Danieli 2 - Ebibulia 2001

Ekiroto kya Nebukadineza

¹ Omu mwaka gwa kabili Nebukadineza agiire aha ngoma, arota ebiroto. Ebiroto ebyo bimubangaranisa, oturo tubura.

² Aho Omukama atumaho abafumu n'embandwa b'Abakalidayo baije bamushoborore ekirotokye, baija bemelera omu maishoge.

³ Omukama abagambira ati, “Ndosire ekiroto kyambangaranisa omwoyo, ningonza kumanya enshonga yakyo.”

⁴ Aho Abakalidayo bagambira Omukama bati, “Kamelere Rugaba, rotorolera abairu bawe naichwe twije tukushoborore.”

⁵ Omukama abahorora ati, “Ebyo ndikugamba ti bya muzano. Kamutangambire nshonga ya kiroto kyange nimbatematema kandi n'amaju ganyu ningakambura.

⁶ Kyonkai kamuranshoborora ekiroto ekyo, ndabarongora nshube mbahe ekitinwa kingi. Aha rw'ekyo mungambire enshonga y'ekiroto ekyo.”

⁷ Bamuhorora omurundi gwa kabili bati, “Waitu rotorolera abairu bawe ekiroto kyawe naichwe tukitoitore.”

⁸ Omukama abahorora ati, “Nimanyage okwo mulikwenda kwita eibanga kushai kyonkai mumanye okwo ntalikugamba bya muzano,

⁹ okwo kamutangambire nshonga ya kiroto ekyo taliho kindi shana inywena kwitwa. Mwatensize kwikara nimubeiya nimushubira ngu birahinduka kuhonderana n'eibanga kurabaho. Mpahonu ngambira ekiroto ekyo nanye ndamanya okwo murashobora kukitoitora.”

¹⁰ Abakalidayo bahorora Omukama Nebukadineza bati, “Waitu omu nsi egi talimu muntu n'omoi ayakushobora kugambira Mukama kigambo ekyo nk'okwo olikuragira. Takabagaho Mukama, alikaba muhango ngeliki anga aina bushoboraki arabalize bafumu anga mbandwa anga Bakalidayo kigambo nk'ekyo.

¹¹ Eky'Omukama alikubaza kigumire, ow'okushobora kukitoitora taliho shana baruhanga abatatura mu nsi.”

¹² Ekyo kitamisa muno Omukama, ashanshamuka, agira ekiniga kingi, aragira abamanyi bona omuli Babiloni baitwe.

¹³ Aho omuku gurabaho, abamanyi bona kwitwa. Bahiga Danieli na batahibe nabo kubaita.

Ruhanga nayoleka Danieli enshonga y'ekiroto

¹⁴ Arioko omukuru w'abalinzi ayatumirwe kwita abamanyi bona omuli Babiloni, kayaizire ahali Danieli, Danieli omu bwegendeleza bungi n'obumanyi

¹⁵ amubaza ati, “Waitu, kubaki Omukama ataireho omuku gw'okushasa abantu nk'ogu?” Aho Arioko abimanyisa Danieli.

¹⁶ Danieli ataha omu kikare ashaba Omukama amuhe akanya, aije abone kumugambira enshonga y'ekirotokye.

¹⁷ Aho Danieli agenda omwe abimanyisa batahibe Hanania, Mishaeli na Azaria,

¹⁸ abagambira batagilize Ruhanga asingiire omw'iguru abashoborore ekyebisho eki, Danieli na batahibe baleke kusilikirana n'abamanyi abali omuli Babiloni.

¹⁹ Aho honkai omu kiro Danieli abonekerwa ashurulirwa ekyesho ekyo. Aho asingiza Ruhanga asingiire omw'iguru

²⁰ nagamba ati, “Eibara lya Ruhanga lisingizibwe eirai n'eirai, obumanyi n'amani bina wenene.

²¹ Ahindura amakiro n'ebirumo, aihyaho abakama aha nketo ataho abandi, abamanyi abaha obumanyi, n'ab'amagezi bagahabwa wenene.

²² Amanyisa ebyebisho ebili harai, amanya ebili omu mwilima, kandi omuli wenene guba mushana.

