Danieli 4 - Ebibulia 2001

Ekiroto kya Nebukadineza ekya kabili

¹ Inye Omukama Nebukadineza nimpandikira abantu bona n'enganda zona n'endimi zona ezili omu nsi nti, Mweyongere kugira emirembe!

² Ninshemelerwa kubamanyisa obubonero n'eby'okutangaza ebyo Ruhanga Rukirabyona ankoleire:

³ Obubonerobwe buhango butai, n'ebitangazobye by'amani bitai? Obukamabwe bw'eirai lyona, mara tibulichweka.

⁴ Inye Nebukadineza nkaba ngoijagiire omwange, buli kantu nikagendage omu kikaare kyange.

⁵ Ekiro kimoi ngya ndota ekiroto ekilikutinisa. Kanabaire ndi aha kitanda mbyamire mbona eby'okunkangaranisa.

⁶ Ndagira bandetere abamanyi bona ba Babiloni yona, banshoborore ekiroto kyange.

⁷ Nirwo abafumu, n'embandwa, n'Abakalidayo n'abahanuzi b'enyanyinyi baizire. Mbarotorolera ekiroto kyange, kyonkai balemwa kukitoitora.

⁸ Aho Danieli ayayetwaga Beliteshaza nk'eibara lya ruhanga wange aija, wenene baruhanga bakaba bamwemiremu, murotorolera ekiroto nti,

⁹ “Iwe Beliteshaza, omukuru w'abafumu, nimanya okwo baruhanga abatakatifu bakwemiremu, kandi taliho kyebisho ekikulema kukishoborora. Mbwenu onshoborore ekiroto ekyo ndosire nanye manye enshonga yakyo.

¹⁰ Ebyo mbonekeirwe mbyamire aha kitanda niby'ebi: Mboine omuti guraigurai gumezire omu kangaratete.

¹¹ Omuti ogwo gwakura gwaba kigabiro, n'enshonga yagwo yakanga aha iguru, gwaboneka hona omu nsi.

¹² Gubaire gwina amababi garungi, gurabire gushekeleize. Ebiraba byagwo nibilibwa kaishe muntu. Enyamaishwa zaija zahungira omu kibeho kyagwo, n'ebinyonyi byatura omu matagi gagwo. Kandi buli muntu yagulyaho ebiraba.”

¹³ “Ebindi ebyo mboine mbyamire niby'ebi: Mboine omulinzi omutakatifu, yaija naruga omw'iguru.

¹⁴ Yatungika eiraka yagamba ati, ‘Tema omuti ogwo oshonjore amatagi gagwo. Ohurubure amababi gagwo, onaganage ebiraba byagwo. Enyamaishwa ezihungiire omushana omu kibeho kyagwo ziruke n'ebinyonyi biruge omu matagi gagwo.

¹⁵ Kyonkai ensibu yagwo n'emizi yayo otabisindura. Ensibu egyo eikare omw'itaka ekomirwe ekyoma n'omulinga ezingoirwe obunyasi bubisi. Omuntu aikare nagubwaho orume rw'eiguru. Aikare n'enyamaishwa elye obunyasi.

¹⁶ Aleke kutekeleza nk'abantu, atekeleze nk'enyamaishwa. Aikare atyo emyaka mushanju.

¹⁷ Eiramu elyo litairweho abalinzi Ekigambo ekyo kishaizirwe abatakatifu kulemwa kugoba aha nzindo orwo buli kirora kilimanya okwo Ruhanga Rukirabyona n'iwe aba Mukama wengoma entwarwa abantu, mara agiha owo yayenda, nangu owahansi muno.’

¹⁸ Eki nikyo kiroto kyange inye, Omukama Nebukadineza. Mbwenu iwe Beliteshaza itoitora ekiroto ekyo, kuba abamanyi bona omu bukama obu balemirwe kukinshoborora, kandi iwe noshobora, kuba Ruhanga omutakatifu akwemiremu, akulimu.”

Danieli naitoitora ekiroto

¹⁹ Danieli ayayetwaga Beliteshaza atwaraho akanya ashobeirwe, aburwa eky'okugamba. Omukama Nebukadineza agamba ati, “Beliteshaza, ekiroto n'okukitoitora bitakuchunchubaza.” Beliteshaza ahorora ati, “Rugaba, ekiroto eki kikwete aha balikukunoba, kandi omwitoitoro gwakyo gugweleire ababisha bawe!

