Eby'abalevita 16 - Ebibulia 2001

Ekiro ky'enyatano

¹ Orwo batabani ba Aroni bahongeire Omukama omuliro gulikuzira akabaita,

² Omukama agambira Musa ati, “Ogambire Aroni murumuna wawe ataziza kutaha mu mwanya gutakatifu omu rutimbe, omu maisho g'entebe y'obuganyizi eli aha sanduku, ataija akafa; aha rw'okuba ndabonekera omu kichwi eiguru y'entebe y'obuganyizi egyo.

³ Ekiliho, Aroni atahe ati omu mwanya gutakatifu: Aije n'ebuguma y'enumi y'ekihongo ky'enyatano y'obufu n'empaya y'entama y'ekihongo ky'okwokibwa.

⁴ Ajware enyambarwa ntakatifu ya kitani, n'esuruale ya bukondo, ayekome omuyondo gwa kitani, n'ekilemba kya kitani, ebi nibyo bijwaro ebitakatifu. Kwija kubijwara abanze ayoge.

⁵ Omu nteko y'Abaisiraeli aihyemu empaya z'embuzi ibili z'ekihongo ky'enyatano y'obufu, n'empaya y'entama y'ekihongo ky'okwokibwa.”

⁶ “Aroni ahonge enumi y'ekihongo ky'enyatano y'obufu aha rwa wenene, ayeyatilire wenene n'enjuye.

⁷ Aho akwate embuzi zombili, aziteke omu maisho g'Omukama aha mulyango gw'Eihema ly'Omuterano.

⁸ Aho Aroni atomelere embuzi zombili; eitomelera limoi ly'Omukama, eitomelera elindi lya Azazeli.

⁹ Aroni alete embuzi eyatomelerwa ekaba y'Omukama, agihonge ekihongo ky'enyatano y'obufu;

¹⁰ Kyonkai embuzi eyatomelerwa ekaba ya Azazeli eletwe nerora omu maisho g'Omukama kugigiliraho enyatano, ebone kutaishulirwa omw'irungu egye owa Azazeli.”

¹¹ “Aroni atambe enumi ekihongo ky'enyatano y'obufu aha rwa wenene, ayeyatilire wenene n'enjuye. Aite enumi ekihongo ky'enyatano y'obufu aha rwa wenene.

¹² Akwate ekyotezo ky'amakara g'omuliro aga alutare eli omu maisho g'Omukama n'ebikamato bibili by'obunuuma bilikunukage obuseirwe kurungi; akitahye omu rutimbe.

¹³ Obunuma abuteke omu muliro omu maisho g'Omukama, nirwo omwika gulikwera gw'obunuma gurashweka entebe y'obuganyizi eli aha Sanduku y'Endagano, atalija akafa.

¹⁴ Aihyeho obwamba bw'enumi, abushaimuze orukumurwe emirundi mushanju omu maisho g'entebe y'obuganyizi.”

¹⁵ “Aho aite embuzi y'ekihongo ky'enyatano y'obufu ey'abantu, atahye obwamba bwayo omu rutimbe, abugire nk'okwo yagira obw'enumi; abushaimulire entebe y'obuganyizi eiguru n'omu maisho g'Esanduku y'Endagano.

¹⁶ Nikwo arayatilira atyo omwanya gutakatifu aha rw'obuhagare bw'Abaisiraeli, n'aha rw'enshonga y'entambara zabo, amafu gabo gona; kutyo abe nikwo agilira atyo Eihema ly'Omuterano elili omu rusisira rwabo omu kuhagara kwabo.

¹⁷ Hatakubamu muntu omw'Ihema ly'Omuterano orwo aratahamu kwatilira omwanya gutakatifu kuturuka orwo arashohora yamazire kugira enyatano aha rwa wenene wenene n'aha rw'enjuye n'aha rw'enteko yona ya Isiraeli.

¹⁸ Aho ashohore aije alutare eli omu maisho g'Omukama agyatilire. Aihyeho obwamba bw'enumi n'obw'embuzi, abuteke aha mahembe ga alutare kugizingora.

¹⁹ Agishaimulire obwamba nabushaimuza orukumurwe emirundi mushanju, agihasilire, agihyeho obuhagare bw'Abaisiraeli.”

Embuzi y'okwetweka entambara

²⁰ “Orwo Aroni araba yamazire kwatilira omwanya gutakatifu n'Eihema ly'Omuterano na alutare, alete embuzi elikurora.

²¹ Ateke emikonoye yombili aha mutwe gw'embuzi elikurora, agigambireho ebibi byona by'Abaisiraeli n'entambara zabo zona, amafu gabo gona; abiteke aha mutwe gw'embuzi, agitaishulire omw'irungu agikwasize omuntu atekatekirwe.

²² Embuzi erayetweka ebibi byabo byona egiire omw'irungu, abe niyo agitaishulira.”

²³ “Aho Aroni atahe omw'Ihema ly'Omuterano, ajure ebijwaro bya kitani ebyo yaba ajwete orwo yataha omu mwanya gutakatifu, abisigemu.

²⁴ Ayogere omu mwanya gutakatifu, ajware ebijwarobye, ashohore, ahonge ekihongokye eky'okwokibwa n'ekihongo ky'okwokibwa eky'embaga; ayeyatilire n'okwatilira embaga.

²⁵ Ebishaju by'ekihongo ky'enyatano y'obufu abyokeze eiguru ya alutare.

²⁶ N'ayataishulira Azazeli embuzi afure emyendoye amare ayoge, aho nirwo yakutaha omu rusisira.

²⁷ Kandi enumi y'enyatano y'obufu n'embuzi y'enyatano y'obufu eby'obwamba bwabyo bwatekwa omunda kugira enyatano omu mwanya gutakatifu, zishohozibwe enjai y'orusisira. Empu zazo n'enyama zazo n'amashai gazo byokesibwe omuliro.

²⁸ N'ogwo arabyokya afure emyendoye ashube ayoge, aho nirwo yakutaha omu rusisira.”

Enyatano ya buli mwaka

²⁹ “Kibe kiragiro ky'eirai lyona ahali inywe okwo aha kiro kya ikumi omu mwezi gwa mushanju, mweshase, mara mutakora mulimo, alikaba mutaka anga mwizi arabafurukiragamu.

³⁰ Aha rw'okuba kir'eki muragilirwaga enyatano kubahasilira; mwere omu maisho g'Omukama, muruge omu mafu ganyu.

³¹ Ni Sabato nkuru y'ekyosi, nainywe mweshase, kiragiro ky'eirai lyona.

³² Omukuhani enkorwa majuta mara atendekirwe kusikira ishe akore enyatano ajwete ebijwaro bitakatifu bya kitani.

³³ Ayatilire ahatakatifu, ayatilire n'Eihema ly'Omuterano na alutare, kandi ayatilire n'abakuhani n'abantu bona b'enteko.

³⁴ Eki kiraba kiragiro ahali inywe eirai lyona. Abaisiraeli batilirwe limoi omu mwaka aha rw'amafu gabo gona.” Musa akora nk'okwo Omukama yamuhangira.