Eby'abalevita 1 - Ebibulia 2001

Ebitambo eby'okwokibwa byona

¹ Omukama ayeta Musa amugambira ayemire omw'Ihema ly'Omuterano ati,

² “Ogambire Abaisiraeli oti, Orwo omuntu wena wena omuli inywe araleteraga Omukama ekihongo, mwihye ebihongo by'ebitunganwa omu buhyo bw'ente anga obw'entaama.”

³ “K'ekihongokye kirarugaga omu buhyobwe kili kihongo ky'okwokibwa, ahonge enumi etaina kamogo. Agihongere aha mulyango gw'Eihema ly'Omuterano nirwo alibona kukundwa omu maisho g'Omukama.

⁴ Ateke omukonogwe aha mutwe gw'ekihongo ky'okwokibwa, nirwo kiraikilizibwa kuba kitambo ky'okumwatilira amafu.

⁵ Aho aite enumi egyo omu maisho g'Omukama; kandi batabani ba Aroni abakuhani balete obwamba, bamare bagishaimulire alutare kugizingora, alutare eli aha mulyango gw'Eihema ly'Omuterano.

⁶ Aho omuhongi abage ekihongo ky'okwokibwa, akigutaguture ebichweka.

⁷ Batabani ba Aroni omukuhani bahembe omuliro ahali alutare, bagutekehoge enkwi.

⁸ Bazitembekehoge ebichweka ebyo n'omutwe n'ebishaju.

⁹ Kyonkai amara n'ebilenge byayo omuhongi abyogye n'amaizi, agyokye yona ahali alutare kili kihongo ky'okwokibwa, kyokibwe omuliro. Akatachu k'ekitambo eki kanshemelera inye Omukama.”

¹⁰ “K'ekihongo ky'okwokibwa kirarugaga omu buhyo bw'entaama anga bube bw'embuzi, ahonge empaya etaina kamogo.

¹¹ Agitire rubaju orwa bikara rwa alutare omu maisho g'Omukama. Obwamba bwayo batabani ba Aroni abakuhani babushaimulire alutare kugizingora.

¹² Agigutaguture ebichweka, n'omutwe gwayo n'ebishaju byayo, kandi omukuhani abitekege aha nkwi zilikwaka omuliro ahali alutare.

¹³ Kyonkai amara n'ebilenge abyogye n'amaizi. Kandi omukuhani agihonge yona, agyokeze ahali alutare. Ekyo kihongo ky'okwokibwa; akatachu kakyo kanshemelera inye Omukama.”

¹⁴ “K'ekihongokye eky'alikuhongera Omukama kiraba kili kihongo ky'okwokibwa eky'ebinyonyi, aho alete entungurumaiba anga obwiba buto.

¹⁵ Aho omukuhani akilete ahali alutare, akihotoreho omutwe amare akyokezeho. Obwamba bwakyo bugelere aha rubaju rwa alutare.

¹⁶ Eirokezo n'ebishanda byalyo alihyeho alinage aha rubaju rwa alutare oburugaizoba mbali bateka eijwi.

¹⁷ Akyasize omu mapapa gakyo kyonkai atakitaishurana. Omukuhani akyokeze ahali alutare, aha nkwi zilikwaka omuliro; kakili kihongo ky'okwokibwa kyokesibwe omuliro. Akatachu kakyo kanshemelera inye Omukama.”