Eby'abalevita 13 - Ebibulia 2001

Emiku ekwete aha ndwara z'omubili

¹ Omukama agambira Musa na Aroni ati,

² “Orwo omuntu aragiraga ekizimba aha mubili anga akagiraho ekihere anga ekisheshe, ahanyuma akazoka yabemba, aho aletwega ahali Aroni omukuhani anga ahali omoiho omu batabani abakuhani.

³ Omukuhani amulebega mbali arwaire ekisheshe aha mubili. K'eishoke ly'aharwaire liraba lyezire n'endwara ekazoka esikiire egyo eliba eli ndwara y'ebibembe. Orwo omukuhani arabaga yamulebire amurange okwo ahagaire.

⁴ Kyonkai k'aharwaire aha mubiligwe harabaga nihera, hakazoka hatalikutontobera kuzimu, n'eishoke aha mwanya gwalyo gutezire, omukuhani ateke omurwaire ogwo omu rubili ebiro mushanju.

⁵ Aha kiro kya mushanju amulebe, k'arabona oburwaire bwaikara okwo buli tibwayagaara mubili, aho amuteke omu rubili ebiro ebindi mushanju.

⁶ Aha kiro kya mushanju ekindi ashube amulebe. K'aharwaire haraba hatalikuzokage n'oburwaire tibwagaire aha mubili, aho amurange okwo alikwera; ekyo kiraba kili kihere kushai. Omuntu ogwo afure emyendoye, mara aho aliba ayezire.

⁷ Kyonkai k'ekihere kirayagaara omubili, okwo wenene yaba yayeyolekire omukuhani kwija kuhasilirwa, ashube aije aha mukuhani.

⁸ Omukuhani amulebe, k'ekihere kiraba kyatematemire omubili, omukuhani amurange okwo ali muhagare; bibembe ebyo.”

⁹ “Omuntu alikwatwa ebibembe aletwe aha mukuhani.

¹⁰ Omukuhani amulebe, kaharaba haliho ekizimba kilikwera aha mubili, ekyelize eishoke, kandi omu kizimba mwonene hakamerwamu bwangu enyama,

¹¹ ebyo bibembe karubelera aha mubiligwe. Omukuhani amurange okwo ahagaire; atamuteka mu rubili aha rw'enshonga muhagare.

¹² Kandi k'ebibembe byakuturuka aha mubili bikagoba kumaraho omurwaire, kwema aha mutwe kugoba aha kalenge okwo omukuhani yakubona,

¹³ ashube amulebe. K'ebibembe biraba byamusheshekeire omubili gwona, amurange okwo atakwetwe ndwara, orwo byona byahinduka katare, aho wenene nayera.

¹⁴ Kyonkai kiro eky'engoga elifumuka, aliba ahagaire.

¹⁵ Omukuhani ashube amulebe. K'arabona engoga efumukire amurange okwo ali muhagare; engoga efumukire eba ehagaire aha rw'okuba ebyo biba bili bibembe.

¹⁶ Kyonkai k'engoga efumukire yakushuba ekera aho omurwaire aije aha mukuhani.

¹⁷ Omukuhani amulebe, k'oburwaire buraba bwayera aho amurange okwo alikwera; nayera.”

¹⁸ “Orwo omuntu aligira enkoju y'ekihute,

¹⁹ Kandi omu nkoju omwo hakazokwamu ekizimba kilikwera, anga akantu kalikwelerukana, omuntu ogwo agye aha omukuhani.

²⁰ Omukuhani amulebe, kakirazoka nikitontobera omu mubili n'orushoke rwakyo rukashangwa rwezire, aho omukuhani amurange okwo ahagaire. Egyo ndwara y'ebibembe yaturukira omu kihute.

²¹ Kyonkai k'omukuhani arakileba, akashanga orushoke rwakyo rutalikwera, na kyonene kitalikutontobera, shana nikinywelererwa, aho omukuhani amuteke omu rubili ebiro mushanju.

