Danieli 6 - Ebibulia 2001

Danieli omu rwina rw'entare

¹ Omukama Dario aragira kutekamu abagavana kikumi na 120 kutwara eihangalye.

² Mara abagavana abo abateraho abakuru bashatu ab'okubakulira, omoiho omu bashatu abo ni Danieli. Obukuru bw'abashatu abo nikwo kugoberwaho amakuru g'abagavana; Omukama ataija akaterwa eifuzo omu ngomaye.

³ Danieli amanyika bwangu okwo aina obumanyi kushaga abakuru abasigaire hamoi n'abagavana kuba akaba aina omutima gurungi muno. Omukama ayenda kumuha engoma yona.

⁴ Aho abakuru abo babili hamoi n'abagavana bona bamuhigira eby'okumutoijera ebikwete entwaza z'obukama nawe balemwa eky'okumuhangilira kuba Danieli akaba ali mwesigwa, akaba ataina kamogo anga ky'ashobize.

⁵ Aho abashaija abo bagamba bati, “Tituboine kyakutoijelera Danieli kyona kyona shana ekikwataine aha diniye.”

⁶ Abakuru aba n'abagavana bema hamoi baija obuso, bamugambira bati, “Kamelere, Omukama Dario!

⁷ Ichwe chwena abakuru b'omu bukama bwawe, n'abalebelezi, n'abagavana, n'abategeki, twaikilijanyia okwo Omukama ateho omuku oguhamire, ogulikugira guti: Omu biro 30 arashaba ahali ruhanga wena wena anga aha muntu wena wena atashabire ahali iwe bamunage omu rwina rw'entare.

⁸ Mbwenu waitu Mukama, oteho omuku, oguteho omukono gwawe gutahindurwa, nk'okwo omuku gw'Abamedi n'Abaperisi gutahindurwa.”

⁹ Nikwo Omukama Dario kutaho omukono aha muku ogwo.

¹⁰ Danieli kayabimanyire akamanya okwo omuku gwahandikwa gukatebwaho omukono, agenda omwe omu gorofa aha madirisha agabaire golekeire Yerusalemu gakingwirwe. Danieli Ateka amajwi ashoma enshara emirundi eshatu buli kiro, asiima Ruhanga nk'okwo yagiraga.

¹¹ Abashaija abo baija ekikakaro bashanga Danieli nashoma enshara natagiliza Ruhanga.

¹² Bashubayo, babigambira Omukama, bamwijukya omuku gulinya, bati, “Waitu Mukama, tiwataireho mukono muku ogulikugamba okwo omuntu wena wena arashaba ahali ruhanga wena wena anga omuntu wena wena omu biro 30 atashabire ahali iwe, waitu Mukama, bamunage omu rwina rw'entare?” Omukama abahorora ati, “Omuku ogwo nikwo guli. Omuku ogwo gwina amani nk'okwo emiku y'Abamedi n'Abaperisi etahinduka.”

¹³ Bahorora Omukama bati, “Danieli olinya, omoiho w'embohe abarugire Buyuda talikukuhulira. Talikufaho muku ogwo wataireho omukono gwawe, nawe nashoma enshara emirundi eshatu buli kiro.”

¹⁴ Aho Omukama Dario kayahuliire ebyo byona ashasha muno. Ayegimba kuhiga omuhanda gw'okurokora Danieli. Alengesa okwo aramurokora kugoba bwaigoro.

¹⁵ Aho abashaija abo basikuka baija aha Mukama bagamba bati, “Rugaba, omanye. Omuku gw'Abamedi n'Abaperisi tiguhinduka kagwatairweho omukono gw'Omukama.”

¹⁶ Aho Omukama aragira, baleta Danieli, bamunaga omu rwina rw'entare. Omukama Dario agambira Danieli ati, “Ruhanga wawe ow'okilera obutosha asinge akurokore.”

¹⁷ Baleta eibare baliteka aha munwa gw'orwina. Omukama ataho akabonero k'omuhuri gw'obukamabwe n'omuhuri gw'abamibe, hatabaho kyahindukaho ahali Danieli.

¹⁸ Omukama ashuba omu kikaarekye, arara ataliire. Tiyateleirwe nanga, oturo tubura.

¹⁹ Bwankya karai Dario aimuka agenda bwangu aha rwina rw'entare.

²⁰ Kayagobire aha rwina orwo mbali Danieli yabaire ali, akunga n'eiraka ly'obushasi, agambira Danieli ati, “Iwe Danieli, omwiru wa Ruhanga Asingire, Ruhanga wawe ow'okolera obutosha yashobora kukuhungya aha ntare?”

²¹ Aho Danieli ahorora Omukama ati, “Kamelere Rugaba!

²² Ruhanga wange atwekire omumalaika yakoma entare eminwa, nazo tizamputaza, aha rw'okuba yabona okwo ntaina kabi ahali wenene. Kandi naiwe Rugaba, kabiki ako ndakukoleire?”

²³ Aho Omukama Dario ashemelerwa muno munonga, aragira kabaihya Danieli omu rwina rw'entare. Kityo Danieli bamwihya omu rwina rw'entare atahutaireho n'akake, kuba akesiga Ruhangawe.

²⁴ Dario aragira kabaleta ababaire batoijeire Danieli kubanaga omu rwina rw'entare, hamoi n'abana babo na bakazi babo. Batakagobire mu rwina kuzimu, entare zikaba zabahendahenzire amagufa.

²⁵ Ahanyuma Omukama Dario ahandikira abantu b'amahanga gona, n'ab'enganda z'endimi ezitali zimoi, abakatura omu nsi yona, nagira ati, “Mugume, mugire emirembe!

²⁶ Inye mbwenu nataho omuku nti: Omu ngoma yange abantu bona baikarega nibatina Ruhanga wa Danieli, bamuhe ekitinwa. Ahakuba n'iwe Ruhanga Nyamurora, n'iwe abaho ebiro byona. Obukamabwe tibulichweka, n'obutwazibwe buliba bw'eirai lyona.

²⁷ N'iwe ajuna, n'iwe akiza; n'iwe akora obubonero n'ebitangazo na mw'niguru na mu nsi, kandi n'iwe arokoire Danieli akamwihya omu rwina rw'entare.”

²⁸ Danieli yaba nikwo agira atyo emirembe omu businge bwa Dario, n'obwa Koreshi Omuperisi.