²⁰ Omuti ogw'oboine gukaba kigabiro n'enshonga yagwo ekagoba omu bichwi, gukaboneka omu nsi yona;

²¹ ogubaire gwina amababi garungi, gurabire gushekeleize, ebiraba byagwo nibilibwa kaishe muntu, enyamaishwa zikahunga omushana omu kibeho kyagwo, n'ebinyonyi bikatura omu matagi gagwo;

²² omuti ogwo Rugaba n'iwe asingire n'amani gawe. Obuhango bwawe nibugoba omu bichwi, kandi notwara ensi yona.

²³ Omulinzi omutakatifu ow'oboine naija kuruga omw'iguru akagamba ati, ‘Tema omuti ogwo ogumareho; kyonkai ensibu yagwo n'emizi yagwo otagisindura, eikare ekomirwe ekyoma n'omulinga esigare ezingoirwe obunyasi bubisi, orume rumumagalikire, alye obunyasi nk'enyamaishwa emyaka mushanju.’

²⁴ Omwitoitoro gwakyo nigw'ogu Rugaba: Ogu muku gwa Rukirabyona ahali iwe Rugaba Mukama wange.

²⁵ Abantu nibaija kukushenga, bakubinge, ogye oture n'enyamaishwa omw'irungu, olye obunyasi nk'ente, oterwe orume, ojobe emyaka mushanju, kuhika orwo olimanya okwo Rukirabyona n'iwe aba ntabuko y'obukama bw'abantu, mara wenene n'iwe abutunga owo yayenda.

²⁶ Kandi nk'okwo kiragiirwe kutasindura nsibu n'emizi yayo, obukama bwawe bulikaraho kuhika orwo olimanya okwo Rukirabyona n'iwe aba mutwazi.

²⁷ Aha rw'ekyo Rugaba, singa oikilize ekyo ndikukutegekera, olekere kufakara, oganyire abali omu naku shana wakubona emirembe eshagireho.”

Ekiroto nikigobelera ahali Nebukadineza

²⁸ Ebi byona bikaizira Omukama Nebukadineza.

²⁹ Omu nzindo y'omwezi gwa ikumi n'ebili ashangwa nagendagenda aha rushwi rw'kikaare kya Babiloni.

³⁰ Agamba ati, “Eki nikyo kikaare kikuru kya Babiloni ekyo nayombekire omu bushobora n'amani gange kumanyisa ekitinwa ky'obukama bwange.”

³¹ Atakagwisize, eiraka lyema omw'iguru n'amani liti, “Iwe Mukama Nebukadineza, tokili Mukama,

³² n'abantu barakubinga ogende kutura n'enyamaishwa omw'irungu. Oralya obunyasi nk'ente emyaka mushanju kuhika orwo olimanya okwo obukama bw'abantu butabuka ahali Rushoborabyona, kandi abuha owo yagonza.”

³³ Ekigambo ekyo kigobelera bwangu bwangu ahali Nebukadineza, embaga emushenda, alya obunyasi nk'ente. Aralilirwa orume, eishokelye liraihya nk'ebishanda by'enkwaju, empambo zimushusha ez'amahungu.

Nebukadineza nasingiza Ruhanga

³⁴ Nebukadineza kayabaire nabarura agamba ati, “Ebiro kabyahoire nainunura amaisho omw'iguru, nashuba nagira amagezi, nasingiza Rukirabyona, muhaisiliza, mukunisa okwo abaho eirai lyona, nti, ‘Obukamabwe bw'eirai lyona, kandi obutwazibwe bw'amakiro gona.

³⁵ Abantu bona omu nsi omuli wenene bushai, akora okwo alikwenda omu bamalaikabe, n'omu bantu b'ensi agira okwo yagonza.’ Talimu yakumukwata mukono kumutanga, anga kumubaza ati, ‘Eki nokoraki?’ ”

³⁶ “Nigo makiro gonene gonene orwo nashubire kugira amagezi, nirwo engoma yange n'ekitinwa n'oburungi bwayo n'obukama bwange byangarukiire. Abaramata bange n'abami bangarukaho, aho engoma yange eguma, ngira ekitinwa ekishagireho.

³⁷ Omu kanya aka inye Nebukadineza nsingiza Omukama w'omw'iguru nimuha ekitinwa aha rw'okuba akora eby'obuhangazi mara aba w'amazima. Kandi bona abekuza abatera aha mutwe.”