²² Kakirayagaara aha mubili aho omukuhani amurange okwo ahagaire; ekizimba ky'endwara.

²³ Kyonkai k'akantu karaikara aha mwanya gumoi katayagaire, egyo nkoju y'ekihute; aho omukuhani amurange okwo alikwera.”

²⁴ “Anga k'omubili gwakugira amahya, engoga eyafumuka omu mahya ekelerukana anga ekera,

²⁵ omukuhani agilebe, kandi k'orushoke rwamwo ruraba rwezire, n'engoga ekashangwa etontobeire, aho ebyo bibembe, byaturukira omu mahya. Omukuhani amurange okwo ahagaire; egyo ndwara y'ebibembe.

²⁶ Kyonkai k'omukuhani araleba engoga egyo, akashanga orushoke rwamwo rutalikwera, n'engoga yonene shana nenywelererwa, omukuhani amuteke omu rubili ebiro mushanju.

²⁷ Ashube amulebe aha kiro kya mushanju. K'arashanga engoga netana, aho amurange okwo ahagaire egyo ndwara y'ebibembe.

²⁸ Kyonkai k'eraikara hamoi etagiliire, ekiliho nenywelererwa kushai, ekyo kizimba ky'amahya, omukuhani amurange okwo alikwera aha rw'enshonga egyo nkoju y'amahya.”

²⁹ “Orwo omushaija anga omukazi aragiraga endwara omu mutwe anga aha kileju

³⁰ omukuhani alebega endwara egyo. K'erabonekaga netontobera, n'orushoke rwamwo ruhisize mara ruli rutiruti, aho omukuhani amurangega okwo ahagaire; kiguna, bibembe by'omu mutwe anga by'aha kileju.

³¹ Kandi k'omukuhani aralebaga endwara y'ekiguna kikazoka kitalikutontobera, mara kitalimu rushoke rulikwiragura, aho omukuhani ateke omuntu aina endwara y'ekiguna omu rubili ebiro mushanju.

³² Aha kiro kya mushanju alebe endwara. K'ekiguna kirashangwa kitayagaire mara kitalimu rushoke ruhisize, n'ekiguna kyonene kikazoka kitalikutontobera,

³³ aho amoise, kyonka atamoisa kiguna. Kandi omukuhani amuteke omu rubili ebiro mushanju.

³⁴ Aha kiro kya mushanju omukuhani alebe ekiguna ekyo. Kakiraba kitayagaire aha amubili mara kikazoka kitalikutontobera, aho omukuhani amurange okwo alikwera; omuntu ogwo afure emyendoye, araba ayezire.

³⁵ Kyonkai k'ekiguna kirayagaara aha mubili yamazire kufura,

³⁶ aho omukuhani amulebe. Kakitayagaire, omukuhani atasiiba nahigiliza rushoke ruhisize; ogwo muhagare.

³⁷ Kyonkai omukuhani omu mibonereye, ekiguna akilebire, mara kimezirwemu orushoke rulikwiragura, aho tuti ekiguna kyakizire, omuntu ogwo nayera. Omukuhani amurange okwo alikwera.”

³⁸ “Orwo omushaija anga omukazi aragiraga ebibamba bilikwera aha mubili,

³⁹ omukuhani alebe; k'ebibamba birayera kubi kubi, ago mazombo gamuturukire aha mubili; wenene nayera.”

⁴⁰ “K'omuntu ararugwa eishoke aha mutwe, yagira oruhara kyonkai nayera.

⁴¹ Kandi k'omuntu ararugwaho eishoke kwema omu buso kugoba omu mbai, aragira oruhara rw'omu buso, kyonkai wenene nayera.

⁴² Kyonkai omu ruhara, rube rw'omutwe anga rw'obuso, kaharabamu ekisheshe kilikwelerukana, ebyo bibembe byamuturukira omu ruhara rw'omutwe anga rw'obuso.

