Eby'abalevita 25 - Ebibulia 2001

Emyaka mitakatifu

¹ Omukama agambira Musa aha Ibanga lya Sinai ati,

² “Ogambire Abaisiraeli oti, Kamulitaha omu nsi eyo ndikubaha, buli mwaka gwa mushanju ensi etalilimwa.

³ Emyaka mukaga mubibe endimiro zanyu, mugomolere emizabibu yanyu, mugeshe, munoge n'ezabibu,

⁴ kyonkai omwaka gwa mushanju gube Sabato y'ekyosi, ensi ehumure, ni Sabato y'Omukama. Omu mwaka gwa mushanju mutalibiba ndimiro zanyu anga kugomolera mizabibu.

⁵ Ebilyemeza mbali mugesire mutalibigesha, nangu n'omuzabibu gwawe ogutagomoleirwe otaligunogaho zabibu. Omwaka gwa mushanju gw'ekyosi, ensi ehumure.

⁶ Eby'ensi elyeza omu mwaka gw'ekyosi nikyo kiliba kyakulya kyawe, iwe wenene n'omwiru wawe, n'omuzana wawe, n'omupakasi wawe, n'omwizi atwire omwawe,

⁷ n'ebitunganwa byawe kutyo n'ebigunju bili omu nsi yanyu. Byona eby'ensi elyeza nibyo biliba byakulya byanyu.”

Omwaka gwa Yubile

⁸ “Mubare Sabato mushanju z'emyaka, niyo myaka mushanju emirundi mushanju, mubone kugobya emyaka makumi ganai na mwendai.

⁹ Aho aha kiro kya ikumi ky'omwezi gwa mushanju oyatangure enzamba; ekiro ky'enyatano mwatangure amakondere omu nsi yanyu yona; ekyo kiliba kiro ky'enyatano.

¹⁰ Mwekomye omwaka gwa makumi gatanu, mara murangire abanyansi bona obwegeleere omu nsi yona. Ebe yubile yanyu, orwo inywena buli omoi alikugaruka omu butakabwe n'omu banyarugandabe.

¹¹ Omwaka ogwo gwa makumi gatanu gube gwa yubile yanyu. Omwaka ogwo mutalibiba anga kugesha byemeza, handiki emizabibu etagomoleirwe kuginogaho zabibu.

¹² Aha rw'okuba ni yubile; gube mwaka gwanyu ogutakatifu; omu mwaka ogwo mulye eby'endimiro zilyeza kushai zitalimirwe.”

¹³ “Omu mwaka ogu gwa yubile, inywena buli omoi agaruke omu butakabwe.

¹⁴ K'oliguza Omwisiraeli mutahi wawe ensi anga okagimuguraho mutaligobezangana.

¹⁵ Mugulirane omw'iguzi elisaine ebyakushobora kweramu omu myaka elikuba esigaireyo kwija kugoba omwaka gwa jubili.

¹⁶ K'emyaka eliba eli nyingi aho otembese eiguzi, k'emyaka eliba eli mike aho osongore eiguzi, ahakuba nakuguza kuhonderana n'ebyakushobora kweramu.

¹⁷ Mutaligobezangana, ekiliho muntine; aha rw'enshonga n'inye Omukama Ruhanga wanyu.”

Obubi bw'omwaka gwa mushanju

¹⁸ “Aha rw'ekyo muhikye ebiragiro byange n'emigenzo yange, mubigobesheleze, aho ensi muligitura omu milembe.

¹⁹ Elyeza emyaka mulye mwigute, mugiture omu milembe.

²⁰ Kamuligamba muti, ‘Turalyaki omu mwaka gwa mushanju katutalimire tukagesha?’

²¹ Omukama aliha ensi omugisha omu mwaka gwa mukaga, eyeze ebyakulya by'emyaka eshatu.

²² Orwo mulibiba endimiro zanyu omu mwaka gwa munana, muliba mukyalya ebyo mulishangwa mwelize omu mwaka gwa mukaga mara bilibagobya omu mwaka gwa mwendai.”

Okugarura ebintu

²³ “Ensi otaligiguliza kimoi aha rw'okuba eba yange. Inywe nimushusha abaizi abajubwirwe kugikoza kushai.

²⁴ Orwo ensi yaguzibwa, mukama wayo ow'obubere asaine kugigura akagyegarukana, akagichungura.

²⁵ “Kamurumuna wawe alinakwara akaguzaho omwate, aho omunyaruganda amuli haihi aije achungure omwate ogw'omurumuna agulize.

²⁶ K'omuntu ataina wa kuguchungura, kandi wena wena akaija akatunga akabona ebimazire kuguchungura,

²⁷ abare emyaka kwema agugulize, ashashure omuntu owo yagugulize ebiganiraine n'emyaka esigaireyo, amare agaruke omu butakabwe.

²⁸ Kyonkai k'aliba ataina bimazire kuguchungura gukamugarukira, aho ebyo yagulize bikare omu mikono ya kigura kulemwa kugoba aha mwaka gwa yubile; omuli yubile omwate gutaishurwe, aho agaruke omu butakabwe.”

