Danieli 9 - Ebibulia 2001

Danieli nashabira eihangalye

¹ Omu mwaka gwa mbere Dario atwete engoma, Dario eya Ahasuero Omumedi, Omukama w'Abakalidayo,

² omu mwaka gwa mbere ogwo aliire engoma, inye nyenene Danieli nkashoma ebitabo namanya emyaka elihinguraho Yerusalemu ekasilika niyo myaka 70, nk'okwo Omukama yagambire omu kanwa k'Omurangi Yeremia.

³ Aho nyirukira Omukama Ruhanga wange, njwara orugunia, nyesiiga eijwi, nsiiba, nshoma enshara, mara mutagiliza.

⁴ Nshaba ahali Mukama Ruhanga wange ogwo, nimutonganaho nti, “Waitu Mukama Ruhanga omuhango ow'ekitinwa kingi muno, iwe atachwa ndagano okashuba okagilira ekisha abakugonza nibekomya emihango yawe,

⁵ ichwe tukafakara, twashobya, twakora kubi, mara twakushenga, orwo twachwire emihango yawe n'emigenzo yawe.

⁶ Tukanga kuhuliliza abairu bawe, abarangi, abo watumire kugambira abakama baitu, n'abatwazi baitu, na batatenkurw'ichwe, n'eihanga lyaitu lyona.

⁷ Iwe Mukama waitu, n'iwe wenkai oba mugorogoki; kyonkai ichwe tukegora. Ichwena twina enshoni. Abaisiraeli abali Yuda, Yerusalemu, n'abandi abo wanaganagire omu mahanga, agali haihi n'agali harai, ahakuba titwabaire besigwa ahali iwe.

⁸ Ichwe waitu Mukama, enshoni zituli kubi, hamoi n'abakama baitu, abatwazi baitu na batatenkurw'ichwe, enshonga tukahemuka orwo twakufakaliire.

⁹ Omukama Ruhanga waitu agira obuganyizi, n'iwe agarulira n'orwo ichwe twakushengire.

¹⁰ Waitu Mukama Ruhanga waitu, nitube twahuliire ebyo watugambiire omu kanwa k'abairu bawe, abarangi tukakwata Amateka gawe!

¹¹ Isiraeli yona ekashaga Amateka gawe, ebyo wagambire yayanga kubihulira. Tukakufakalira walemwa watuteza emiraamo ehandikirwe omu Mateka ga Musa, omwiru wawe.

¹² Ichwe chwenene n'abakama baitu okatukora nk'okwo wabaire ogambire karai. Ekibonabonyio ekyo wahaire Yerusalemu, ekyab'ekyo tikikabonwaga kigo kindi mu nsi.

¹³ Ebibonabonyio byona ebyagambirwe omu Mateka ga Musa okabituha byona. Mara na mbwenu kutyo, waitu Mukama Ruhanga waitu, titukataireho mani kulekera mafu kuhondera mihango yawe kukushemeleza.

¹⁴ Iwe waitu Mukama Ruhanga waitu okaba osaine otubonabonyie nk'okwo watubonabonyize, kuba iwe buli kanya okora ebili by'amazima. Ichwe n'ichwe tutakuhuliire.”

¹⁵ “Waitu Mukama Ruhanga waitu, okatwoleka obushobora bwawe orwo waihire eihanga lyawe Misiri. Obushobora bwawe obwo tukyabwijuka. Kandi twashuba twakufakalira, twakukora kubi.

¹⁶ Waitu Mukama, okw'otura otuganyira, otatwisire, singa na mbwenu ogarulire Yerusalemu. Yerusalemu kiba kigo kyawe, Eibanga lya Sioni elitakatifu. Amahanga gona agatwataine nigagaya Yerusalemu n'eihanga lyawe aha rw'amafu gaitu n'ebihemu ebyo batatenkurw'ichwe bakozire.

¹⁷ Waitu Ruhanga hulira enshara zange n'okutaka kwange. Yombeka buhya Rwensinga yawe eyakambukire; singa ogyombeke buhya, buli muntu akumanye okwo oba Ruhanga.

¹⁸ Tuhuliire, waitu Ruhanga, batunagire elisho, balebe enaku ezo tulimu, n'obushasi bw'ekigo ekilikwetelerwa ahali iwe. Nitukushaba aha rw'okuba oba muganyizi, titulikukushaba aha rw'okugira tuti ichwe tukozirege.

¹⁹ Waitu Mukama otuhulire, singa otujune. Yanguha Rugaba, abantu bona bakumanye okwo oba Ruhanga! Ekigo eki kiba kyawe, n'eihanga eli lya Isiraeli liba lyawe!”

Gaburieli nashoborora ebyarangirwe

²⁰ Ngendelera kushoma enshara, kutongana amafu gange n'ag'eihanga lyange lya Isiraeli, nintagiliza Omukama Ruhanga wange kwombeka buhya Rwensingaye entakatifu.

²¹ Kanabaire nkyashoma enshara, Gaburieli, owo nabaire mboine omu kubonekerwa okwa mbere, aija mbali ndi naharara. Likaba lili izoba ly'okutambiraho ekitambo kya bwaigoro.

²² Anshoborora ati, “Danieli, ekyandeta kunu, naija kukushoborora ebyarangirwe.

²³ Orwo obandize kutagiliza Ruhanga, akuhoroire. Nakugonza, leba nanye nakuletera empororo. Mbwenu ohulilize kurungi nkushoborore kurungi ebyo waboine omu kubonekerwa.”

²⁴ “Emyaka n70 emirundi 70, niyo myaka eyo Ruhanga ataireho. Emyaka egyo k'elikya, achungure eihanga lyawe n'ekigo kyawe ekitakatifu omu mafu n'omu ntambara. Amafu galigarulirwa, habeho obugorogoki obw'eirai lyona. Nirwo ebyo waboine omu kubonekerwa n'ebyarangirwe biliboneka okwo bili by'amazima, kandi Ruhanga alishuba atambirwe ebitambo omuli Rwensinga.

²⁵ Ekigambo eki okyeteke mara okishobokerwe: Kwema orwo Isiraeli eliragirwa kwombeka buhya Yerusalemu, kulemwa kugoba mbali Omutwazi endonkwa ya Ruhanga aliizira, elikya emyaka 70 emirundi 70. Yerusalemu elyombekwa buhya, egiremu embarabara, ezingorwe eboma egumire, eshube erame emyaka 62 emirundi mushanju. Kyonkai aga galiba makiro g'ebiyengo.

²⁶ Ahanzindo y'obukiro obwo Omutwazi endonkwa ya Ruhanga balimwitira bushai, kandi eihe ly'Omukama w'amani lilitabara lisilikye Yerusalemu na Rwensinga yamwo. Amaheleruka galija nk'omutunga; Ruhanga alijubura endashana kubaho, n'ensi elikambuka.

²⁷ Omukama mubi ogwo alitwara amahanga gangi emyaka mushanju. Kyonkai orwo elikyaho emyaka eshatu n'enusu, alitanga abantu kutamba ebitambo n'okuhonga ebihongo. Abanyamahanga baliteka Eihano Nyabuhano ahali altare omuli Rwensinga, likareho kulemwa kugoba orwo omuntu aliba alitaireho alisilika nk'okwo Ruhanga yamuhangiire.”