Danieli 3 - Ebibulia 2001

Nebukadineza n'ekishushani ky'ezahabu

¹ Omukama Nebukadineza ahesha ekishushani ky'ezahabu, kikaba kiina obwemi emikono 60, n'obukika emikono 60, akyemeleza omu ruhita rwa Dura, omu mukoa gwa Babiloni.

² Ahanyuma Omukama aragira kweta abagavana, abami, abaramuzi, abakuru n'ab'ahansi, abahanika n'abakuru bona b'emikoa kwija kufukamira elya mbere ekishushani ekyo Nebukadineza wenene yabaire ataireho.

³ Aho abagavana, abami, abategeki, abaramuzi, abakuru n'ab'ahansi, abahanika n'abakuru bana b'emikoa bahurura kufukamira elya mbere ekishushani eky'Omukama Nebukadineza yataireho, bakyemelera omu maisho.

⁴ Omugambilizi agamba n'eiraka lihango ati, “Inywe bantu b'amahanga n'enganda, n'ab'endimi zitali zimoi, nimuragirwa:

⁵ Orwo murahulira amakondere, enkuli, enanga, emilere, enyimba, eningili n'ebikwato byona by'omuziki eby'engeli ezisigaire mugwe ahansi mufukamire ekishushani ky'ezahabu eky'Omukama Nebukadineza ataireho;

⁶ wena arayanga kugwa ahansi kukifukamira aho n'aho baramunaga omu tanuru elikumengeta omuliro.”

⁷ Aha rw'ekyo embaga yona, ab'amahanga n'enganda, n'ab'edini zitali zimoi, kabahuliire amakondere, enkuli, enanga, emilere, enyimba na buli kikwato ky'omuziki, bagwa ahansi bafukamira ekishushani ky'ezahabu eky'Omukama Nebukadineza yataireho.

⁸ Omu kanya ako Abakalidayo bamoiho baija balega Abayahudi.

⁹ Baija obuso bagambira Omukama Nebukadineza bati, “Kamelere Rugaba!

¹⁰ Waitu Mukama, oragire buli muntu arahulira amakondere, enzamba, enanga n'ebikwato by'omuziiki ebisigaire, kugwa ahansi akafukamira ekishushani ky'ezahabu;

¹¹ kandi okwo arayanga kugwa ahansi kukifukamira bamunage omu tanuru elikumengeta omuliro.

¹² Haliho Abayahudi nanka abo wataireho kulebelera omukoa gwa Babiloni nabo ni Shediraki, Meshaki na Abedinego, bayanga. Rugaba, abashaija abo tibalikukukunira n'akake. Tibalikufaho baruhanga bawe n'akake; nangu n'ekishushani ky'ezahabu eky'otaireho tibalikukunda kukifukamira.”

¹³ Aho Nebukadineza asinsimuka, aragira kuleta Shadiraka, Meshaki na Abedinego. Babaleta obuso.

¹⁴ Nebukadineza ababaza ati, “Ky'amazimakwo iwe Shadiraka, Meshaki na Abedinego timulikukolera baruhanga bange mara nimwanga kufukamira ekishushani ky'ezahabu ekyo ntaireho?

¹⁵ Mbwenu kamuraba muragwa ahansi orwo murahulira enzamba, n'enkuli, n'enanga, n'amakondere, n'emilere, n'amalimba n'ebikwato byona by'omuziiki, mukafukamira ekishushani ekyo mpesire, aho ebigambo biraba bihoire; kyonkai kamutakifukamire, barabatwara bwangu babanage omu tanuru elikumengeta omuliro. Ni ruhangaki arabaihya omu mikono yange?”

¹⁶ Shadiraka, Meshaki na Abedinego bahorora Omukama bati, “Rugaba Nebukadineza, titulikwetaga kuhorora aha kigambo ekyo.

¹⁷ K'oratunaga omu tanuru elikumengeta omuliro, Ruhanga waitu owo tukolera aratujuna. Kandi Mukama osingire, Ruhanga ogwo aratwiha omu mikono yawe.

¹⁸ Nawe k'araba atatukoleire atyo, okimanye waitu Mukama okwo tutakolere baruhanga bawe anga kufukamira kishushani kya zahabu ekyo otaireho.”

¹⁹ Aho Nebukadineza asinsimuka, amaisho gamutukura aha rwa Shadiraka, Meshaki na Abedinego. Aragira kukanyisa etanuru emirundi mushanju kushaga okwo yahembwaga.

²⁰ Ashuba aragira abashaija ebishoka ab'omw'ihelye kukoma Shadiraka, Meshaki na Abedinego kubanaga omu tanuru elikumengeta omuliro.

²¹ Aho babakoma, okwo bajwete emyendo yabo: Ekanzu, ebebo, ekofira n'emyendo endijo, babanaga omu tanuru elikumengeta omuliro.

²² Etanuru y'omuliro ekaba neyokya muno munonga nk'okwo Omukama yaragiire. Omuliro gurambaramba abanagiremu Shadiraka, Meshaki na Abedinego,

²³ kyonkai Shadiraka, Meshaki na Abedinego, abashatu aba bagwa omu muliro okwo babohirwe.

²⁴ Aho Omukama Nebukadineza atangara, abaratuka. Agambira abantu ati, “Titwanaga mu tanuru bantu bashatu bakomire?” Bamuhorora bati, “Rugaba nikwo!”

²⁵ Abahorora ati, “Kyonkai inye nimbona abantu banai nibagendagenda omu muliro, kandi tibalikuhya; n'emibonekere y'owa kanai neshusha omoiho omu baruhanga.”

²⁶ Aho Nebukadineza agoba aha munwa gw'etanuru elikumengeta omuliro, agamba ati, “Inywe Shadiraka, Meshaki na Abedinego, abakozi ba Ruhanga Rukirabyona, rugayo, mwije aha.” Shadiraka, Meshaki na Abedinego baruga omu muliro.

²⁷ Abagavana, abami n'abaramata b'Omukama bahurura, babona abashaija abo tibayokibwa muliro. Eishoke lyabo tilyababuukire n'emyendo yabo tiyabaire kantu, kandi tibanukire rwika.

²⁸ Nebukadineza agamba ati, “Asingizibwe Ruhanga wa Shadiraki, Meshaki na Abedinego, ayatuma omumalaikawe kwihura abairube abamwesiga; kandi ebyo ndagiire akabisheshamu amaizi, bakaikiliza kufa kushaga kufukamira baruhanga abandi shana Ruhanga owabo.

²⁹ Aha rw'ekyo nintaho omuku ogu: Omuntu wena wena anga eihanga anga orulimi abalirogota ahali Ruhanga wa Shadiraka, Meshaki na Abedinego achwagachwagurwe, n'enjuye ekamburwe; taliyo ruhanga ondijo ashobora kurokora bantu ati.”

³⁰ Aho Omukama akuza Shadiraki, Meshaki na Abedinego omu mukoa gwa Babiloni.