Danieli 8 - Ebibulia 2001

Danieli nabona empaya y'entama n'ey'embuzi

¹ Omu mwaka gwa kashatu Omukama Belishaza aliire engoma, inye Danieli ngya mbonekerwa omurundi gwa kabili.

² Omu kubonekerwa omwo, nyina ebyo naboine. Kugya kubona nkaba ndi omu kigo kya Susa, omu mukoa gwa Elamu. Omu kubonekerwa okwo, mbona ndi aha Mwiga gwa Ulai.

³ Kugya kunaga amaisho mbona empaya y'entama eyemeleire aha rukungu rw'omwiga. Ekaba eina amahembe garaigarai, kyonkai elimoi nilishaga elindi oburai, kandi nilyo lyamezire nyuma.

⁴ Empaya egyo esilikira obugwaizoba na bikara na kasi. Taliho kigunju kyashoboire kugyeteera mu kaso kugitanga, kandi ekigunju ekyo yatera ni kukitelera kimoi. Ekakikora akataka, yamara yayebona okwo eina amani.

⁵ Kanabaire ndi omu kutekeleza ekigambo ekyo, leba empaya y'embuzi neruga obugwaizoba, echwekanisa ensi yona etalikuhikya maguru hansi. Ekaba eina eihembe limoi lyonkai lili lirungi, lyemeleire omugati y'amaisho gayo gombili.

⁶ Egoba empaya y'entama ey'amahembe gabili, eyo naboine eyemeleire aha rukunguru rw'omwiga, yagisilikira n'ekiniga kingi muno.

⁷ Mbona okwo yagigoba, egisima, egitera, egikuura amahembe gombili. Empaya y'entama tiyashoboire kurwana na ya mbuzi, nangu ekagishenkura ahansi, yagishamba emigere, ow'okugigijuna tiyazokire.

⁸ Nikwo empaya y'embuzi kwebuga ekekorogota. Kyonkai kandi omu ndashana yayo egyo, egya ekuuka eihembe lyayo. Mbali elyo lyaruga hamerwamu amahembe agandi ganai agarungi, buli limoi lyolekeire halyo.

⁹ Eihembe limoi omu ganai ago, lirugwamu akahembe akandi, kahanguha muno munonga, kolekeire oburugaizoba na kasi, n'ensi y'Endagano.

¹⁰ Akahembe ako kaba ihembe lihango, liraihya kugoba omu ihe ly'omw'iguru, kandi enyanyinyi ez'omw'ihe elyo lyazikuntura ahansi, lyazilibatilira.

¹¹ Lyayetungunika lityo, lyayeiganisa Omukuru w'eihe elyo, yaba atakitambirwa bitambo bya kwokibwa ebya buli kiro, kandi n'ahatakatifu lyahaita.

¹² Lyaba nilyo litwara eihe elyo, lyata kutambirwa n'ebitambo by'okwokibwa ebya buli kiro. Edini ey'amazima ehwa; eihembe lyayekunyenga, lyata kukora byona ebyo lilikwenda.

¹³ Mpulira omutakatifu omoi nagamba; omutakatifu ondijo abaza ogwo alikugamba ati, “Ebihongo by'okwokibwa ebya buli kiro, mpahosi eihano eli elyaita ensi, ahatakatifu hakakaitilirwa, n'eihe ly'omw'iguru kuterwa emigere, biraberahai ebyo?”

¹⁴ Ndi ogu nahorora amugambira ati, “Orushengo oru nirwija kumara ebiro 1,150. Omu biro ebyo tabeho bitambo bya bwankya na bwaigoro. Ahanyuma nirwo Rwensinga elyombekwa buhya.”

Omumalaika Gaburieli nashoborora okubonekerwa okwo

¹⁵ Kanabaire ndiho nimpanyahanyia kushobokerwa ebyo nabonekerwa, leba alikushusha omuntu anyemeleire omu maisho.

¹⁶ Mpulira eiraka ly'omuntu lyemire omu Mwiga gwa Ulai nilyeta liti, “Gaburieli, shoborora omushaija ogwo ebyo yabonekerwa.”

¹⁷ Kityo Gaburieli agoba mbali nyemeleire. Kanamuboine ntina, njumara ahansi, ndi wenene angambira ati, “Iwe muntu nyakufa, ebi ebyo wabonekerwa nibishusha amaheleruka.”

¹⁸ Kayabaire ali omu kungambira atyo, nagira ntoka, mara nagira njumaire ahansi. Kyonkai wenene anterateraho anyemeleza.

¹⁹ Angambira okwo alikwija kummanyisa ebilibaho aha maheleruka, orwo ensi eliramurwa, aha rw'okuba amaheleruka ago gakaragirwa, galibaho.

²⁰ Ati, “Empaya y'entama eyo wabona ey'amahembe gabili, nibo bakama babili ab'ensi y'Abamedi n'ey'Abaperisi.

²¹ Kandi empaya y'embuzi neshura engoma, ogwo Mukama wa Bugiriki. Eihembe lihango eligili omu maisho gombili omugati ogwo Mukama wa mbere wa Bugiriki.

²² Kandi okwo lyakuuka, omu mwanya gwalyo hakamerwamu amahembe agandi ganai, nikwo halibaho engoma inai, zilitabuka omu ngoma ya Bugiriki. Kyonkai abakama abalitwara engoma ezo tibaligira mani nka Mukama wa mbere.

²³ Orwo engoma ezo inai ziliba nizisilika, orwo abafakare baliba bafakaire bakemaziremu, alijwa Omukama w'ekitinwa mara alija namanya ebyebisho.

²⁴ Obushoborabwe buliba bungi, alirashanisa ababisha ababuze emihanda, eby'alikora eliba goshoko yonkai, kandi aliita abakama n'eihanga elironkwa.

²⁵ Obwenge bwa wenene bulimugiza obujagujagu bw'okukora ebyo alyenda, kandi aliba muntu alikwebona. Aliita abantu bangi atabandize kubatatira, nangu n'Omukama atwara abakama alimushenga orubona. Kyonkai alifa kubi omuntu n'omoi atamukozireho.

²⁶ Eby'obwankyai n'obwaigoro eby'ogambirwe omu kubonekerwa okwo bilibaho, by'amazima. Kyonkai ebyo eby'obonekeirwe obibiike omu mutima, kuba tibilikwija kubaho juba, biliizira eirai.”

²⁷ Ebyo kabyahoire, inye, Danieli, ndemwa muno, n'okurwara ndwara, nshega ebiro bingi. Obugenda bw'eirai nkira, ngya nkora omulimo ogw'Omukama yabaire ankwasize, kyonkai ebyo nabonekeirwe ebyo, bikantangaza mara tinabishobokeirwe.