Eby'abalevita 19 - Ebibulia 2001

Emiku y'obutakatifu n'amazima

¹ Omukama agambira Musa ati,

² “Ogambire enteko yona y'Abaisiraeli oti, Mube batakatifu aha rw'enshonga inye Omukama Ruhanga wanyu ndi mutakatifu.

³ Buli omoi akunire ishe na nyina, mara mwekomye Sabato zange: N'inye Omukama Ruhanga wanyu.

⁴ Mutaligya aha bishushani anga kuhesha baruhanga; n'inye Omukama Ruhanga wanyu.

⁵ Kamurahongeraga Omukama ekitambo ky'ebihongo by'emilembe, mukihonge omu mihongere eyo murashobora kwikilizibwa.

⁶ Kilibwe kiro kyonene kyonene orwo mwakihonga, anga bukeire. Ekilisigaraho kugoba ekiro kya kashatu kyokibwe.

⁷ Kakiliziza kulibwa aha kiro kya kashatu kyabaire muziro, tikilikundwa.

⁸ Buli omoi alikilya alyeletera entambara, aha rw'okuba yahagaza ekitakatifu ky'Omukama; mara omuntu ogwo bamuchwe omu babo.”

⁹ “Kamurageshaga amagesha g'ensi yanyu, otaligesha musili gwawe kugugobya mu mperero bwoli. Nangu n'eby'oliba osigiremu otalibishombokya.

¹⁰ Kandi endimiro yawe y'emizabibu otaligigesha okagimaramu birondarondo. N'eziliba ziragaire otalizirondaronda Ozilekere omunaku n'omufuruki: N'inye Omukama Ruhanga wanyu.”

¹¹ “Mutaliiba anga kubeiya, handiki kubeiyangana.

¹² Mutalinahira bishuba mukajuliza ibara lyange, kityo okahagaza eibara lya Ruhanga wanyu: N'inye Omukama.”

¹³ “Otalibonesa mutahi wawe naku anga kumunyaga. Empera y'omupakasi otalirara nayo kuturuka bwankya.

¹⁴ Otalihera mwigazi wa matwi anga mpume anga kumutega eky'okumusiitaza, ekiliho otine Ruhanga wawe: N'inye Omukama.”

¹⁵ “Mutalikora bitali bya mazima mw'iramu; otaligilira munaku kigonzi handiki kwegongosheleza omuhango, ekikuru mutahi wawe omuramuze amazima.

¹⁶ Otaliruga oku nogya oku nosimanganisa abawe emitwe, nangu n'okwosa mutahi wawe: N'inye Omukama.”

¹⁷ “Otalinoba murumuna wawe aha mutima. Ekiliho mutahi wawe omugambire omwatulire, otaija okakwatwa entambara aha rwa wenene.

¹⁸ Otalyehoroza anga kugilira bantu ba ihanga lyawe nzigu. Ogonzega mutahi wawe nka iwe wenene: N'inye Omukama.”

¹⁹ “Mwekomye ebiragiro byange. Otalikunda bitunganwa byawe kwemyangana na bya ruganda rundi. Otalibiba ngeli ibili za mbibo mu ndimiro yawe. Kandi otalijwara mwendo gushonirwe mu ngeli ibili za bitambara.”

²⁰ “K'omushaija arabyamaga n'omuzana ensholeke ya mushaija ondi mara atakachungwirwe anga kutaishurwa, bamanyuruze. Batabaita, aha rw'okuba omukazi yaba atali mwegeleere.

²¹ Kyonkai omushaija aletere Omukama ekihongo ky'enyatano y'obufu, akilete aha mulyango gw'Eihema ly'Omuterano. Agire empaya y'entama y'ekihongo ky'enyatano y'entambara.

²² Omukuhani amwatililire n'empaya y'entama y'ekihongo ky'enyatano y'entambara omu maisho g'Omukama aha rw'entambara eyo akozire; mara entambara eyo akozire aligigarulirwa.”

²³ “Kamulitaha omu nsi elinya mukabyara emiti y'engeli zona y'ebyakulya, aho ebiraba byayo mubibone nk'ebiherano, mulibitangwa emyaka eshatu, bitalilibwa.

²⁴ Omu mwaka gwa kanai ebiraba byayo byona birabaga bitakatifu, ekihongo ky'okuhaisiliza Omukama.

²⁵ Kyonkai omu mwaka gwa katanu mwakulya ebiraba byayo, nirwo mulirabisa ebishagiireho: N'inye Omukama Ruhanga wanyu.”

²⁶ “Mutalilya nyama yona yona einamu bwamba. Mutaliragura anga kuroga.

²⁷ Mutalishara memba anga kushara bileju kubilengya.

²⁸ Mutalyesharashara mibili yanyu kuchulira abafire anga kwetera ndindi zona zona, n'inye Omukama.”

²⁹ “Otalihagaza muhara wawe kumuteza bumalaya, ensi etaija ekatera bumalaya kandi ekaijurwa amafu.

³⁰ Mwekomye Sabato zange mara mukunire ahatakatifu hange: N'inye Omukama.”

³¹ “Mutaligya aha batungamiirwe bazimu anga barogi; mutalibagyaho bakabahagaza: N'inye Omukama Ruhanga wanyu.”

³² “Kamurabonaga omugurusi mwemelere, mukunire obugurusibwe, mara otinega Ruhanga wawe: N'inye Omukama.”

³³ “K'omwizi alitura naiwe omu nsi yawe otalimukora kubi.

³⁴ Omufuruki alikutura naiwe akushanire omuzarwa wanyu, mara omugonze nk'okwo iwe olikwegonza; aha rw'okuba nainywe mukaba muli bafuruki omu nsi ya Misiri: N'inye Omukama Ruhanga wanyu.”

³⁵ “Mutalitaza mw'iramu, omu bipimo eby'oburai anga eby'obusikiizi anga eby'obungi.

³⁶ Mukoze ebipimo eby'amazima, amabare g'amazima, efa y'amazima n'elita y'amazima: N'inye Omukama Ruhanga wanyu, ayabaihire omu nsi ya Misiri.

³⁷ Mwekomye ebiragiro byange byona, n'emigenzo yange yona, mubihikye: N'inye Omukama.”