Eby'abalevita 23 - Ebibulia 2001

Ebiro bikuru by'edini

¹ Omukama agambira Musa ati,

² “Ogambire Abaisiraeli oti, Ebiro bikuru by'Omukama ebitairweho ebyo muraranga okwo bili nteko zitakatifu, niby'ebi:

³ Emilimo ekorwe ebiro mukaga; ekya mushanju ni Sabato, kiro ky'ekyosi, nteko ntakatifu, mutakora mulimo; ni Sabato y'Omukama omu matura ganyu gona.

⁴ Ebi nibyo biro bikuru by'Omukama ebitairweho, by'enteko zitakatifu, ebyo muraranga aha kanya kabyo akatairweho.”

Pasika n'emikate etatumbisiibwe

⁵ “Bwaigoro bw'ekiro kya ikumi na binai ky'omwezi gwa mbere, nikyo kiro kya Pasika y'Omukama.

⁶ Aha kiro kya ikumi na bitanu ky'omwezi gwonene, kiro kikuru ky'Omukama ky'emikate etatumbisiibwe. Mulita kugilya ebiro mushanju.

⁷ Aha kiro kya mbere mugire enteko ntakatifu; mutalikora mulimo gwa kachwazikano.

⁸ Ebiro mushanju byona muhongere Omukama ekihongo ky'okwokibwa. Aha kiro kya mushanju nteko ntakatifu, mutalikora mulimo gwa kachwazikano.”

⁹ Omukama agambira Musa ati,

¹⁰ “Ogambire Abaisiraeli oti, Orwo murataha omu nsi eyo ndikubaha, mukagesha n'ebiraba byayo, muleterega omukuhani omuganda gw'engano eyo muligesha eli ya mbere.

¹¹ Omuganda ogwo araguchunkeza omu maisho gange nirwo ndibakunda. Omukuhani araguchunkezaga bukeire bwa Sabato.

¹² Kir'ekyo murachunkezaga omuganda, muhongere Omukama akapaya k'omwana gw'entama k'omwaka gumoi obuzira kamogo, ekihongo ky'okwokibwa.

¹³ Hamoi n'ekyo mwongereho ekihongo ky'emyaka ekilo ibili z'ensano enungi etabiraine n'amajuta, ky'okuhongera Omukama kyokesiibwe omuliro. Akatachu kakyo kanshemelera inye Omukama. Muteho n'ekihongo ky'okunywa eky'edivai, elita emoi.

¹⁴ Mutalilya mugate anga mbugirwa zibabwirwe anga zili zibisibisi kuturuka kiro kyonene eki orwo mulihongera Omukama mukamuganuza. Kiragiro ky'eirai lyona omu mizarwa yanyu omu matura ganyu gona.”

Ekiro kikuru ky'eigesha

¹⁵ “Kandi mubare amalimansi mushanju agagobire kwema kiro ekyo muliba muleteireho omuganda gw'ekihongo ky'okuchunkeza.

¹⁶ Mubare ebiro makumi gatanu kuturuka bukeire bwa Sabato ya mushanju aho muhongere Omukama ekihongo ky'emyaka emihya.

¹⁷ Buli ka mugire emiganda ebili ey'okuchunkeeza, buli gumoi gukorwe omu kilo ibili z'ensano nungi, ensano egyo ekandiranwe n'eitumbyo mugihongere Omukama kumuganuza.

¹⁸ Emigate egyo mugihongerane n'obwana mushanju bw'entaama obw'omwaka gumoi obutaina kamogo, n'enumi ento emoi n'empaya z'entama ibili. Bihongerwe Omukama ekihongo ky'okwokibwa, kigende n'ekihongo kyabo ky'emyaka n'ebihongo byabo eby'okunywa. Ekihongo eki ky'okwokibwa akatachu kakyo kanshemelera inye Omukama.

¹⁹ Kandi muhonge empaya emoi y'embuzi ekihongo ky'enyatano y'obufu, n'empaya ibili z'obwana bw'entaama bw'omwaka gumoi mugitambe ekitambo ky'emilembe.

²⁰ Omukuhani abihonge hamoi n'emikate y'okuganuza, kihongo ky'okuchunkeza omu maisho g'Omukama hamoi n'obwana bubili bw'entaama, eby'okuhongera Omukama bitakatifu mara bibe by'abakuhani.

²¹ Aha kiro kyonene murange okwo muragira enteko ntakatifu; mutalikora mulimo gwa kachwazikano. Kiragiro ky'eirai lyona omu mizarwa yanyu omu matura ganyu gona.”

