Danieli 7 - Ebibulia 2001

¹ Guli mwaka gwa mbere Belishaza Omukama wa Babiloni alire engoma, Danieli agya arota ekiroto, omu kiroto omwo abonekerwa abyamire aha kitanda. Ahanyuma ahandika ekiroto ekyo, yashuba yakishoborora omu bigambo bigufi.

² Agira ati, “Ekiro kimoi omw'itumbi ngya mbonekerwa, mbona omuyaga niguruga embaju inai nigutabangura enyanja mpango.

³ Kandi omu nyanja egyo harugwamu ebigunju binai, bihango kyonkai bitalikushushana.

⁴ Ekigunju kya mbere kikaba nikishusha entare kandi kiina amapapa nk'enkwaju. Kanabaire ndiho nkihangire amaisho, kikunyuka amapapa kiimuka, kyemelezibwa kisimba amaguru nk'omuntu, kyashuba kandi kyahabwa amagezi nk'ag'omuntu.

⁵ Nshuba mbona ekya kabili, ekyo kikaba nikishusha edubu. Kiimuka orubaju rumoi, omu maino kiinamu amagufa g'embanda gashatu. Kigambirwa kwimuka kulya enyama nyingi.

⁶ Kumara kubona eki ngya mbona ekilikushusha empisi. Aha mugongo kiinaho amapapa ganai nk'ag'ekinyonyi. Emitwe kikaba kiina enai, mara nikizoka kiina obushobora.”

⁷ “Nkyali omu kubonekerwa okwo mbona ekigunju kya kanai, kiina amani gangi muno, mara nikitiinisa kubi. Kikaba kiina elino lihango ly'ekyoma. Kikatakatura ebyo kyaita, kandi ebyasigaraho kibitera emigere! Ebigunju ebishatu ebya mbere kikaba kitalikubishusha. Kyonene kikaba kiina amahembe ikumi.

⁸ Ndeeba amahembe, ago garugwamu elindi, kyonkai elyo like, likuura amahembe gashatu agalyebembeire. Eihembe eli likaba lina amaisho nk'ag'omuntu, mara niligambisa eikuru.

⁹ Kanabaire ndi aho ndilebire, Mbona bataho enketo, enketo ezo zishuntamwaho Omugurusi Nyamukuru. Ebijwarobye bikaba nibyera nk'orubare, kandi eishokelye nilyera nk'omwoya gw'entama. Endimi z'omuliro nizo zabaire zili nketoye, amagurudumu g'enketo nazo ndimi z'omuliro.

¹⁰ Omugera gw'omuliro gwamuruga mbali ali, abairu akaba aina emilioni emoi, nibamukolera; abandi emilioni ikumi bakaba bamwemeleireho. Emishango ebanza kuramurwa, ebitabo babishurura.”

¹¹ “Omu kanya ako ndeba, ntangazibwa okuhulira eihembe elyo niligamba nilyeshalingya kubi. Kanabaire ndiho ndebire, enyamaishwa egyo bagiita, omutumbi gwayo baguchebacheba bagutwara bagwokya.

¹² Ebigunju ebyasigaireho babyaka obukuru, kyonkai tibabita, baba bakyabilekireho akabanga akandi.

¹³ Omu kubonekerwa kwange oku kw'omw'itumbi, Nkabona alikushusha omuntu, yaletwa omu bichwi, yagoba aha Mugurusi Nyamukuru, bamuteka omu maisho g'omugurusi ogwo.

¹⁴ Yamutunga engoma, ekitinwa n'obukama, n'abantu b'amahanga gona, n'enganda zona z'endimi zitali zimoi, kuba bahelezabe. Engomaye y'eirai n'eirai, engoma egyo telihwaho; obukama obwo bukama obutalichweka.”

Enshonga y'ekiroto ekyo

¹⁵ “Kyonkai inye, Danieli, ebyo nabonekeirwe bikantinisa, byanyita kubi muno.

¹⁶ Nagoba omuntu omoi ahali balinya ababaire bemeleireho, namubaza enshonga y'ebyo nabona byona. Kityo yanshoborora enshonga yabyo.

¹⁷ Yangambira ati, ‘Ebigunju binai ebyo ebihango nibo bakama banai, bahalibaho omu nsi omu.

¹⁸ Kyonkai abatakatifu ba Rukirabyona nibo balitungwa obukama, bukaba bwabo eirai lyona elitaina ndekelero.’ ”

¹⁹ “Ahanyuma nayenda kumanyuruza ekigunju kya kanai ekyabaire kitalikushushana na bindi. Kikaba nikitiinisa ebishobeize, kiina amaino g'ebyoma, amahembe g'omulinga, nikikatura obwite nikishekenyura amagufa, ebyasigaraho nikibiteza emigere.

²⁰ Nashuba nagonza kumanya bunyanungi amahembe gakyo eikumi aha mutwe gwakyo, n'eihembe elindi elyamezire likasindura agashatu agabaire galyebembeire; likaba lina amaisho, niligamba nilyetungunika, lyakira na gatahi galyo.

²¹ Okwo nkalebire eihembe elyo lyarashana n'abatakatifu, lyabasinga.

²² Aho nirwo Omugurusi Nyamukuru yaizire, abatakatifu ba Ruhanga bakasinga omushango; n'obukiro bwahika abatakatifu abo batungwa obukama.”

²³ “Omuntu ogwo owo nabalize, angambira ati, ‘Enyamaishwa ya kanai, neshura Omukama wa kanai omu nsi. Omukama ogwo, talishushana na Mukama ondijo wena wena. Aliita ensi yona omwebura, atere abantu emigere, abaite kayaba.

²⁴ Amahembe eikumi: Obutwazi bw'Omukama wa kanai, bulirugwamu engoma ezindi ikumi. Abakama abo ikumi balihonderwa Omukama ondijo, kyonkai talishushana nabo. Omw'ikumi abakama abashatu alibaihya aha ngoma.

²⁵ Ogwo n'iwe alitera abantu eikubo kugomera Rukirabyona. Abatakatifu ba Rukirabyona alibashasa, ahindure Amateka gabo g'edini n'ebiro bikuru. Abatakatifu ba Rukirabyona alibatwara emyaka eshatu n'enusu.

²⁶ Ahanyuma aliramurwa, engoma bagimwake, afe kayaba, asilike, ahwereho kimoi.

²⁷ Omu nsi omu obukama n'engoma n'ekitinwa ky'obukama biliba by'abatakatifu ba Rukirabyona. Obukama bwabo buliba bw'eirai lyona, kandi engoma zona ziliba bairu babo, zibahulire.’ ”

²⁸ “Ebigambo ebi byahwera aha. Inye, Danieli, ebyo natekeleize bikanshasa muno, naziguka obuso. Kyonkai ebigambo ebi nkabibiika aha mutima.”