²⁹ “K'omuntu aliguza enju y'okuturamu eli omu kigo ky'eboma, yakugichungura omwaka gwahoire kwema agigulize; omwaka gwona arabaga aina ehaki y'okugichungura.

³⁰ K'omwaka gwona gurahwaga etachungwirwe, aho enju eli omu kigo kye'eboma elimanyika ebiro byona okwo eli ya kigigura. Amakiro gona eliba etakitaishurwa muli yubile.

³¹ Kyonkai amaju g'omu byaro ebitaina boma, galishusha endimiro. Gakuchungurwa mara gataishurwe omuli yubile.

³² Kyonkai kandi ebigo by'Abalevita, amaju ag'omu bigo ebili byabo, Abalevita abakugachungura akanya kona kona.

³³ K'Omulevita wena wena yakuba atakolize haki ya wenene ya kugichungura, aho enju eguziibwe omu kigo kyabo etaishurwe omuli yubile, aha rw'enshonga amaju agali omu bigo by'Abalevita gaba gabo limoi limoi omu Baisiraeli.

³⁴ Kyonkai ensi eyataine ebigo byabo etaliguzibwa, aha rw'enshonga nsi yabo ebiro byona.”

Kuhora omunaku

³⁵ “Kamurumuna wawe akulebire alinakwara akalemwa kwegoba iwe omumanye. Ature naiwe okwobon'omugenyi anga omwizi.

³⁶ Otamwihyaho magoba anga kumutembeka, ekiliho otine Ruhanga wawe; nirwo murumuna wawe alituranwa naiwe.

³⁷ Otalimuhora mahera kumugoborora, handiki kumuha kyakulya kumubonaho magoba.

³⁸ Ninye Omukama Ruhanga wawe ayabaihire omu nsi ya Misiri kubaha ensi ya Kanaani, kandi mbone kuba Ruhanga wanyu.”

Kutaishura abairu

³⁹ “Kamurumuna wawe owo mutwire hamoi alinakwara akakweguza, otalimukoza nka mwiru.

⁴⁰ Aikare naiwe nk'omupakasi n'omwizi. Akukolere kulemwa kugoba omwaka gw'eyubile.

⁴¹ Aho akurugeho, wenene n'abaanabe abo aliba ainabo, ashube omu butakabwe obwa baishenkuru.

⁴² Aha rw'okuba bonene bairu bange abo naihire omu nsi ya Misiri; bataliguzibwa nka bairu.

⁴³ Otalimutwaza maani, ekiliho otine Ruhanga wawe.

⁴⁴ Kandi tugambe kawakwetaga abairu n'abazana, wakubagura omu mahanga agakwataine.

⁴⁵ Kwakwo mwakugura n'abaana omu bagenyi ababafurukiiremu. Abaana nk'aba abazaliirwe omu nsi yanyu bakuba itunga lyanyu.

⁴⁶ Mwakubasikisa batabani banyu babakolera orwo bakyarora. Mwakubaindura bairu, kyonkai barumuna banyu Abaisiraeli mutalibatungama aha mutwe, omuntu kutwara ondijo rwamaani.”

⁴⁷ “K'omugenyi anga omwizi alikuturanwa naiwe yakutunga, kandi murumuna wawe alikuturanwa naiwe akanakwara, nangu akeguza aha mugenyi anga omwizi alikuturanwa naiwe, handiki akeguza aha munyaruganda w'omugenyi,

⁴⁸ aho kayakuba yaguziibwe yakuchungurwa. Omoiho omu banyaruganda yakumuchungura,

⁴⁹ yaba ishento anga omurumuna wa ishento, anga ali munyaruganda wabo yakumuchungura, handiki wenene kayakutunga yakwechungura.

⁵⁰ Ayeme n'ogwo ayamuguzire, babare kwema omwaka ogwo yamwehongeireho kuhika omwaka gw'eyubile, aho eky'okwechunguza kihonderane n'orubara rw'emyaka. Omwanya ogwo yamazire na mukamawe gulebwe nk'omwanya gw'omupakasi.

⁵¹ Kahaliba hakyaliyo emyaka nyingi, kuhonderana n'orubara rwayo agarure ekichweka ky'eiguzi lyamuguzire ayechungure.

⁵² Kyonkai kahaliba hasigairweyo emyaka mike kwija kugoba omwaka gwa yubile, ayeme hamoi na mukamawe babare; babone agarureki kushobora kwechungura, kuhonderana n'orubara rw'emyaka y'obupakasi eliba esigaire.

⁵³ Ature nawe nk'omupakasi w'omwaka gumoi. Olileba atalimutwaza maani.

⁵⁴ K'aliba atachunguziibwe ebi, aho ataishurwe omu mwaka gw'eyubile, wenene n'abaanabe ab'aliba ainabo.

⁵⁵ Aha rw'okuba Abaisiraeli baba bairu bange abo naihire omu nsi ya Misiri: N'inye Omukama Ruhanga wanyu.”