²² “Kamurageshaga emisiri yanyu, otaligesha ndimiro kugituruka mu mperero bwoli. Kandi otalimara kugesha okashubamu kurondarondamu ebisigairemu. Ebyo obilekeremu omunaku n'omwizi: N'inye Omukama Ruhanga.”

Ekiro kikuru ky'omwaka guhya

²³ Omukama agambira Musa ati,

²⁴ “Ogambire Abaisiraeli oti, Aha kiro kya mbere ky'omwezi gwa mushanju, mwekomye ekiro ky'ekyosi. Habeho enteko ntakatifu; ekiro kikuru ekyo kirangwe amakondere.

²⁵ Mutalikora mulimo gwa kachwazikano. Kandi muhongerega Omukama ekihongo ky'okwokesa omuliro.”

Ekiro ky'enyatano

²⁶ Omukama agambira Musa ati,

²⁷ “Aha kiro kya ikumi ky'omwezi ogu gwa mushanju kiro ky'enyatano. Ahali inywe kabe kashango k'okugira enteko ntakatifu, mweshase kandi muhongere Omukama ekihongo ky'okwokesa omuliro.

²⁸ Aha kiro kyonene eki mutalikora mulimo, ahakuba kiro ky'enyatano, kubatilira aha Mukama Ruhanga wanyu.

²⁹ Enshonga omuntu aliba ateshasize aha kiro kyonene eki balimuchwa omu babo.

³⁰ Kandi wena wena alikora omulimo aha kiro kyonene eki, omuntu ogwo ndimusilikya achweke omu ba wenene.

³¹ Mutalikora mulimo: Kiragiro ky'eirai lyona omu mizarwa yanyu omu matura ganyu gona.

³² Erabaga Sabato yanyu y'ekyosi, mara mweshasega. Kwema bwaigoro bw'ekiro kya mwendai ky'omwezi ogwo kuturuka bwaigoro bunu mwekomye Sabato zanyu.”

Ekiro kikuru ky'ensisira

³³ Omukama agambira Musa ati,

³⁴ “Ogambire Abaisiraeli oti, Aha kiro kya ikumi na bitanu by'omwezi ogu gwa mushanju kiro kikuru ky'Omukama ky'ensisira. Kitware ebiro mushanju.

³⁵ Aha kiro kya mbere habeho enteko ntakatifu; mutalikora mulimo gwa maani.

³⁶ Ebiro mushanju muhongere Omukama ebihongo by'okwokesa omuliro. Aha kiro kya munana mushube mugire enteko ntakatifu, mara muhongere Omukama ekihongo ky'okwokesa omuliro. Kiro ky'enteko ntakatifu, mutalikora mulimo gwa kachwazikano.”

³⁷ “Ebi nibyo biro bikuru by'Omukama ebitairweho ebyo muraranga kabuba bushango bw'enteko ntakatifu bw'okuhongera Omukama ebihongo by'okwokesa omuliro, n'ebihongo by'emyaka, ebitambo n'ebihongo by'okunywa, buli kimoi aha kiro kyakyo;

³⁸ Sabato z'Omukama zitabulimu, n'egabo zanyu zitabulimu, n'ebihongo byanyu byona by'endagano bitabulimu, n'ebihongo byanyu by'obweyendezi bitabulimu, ebyo mulikugabira Omukama.”

³⁹ “Aha kiro kya ikumi na bitanu ky'omwezi gwa mushanju, orwo mulishangwa mwagesire endimiro zanyu, mwekomyega ekiro kikuru ky'Omukama ebiro mushanju. Ekiro kya mbere kibega ky'ekyosi, kumoi n'ekya munana.

⁴⁰ Ekiro kya mbere mukwate ebiraba by'emiti kaliza, amatagi g'emikindo, n'ag'emiti emihango, n'obuti bw'aha bwiga; mushanduke omu maisho g'Omukama Ruhanga wanyu ebiro mushanju.

⁴¹ Mukyekomye okwo kili kiro kikuru ky'Omukama ky'ebiro mushanju omu mwaka. Kiragiro ky'ebiro byona omu mizarwa yanyu; mukyekomyega omu mwezi gwa mushanju.

⁴² Abaisiraeli inywena mulimara ebiro mushanju omu nsisira,

⁴³ nirwo baijukuru banyu balimanya okwo mbatwize omu nsisira orwo mbaire nabaihire Misiri: N'inye Omukama Ruhanga wanyu.”

⁴⁴ Nikwo Musa yagambiire atyo Abaisiraeli ebiro bikuru by'Omukama ebitairweho.