire Abaisiraeli oti, Orwo omuntu arakoraga ekiragano aha Mukama kumutambira omuntu kuhonderana n'emilengere yawe,

³ aho omu emilengere egyo aha mushaija kwema ow'emyaka 20 kugoba ow'emyaka 60 zirabaga shekeli 50 z'efeza, kuhonderana n'eshekeli y'ahatakatifu.

⁴ K'omuntu arashangwaga ali mukazi emilengere yawe zibe shekeli 30.

⁵ K'omuntu arabaga ali w'okwema aha myaka etanu kugoba 20, emilengere yawe aha mushaija zibe shekeli 20, kandi k'ali mukazi zibe shekeli 10.

⁶ K'omuntu arabaga ali w'okwema aha mwezi gumoi kugoba emyaka etanu, emilengere yawe aha mushaija zibe shekeli itanu z'efeza, kandi aha mukazi emilengere yawe zibe shekeli ishatu.

⁷ K'omuntu arabaga ali w'emyaka 60 n'okutemba, aho emilengere yawe aha mushaija zibe shekeli 15, kandi aha mukazi zibe shekeli 10 z'efeza.

⁸ Omuntu arashangwaga ali munaku muno kutashashura kwo walenga, aho alete omuntu omu maisho g'omukuhani, n'omukuhani amulenge eiguzi kuhonderana n'obushobora bwa kiragana.”

⁹ “Kakiliba kili kitunganwa nk'eky'abantu bahongera Omukama, ekihongo kyona kyona ekyab'eki eky'omuntu wena wena ahongera Omukama kiba kitakatifu.

¹⁰ Atalitaho kintu kindi aha mwanya gwakyo, anga kukihinga ekirungi aha mwanya gw'ekibi, anga ekibi aha mwanya gw'ekirungi. Kandi kayakuhingishanyia ekitunganwa n'ekindi, aho byombili kyonene n'ekyo yagonza kugarura birabaga bitakatifu.

¹¹ Kakirabaga kili kitunganwa ekihagare kitahongerwa Mukama kihongo, aho omuntu alete ekitunganwa omu maisho g'omukuhani.

¹² Omukuhani akilebe nka kili kirungi anga kibi; nk'okwo iwe omukuhani olikilenga nilyo liliba iguzi lyakyo.

¹³ Kyonkai kayakuba nayenda kukichungura eiguzi alyongereho easilimia 20.”

¹⁴ “K'omuntu arahongeraga Omukama enjuye, omukuhani agilebe nk'eli nungi anga mbi; nk'okwo omukuhani aligilenga nikwo eliba.

¹⁵ Kigihonga kayakwenda kugichungura, agyongereho easilimia 20 z'eiguzi lyayo omu mahera, mara eliba ya wenene.”

¹⁶ “K'omuntu arahongeraga Omukama ekichweka ky'ensi eli ya wenene agisikire, aho emilengere yawe eiganirane n'embibo yakubibwamu. Homeri y'embibo y'eshayiri elengwe aha shekeli 50 z'efeza.

¹⁷ Kayakuhonga ensiye kwema aha mwaka gwa yubile, eiguzi ly'ensi egyo liliba nk'okwo olililenga.

¹⁸ Kyonkai kayakuhonga ensiye yubile ehoiremu, aho omukuhani alenge eiguzi lyayo omu mahera kuhonderana n'emyaka esigaire kwija kugoba aha mwaka gwa yubile kandi omu milengere yawe omushaliremu.

¹⁹ Kakihonga nsi yakwenda kugichungura, aho aha iguzi lyayo ayongereho easilimia 20 omu mahera, aho eikare eliye.

²⁰ Kyonkai k'aliba atenzire kugichungura, anga k'alishangwa ensi yagigulize omuntu ondijo, eliba etakichungurwa.

²¹ Kyonkai orwo ensi yataishulirwa omuli yubile, eliba ehongeirwe Omukama; omukuhani agilye.

²² K'alihongera Omukama endimiro ey'aguzire, etali kichweka kya nsiye ensikano,

²³ aho omukuhani alenge eiguzi lyayo kulemwa kugoba aha mwaka gwa yubile; omuntu ashashure eiguzi aha kir'ekyo, eiguzi elyo abe nilyo ahongera Omukama.

²⁴ Omu mwaka gwa yubile ensi egaruukire owo yaguzirweho, mukama wayo omu busika.

²⁵ Buli iguzi liganirane n'eshekeli y'ahatakatifu: eshekeli egire egera makumi gabili.”

²⁶ “Kyonkai omuzigaijo gw'ekitunganwa, orwo omuzigaijo guba gw'Omukama, omuntu tiyakuguhonga; ebe numi anga ntama, y'Omukama.

²⁷ Kakili kitunganwa ekihagare aho akichungulire aha milengere yawe, ashube akigelekeho easilimia 20 z'eiguzi lyakyo; anga kakitalikuchungurwa kiguzibwe nk'okwo omukuhani alikilenga.”

²⁸ “Kyonkai taliho kihongo eky'omuntu ahongera kimoi Omukama, kyona kyona omu bilibye, abe muntu anga kitunganwa, anga itakalye elisikano, kuguzibwa anga kuchungurwa. Buli ekyahongerwa Omukama kiba kitakatifu muno.

²⁹ Nangu n'omuntu ahongirwe atachungurwa bamwite.”

³⁰ “Egabo yona y'ebyezire, gwaba mwaka anga biraba bya miti, ekichweka kya ikumi ekyo ky'Omukama; mara kitakatifu.

³¹ K'omuntu aligira egaboye akenda kugichungura, agyongereho easilimia 20 z'eiguzi lyayo.

³² Kandi egabo yona erugire omu buhyo bw'ente n'omu buhyo bw'entaama, buli kitunganwa kya ikumi omuli bilinya ebilikubarwa omushumba kirabaga kitakatifu aha Mukama.

³³ Omuntu atalibaza nka kili kirungi anga kibi, nangu n'okukihingishanyia chei. Kayakukihingishanyia aho byombili kyonene n'ekyo yagonza kugarura birabaga bitakatifu; ekili kya 10 ekyo kitalichungurwa.”

³⁴ Egi niyo mihango ey'Omukama yahangiire Musa aha Ibanga lya Sinai kugambira Abaisiraeli.