Danieli 5 - Ebibulia 2001

Belishaza nakora obugenyi

¹ Omukama Belishaza akolera abashaijabe enkumi obugenyi buhango. Anywa nabo edivai.

² Kayamazire kurozaho aragira balete ebikwato by'ezahabu n'efeza ebyo Nebukadineza ishe yanyagire omuli Rwensinga Ya Yerusalemu, abileta kubinyweramu wenene n'abamibe, n'abakazibe, n'ensholekeze.

³ Baleta ebikwato ebyo eby'ezahabu n'efeza ebyabaire birugire omu Rwensinga niyo nyaruju ya Ruhanga eli omuli Yerusalemu. Omukama n'abami, n'abakazibe, n'ensholekeze babinyweramu.

⁴ Banywa edivai, basingiza ebishushani bya baruhanga abakozirwe ezahabu, efeza, omulinga, ekyoma, omuti n'amabare.

⁵ Aho n'aho hazoka omukono gw'omuntu guhandika aha rukuta orusilibire omu kikaare bwolekera bw'ekiinara ky'etara eky'Omukama. Belishaza abona niguhandika.

⁶ Aho Omukama ayechura, ebitekelezo bimuburabuza, ahwamu amani, n'ebijwi bisimangana.

⁷ Omukama aragira n'eiraka lihango kweta abafumu, Abakalidayo n'ababuya b'enyanyinyi. Agambira abamanyi abo ba Babiloni ati, “Wena wena arashoma ebihandiko ebi, akanshoborora enshonga yabyo, ndamujweka omwendo gwa zambarau, muteke omukofu gw'ezahabu omu ngoto, abe mutwazi wa kashatu omu bukama bwange.”

⁸ Aho abamanyi bona ba wenene baija, nawe tibashoboire kushoma kihandiko ekyo, anga kumanyisa Omukama nshonga yakyo.

⁹ Omukama Belishaza atina muno, achunchubara omu maisho, n'abamibe bashoberwa.

¹⁰ Omukama mukuru kayahuliire ebyagambirwe Omukama n'abamibe, aija mbali babaire nibakolera obugenyi, agambira Omukama ati, “Kamelere Mukama! Eby'olikutekeleza bitakutinisa anga otachunchubara.

¹¹ Omu bukama bwawe halimu omuntu omoi owo Ruhanga omutakatifu alikuhabukira. Kandi n'omu businge bwa sho akaba nabona, aina amagezi n'obumanyi nka baruhanga. Nikyo Omukama Nebukadineza yamuhinduliire kuba mukuru w'abafumu, embandwa n'Abakalidayo, n'ababuya b'enyanyinyi.

¹² Danieli ow'Omukama yashambagiize akamweta Beliteshaza akaba aina omutima gurungi muno, n'obumanyi, n'obushobokerwa bungi bw'okushoborora ebiroto, n'okushoborora enfumo n'okuhanuura ebigumire. Mbwenu bete Danieli nawe arakushoborora.”

Danieli nashoma ebihandiko

¹³ Aho baleta Danieli obuso. Omukama amugambira ati, “Iwe n'iwe Danieli ayalesirwe oli mbohe kuruga omu nsi ya Yuda? N'iwe tata Omukama yanyagire kuruga Buyuda?

¹⁴ Mpuliire nibakugambaho okwo Ruhanga Omukama akwemiremu; kandi ngu nobona, oina amagezi n'obumanyi kukira abandi.

¹⁵ Mbwenu banyetera abamanyi n'abafumu kunshomera ebihandiko ebi kummanyisa amakuru gabyo nawe balemwa.

¹⁶ Kyonkai mpuliire okwo iwe olikushobora kumanya amakuru g'ebintu nk'ebyo; n'okushoborora ebigumire. Mbwenu k'oraba noshobora kumanya ebihandiko ebyo n'okumanyisa enshonga, ndakujweka omwendo gwa zambarau n'omukofu gw'ezahabu omu ngoto, mara omu ngoma yange orahondera katikiro.”

¹⁷ Danieli ahorora Omukama ati, “Rugaba, ebigambo ebyo oikare nabyo, n'erongoro ogirongore omuntu ondijo, kyonkai inye ndakushomera ebihandiko ebyo mara nshoborore enshonga yabyo.

¹⁸ Waitu Mukama, Ruhanga Rushoborabyona akatunga Nebukadineza sho obukama, eiranga, ekitinwa n'obukuru.

¹⁹ Kandi aha rw'obukurubwe obwo yamuhaire, abantu b'amahanga gona n'enganda zitali zimoi bamutinaga. Yaita yayasha, owo yayendaga kukiza amukiza, owo yagonzaga kukuza amukuza; owo yagonzaga kwaka obukama abumwaka.

²⁰ Kyonkai kayayetungunikire, akagira eikuru, yaihwa aha bukama aha nketoye; ekitinwa kyamurugaho.

²¹ Abantu bamushenda, amagezi yagashushanisa ag'enyamaishwa. Yatura n'endogobeishwa, yalya obunyasi nk'ente, yaralilirwa orume; kuhika orwo yaijukire Ruhanga Rukirabyona okwo n'iwe ntabuko y'engoma z'abantu bona mara n'iwe alikutaho ow'alikwenda.

²² Naiwe omutabani Belishaza noyetungunika n'orwo ebi abaire ali sho alikubimanya;

²³ Ogizire eikuru wajeemera Omukama ow'omw'iguru; bakuletera ebikwato bya Rwensingaye wabinyweramu edivai, iwe n'abami bawe n'abakazi bawe, n'ensholeke zawe. Mwasingiza ebishushani bya baruhanga abakozirwe efeza, ezahabu, omulinga, ekyoma, omuti n'amabare, ebitabona, anga ebitahulira, anga ebitamanya. Kyonkai Ruhanga ow'oburora bwawe bwemeleireho, ogwo akwemamu omuli byona eby'okakora tomuhaire kitinwa.

²⁴ Eki nikyo Ruhanga aleteire omukono oguhandikire ebi aha rukuta.

²⁵ Ebihandiko niby'ebi: MENE, MENE, TEKELI NA PERESI,

²⁶ n'egi niyo nshonga yabyo: MENE nikwo kugamba ‘orubara’. Ruhanga abazire ebiro by'obukama bwawe, mbwenu byagoba aha nzindo.

²⁷ TEKELI nikwo kugamba ‘obusikizi’. Opimirwe aha minzani naiwe waboneka otalikusikira.

²⁸ PERESI nikwo kugamba ‘omubeganuko’. Obukama bwawe bubeganukire omugati bwatwarwa Abamedi n'Abaperisi.”

²⁹ Aho Belishaza aragira kabajweka Danieli omwendo gwa zambarau n'omukofu gw'ezahabu omu ngoto. Bashuba bamuranga okwo n'iwe yahondera katikiro omu bukama obwo.

³⁰ Kir'ekyo omw'itumbi Omukama Belishaza ow'Abakalidayo bamwita.

³¹ Dario Omumedi alya engoma. Dario ogu akaba aina emyaka nka 62.