Eby'abalevita 26 - Ebibulia 2001

Engwero

¹ “Mutalikora bishushani. Mutalyemeleza kishushani ekibaijano anga kusimba nyomyo. Ensi yanyu mutaligitamu bishushani bya mabare ebibaijano kubibandamira; n'inye Omukama Ruhanga wanyu.

² Mwekomye Sabato zange mushube mukunise ahatakatifu hange: N'inye Omukama.”

Emigisha

³ “Kamulikwata ebiragiro byange mukahikya emihango yange,

⁴ aho ndibaha enjura omu birumo byayo, ensi eyeze bingi; n'emiti omu ndimiro erabe.

⁵ Mulitera engano kulemwa kugoba aha inoga ly'ezabibu, n'einoga ly'ezabibu lilituruka aha kirumo ky'okulima engano. Mulilya mwigute, n'omu nsi yanyu mulituramu omu milembe.

⁶ Ensi ndigiha emilembe, mubyame, kandi taliho muntu alibatinisa. Ensi ndigihyamu ebikaaka kandi taliho muntu aligwerwa ndashana.

⁷ Mulibinga ababisha banyu, mubaise embanda.

⁸ Abatanu omuli inywe balibinga ekumi, n'ekikumi omuli inywe balibinga 10,000. Ababisha banyu mulibaisa embanda.

⁹ Ndibataho omutima, mbahe oruzaro mbakanyise. Ndihamisa endagano yange eyo nakozire nainywe.

¹⁰ Mulilya ekurukuru etura ebiikire, mushube mugihyemu kuha amagesha agahya omwanya.

¹¹ Nditura nainywe tindibaanagaho.

¹² Ndiikara nainywe, ndiba Ruhanga wanyu, nainywe muliba bantu bange.

¹³ Ninye Omukama Ruhanga wanyu, ayabaihire Misiri mutaba bairu babo; nahenda enkomo zanyu, nabagenza mwinugukire.

Emiraamo

¹⁴ “Kyonkai kamutampuliire, mutahikize mihango yange egi yona,

¹⁵ mukagaya ebiragiro byange, emigenzo yange mukagyanga, mukalemwa mukagoba aha kutahikya mihango yange, mukachwa endagano yange,

¹⁶ ndibagira nti: Ndibateza ekibonabonyio ky'ekibwangu, omushwija n'omushwago ebiita amaisho mwikye nimutuhikana. Ebyo mulilima bilibafera bushai bilibwe omubisha wanyu.

¹⁷ Ndibajumbira, babasinge. Ababanoba balibatwara, kandi mulisingwa okwo hataliho ababingire.

¹⁸ N'aha kamutampuliire, ndishuba mbabonabonyie emirundi mushanju nimbatura amafu ganyu.

¹⁹ Ndibachwa eishaija, eiguru ndishushanise ekyoma, kandi ensi ndigishushanisa omulinga.

²⁰ Amaani ganyu galifa bushai aha rw'okuba ensi telyeza bingi, n'emiti omu ndimiro teliraba biraba.”

²¹ “Kamulinshenga mukaburwa kumpulira, ndibaletera ebibundo ebishagiireho emirundi mushanju kwiganirana n'amafu ganyu.

²² Kandi ndibataishulira ebikaaka, bibaake abaana banyu, bite ebitunganwa byanyu, nainywe nywenene bibaite, nangu n'emihanda yanyu eigare.”

²³ “Omu bibundo ebi kamuliba mutangarukiire, mukanshenga,

²⁴ aho nanye ndibahinduka, inye nyenene mbabonabonyie emirundi mushanju nimbatura amafu ganyu.

²⁵ Ndibaisa embanda n'inyeholera endagano; kandi kamulyeshoroleza omu bigo byanyu ndibateza endwara, mara muligwa omu mikono y'ababisha banyu.

²⁶ Orwo ndibamaraho ekyakulya ekibatunga, abakazi ikumi balyokeza emikate omu kyoto kimoi; bagihyemu nibagipimira aha minzani. Mulilya kyonkai timuliguta.”

²⁷ “N'aha kamutampuliire mukanshenga,

²⁸ aho nanye ndibahinduka n'akanihi, mbabonabonyie inye nyenene emirundi mushanju nimbatura amafu ganyu.

²⁹ Mulilya batabani banyu mulye na bahara banyu.

³⁰ Aha mabanga eiguru mbali munfukamira ndihasilikya, nkambure na alutare zanyu z'obunuma, emitumbi yanyu ngijugunye aha mitumbi y'ebishushani byanyu, mbanobe.

³¹ Ebigo byanyu ndibisilikya, n'ahatakatifu hanyu mpahindure ndaara, n'ebishushani byanyu eby'akataachu karungi tindibikunda.

³² Inye ensi yanyu ndigita omwebura, n'ababisha banyu abaligituramu baligishoberwa.

³³ Na inywe ndibaanaganaga omu mahanga, muligenda mbahondeize embanda. Ensi yanyu eliba ndaara, n'ebigo byanyu bilisigara amatongo.”

³⁴ “Orwo muliba muli omu buzahe omu babisha banyu, ensi yanyu eliba eli ndaara, ehumure telilimwa.

³⁵ Omwanya gwona orwo eliba eli ndaara eliba ehumwire emihumulire eyo mutakugihaire mugilimu.

³⁶ Abaliba bazahiire omu nsi z'ababisha babo; ndibatinisa. Kabalihulira akababi akalikutwarwa omuyaga baliruka, mara baliruka okw'obona omuntu nairuka endashana, baragwaga omuntu atababingire.

³⁷ Baligwerangana oti nibairuka endashana, okwo hataliho ababingire; kandi timuligira maani ga kwemelera mu maisho ga babisha banyu.

³⁸ Muligwa omu buzahe, ensi y'ababisha banyu elibamira.

³⁹ Abalisigaraho baligwa omu nsi z'ababisha banyu nibazira entambara zabo; balifa nka baishebo.”

⁴⁰ “Kyonkai kabalyeshubaho bakechuza entambara zabo n'eza baishebo aha rw'okunshenga n'okunsimbalira,

⁴¹ nkagoba aha kubahwamu nkabaleta omu nsi y'ababisha babo, kabalyetohya bakalekera okugumangana emitima,

⁴² aho ndijuka endagano yange eyo nakozire na Yakobo, na Isaka na Aburahamu, nyijuke n'ensi egyo.

⁴³ Kyonkai ensi baligisigaho, ehumure etalimirwe, ebiro byona orwo eliba eli ndaara bagirugemu. Balyechuza aha rw'entambara zabo, aha rw'okuba baliba bangisize ekyeju emigenzo yange n'ebiragiro byange.

⁴⁴ N'orwo kiliba kili kityo, orwo baliba bali omu nsi y'ababisha babo, tindibaanaga bwoli anga kubatamwa kugoba aha kubasilikya limoi limoi n'okuchwa endagano yange eyo nakozire nabo. Aha rw'enshonga n'inye Mukama Ruhanga wabo.

⁴⁵ Ekiliho aha rwa bonene ndijuka endagano eyo nakozire na baish'enkurubo, abo naihire Misiri amahanga nigabona, kambona kuba Ruhanga wabo: N'inye Omukama.”

⁴⁶ Ebi nibyo biragiro n'emigenzo n'amateka eby'Omukama yahaire Abaisiraeli omu kanwa ka Musa aha Ibanga lya Sinai omu.