⁴³ Aho omukuhani amulebe, k'ekizimba kirayelerukana omu ruhararwe orw'omu mutwe, anga omu buso, nk'okwo ebibembe bizoka aha mubili,

⁴⁴ mubembe, ahagaire; omukuhani amurange okwo ali muhagare, endwara emuli omu mutwe.”

⁴⁵ “Omubembe aina endwara ajware emyendo etagukire, atatega ishoke lya mutwe, kandi ashembe omunwagwe ogwa ruguru, mara akunge ati, ‘Ndi muhagare, ndi muhagare.’

⁴⁶ Araikara ali muhagare omwanya gwona ogwo aina endwara egyo; muhagare, ature wenkai enjai y'orusisira.”

Emiku ekwete aha bibembe

⁴⁷ “Orwo omu kijwaro harabamuga endwara y'ebibembe, kyaba kijwaro kya wulu anga kitani,

⁴⁸ kyaba kya kitani efumirwe anga eshukirwe, anga kilikaba kya wulu, handiki kibe ky'oruhu anga kikoziibwe ekintu kyona kyona eky'oruhu,

⁴⁹ k'endwara yakuzoka oti yakuba kijani anga kutukura omu kijwaro ekifumirwe anga ekishukirwe anga kibe kijwaro ky'oruhu anga ky'ekintu kyona kyona eky'oruhu, ndwara y'ebibembe mara eyolekwe aha mukuhani.

⁵⁰ Omukuhani alebe endwara. Aho ekyo ekina endwara akiteke omu rubili ebiro mushanju.

⁵¹ Aha kiro kya mushanju alebe endwara egyo. K'endwara eraba yayagaire omu kijwaro, kibe kifumirwe anga kishukirwe, anga kibe ky'oruhu, oruhu rube rwa mukoroki, endwara egyo bibembe ebibi; ekijwaro kihagaire.

⁵² Ekijwaro ekyo akyokye, kibe kinamu endwara kifumirwe anga kishukirwe, kya wuleni anga kitani, anga kijwaro kyona kyona eky'oruhu, aha rw'okuba bibembe ebibi; kyokibwe omu muliro.”

⁵³ “K'omukuhani aralebaga endwara, akashanga endwara etayagaire omu kijwaro kifumirwe anga kishukirwe anga kibe kyona kyona eky'oruhu,

⁵⁴ aho aragiire bogye ekintu ekinamu endwara, mara akiteke omu rubili ebiro ebindi mushanju.

⁵⁵ K'ekintu ekinamu endwara kiraba kyayogiibwe, omukuhani akilebe. K'ekichweka ekinamu endwara kirashangwa kitahindukire rangi, n'orwo endwara eraba etayagaire, kihagare; akyokye omu muliro, n'orwo ekizigira kiraba kili omunda anga aheru.”

⁵⁶ “Kyonkai k'omukuhani araleba endwara, akabona nenywelererwa orwo yamara kwogibwa, aho omu ruhu anga omu kijwaro kifumirwe anga kishukirwe ataguremu ekichweka ekina endwara.

⁵⁷ Aho k'erashuba ekaboneka omu kijwaro, kifumirwe anga kishukirwe, anga omu kijwaro kyona kyona eky'oruhu endwara eraba neyagara. Ekijwaro ekyo ekinamu endwara akyokye omu muliro.

⁵⁸ Kyonkai ekijwaro, kifumirwe anga kishukirwe, anga ekijwaro kyona kyona ky'oruhu ekyarugwamu endwara wamazire kukyogya, aho kyogibwe omurundi gwa kabili, kyere.”

⁵⁹ Eli nilyo iteka likwete endwara y'ebibembe omu kijwaro kya wulu anga kitani, kibe kifumirwe anga kishukirwe, anga kibe kijwaro kyona kyona eky'oruhu, kuramura nka nikyera anga nka kihagaire.