²³ Waitu Ruhanga wa batat'emukuru, ninkusima kandi ninkusingiza, kuba wantunga amani n'obumanyi, washuba wammanyisa ekyo twakushaba, watumanyisa ekilikwita kubi Nebukadineza.”

²⁴ Danieli agenda ahali Arioko ayatairweho Omukama kwita abamanyi omuli Babiloni, amugoba amugambira ati, “Otaita bamanyi muli Babiloni, ekiliho iwe ontware obuso, ngye mushoborore amakuru g'ekiroto.”

²⁵ Aho Arioko arahuka atwara Danieli obuso, wenene ashuba agambira Omukama ati, “Omu Bayahudi abazahe mboinemu omushaija alikushobora kushoborora Omukama ekirotokye.”

²⁶ Omukama abaza Danieli ayayetwaga Beliteshaza ati, “Iwe noshobora kungambira ekyo ndosire n'enshonga yakyo?”

²⁷ Danieli ahorora Omukama ati, “Taliho mumanyi anga mbandwa anga mufumu anga babuya b'ebikwete aha nyanyinyi ayakushobora kwoleka Omukama ekyebisho ekyo alikubaza.

²⁸ Shana haliyo Ruhanga asingiire eiguru ashurura ebyebisho n'iwe amanyisize Omukama Nebukadineza ebilibaho omu biro ebilija.

²⁹ Rugaba, orwo obaire obyamire aha kitanda oizire watekeleza ebilibaho omu biro ebilija. Ruhanga ashurura ebyebisho n'iwe akumanyisize ebilibaho.

³⁰ Kyonkai inye aha rwange timbishurulirwe aha rw'okuba ndi muntu w'obumanyi kukira abandi bona, nawe byaba bityo Omukama amanye enshonga yabyo mara amanye ebyo alikutekeleza aha mutima.”

³¹ “Rugaba, oboine ekishushani kihango. Ekishushani ekyo kibaire kiina amani, nikimyansa muno kyakwemelera omu maisho, emibonekere yakyo netinisa.

³² Omutwe gwakyo gubaire guli gw'ezahabu enchenkure, ekifuba n'emikono by'efeza, eibunda n'ebibero by'omulinga,

³³ amaguru gakyo gabaire gali g'ekyoma n'ebilenge byakyo bibaire bili by'ekyoma n'eibumba.

³⁴ Orwo obaire okilebire ahanantukwayo eibare lisikuka litatengiibwe muntu litera ebilenge by'ekishushani ekyo eky'ekyoma n'eibumba libyatayata.

³⁵ Ahanyuma ekyoma, n'eibumba, n'omulinga, n'efeza, n'ezahabu byona hamoi bisinjagulika bishusha omushunga aha byano omu kyanda. Aho omuyaga gubitwara harai biba bitakizoka n'akake. Kyonkai eibare eliteire ekishushani ekyo lihindukire ibare lihango, eibare elyo lyamaraho ensi yona.”

³⁶ “Eki nikyo kiroto. Mbwenu twaija kukitoitorolera Omukama.

³⁷ Waitu Rugaba, oli Mukama atwara abakama! Ruhanga asingiire omw'iguru akakutunga obukama, n'obushobora, n'amani n'ekitinwa,

³⁸ yamara yakukwasa abantu bona mbali baraba batura, yakutunga ebigunju n'ebinyonyi, yakuhindura Mukama wabyo byona. Iwe n'iwe mutwe gw'ezahabu.

³⁹ K'oliba wahoireho, Omukama ow'olikukiza amani n'iwe alilya engoma egi, n'ahanyuma halihonderwaho Omukama wa kashatu n'iwe mulinga alitwara ensi yona.

⁴⁰ Halihonderwaho Omukama wa kanai, ow'amani nk'ekyoma, kuba ekyoma kyata buli kantu, kisinjagulikya ebintu byona. Omukama wa kanai alishusha ekyoma nikyata ebintu, alisilikya abakama bona aba karai.

⁴¹ Oboine okwo ebilenge n'ebyara byakyo bibaire bili by'eibumba, kandi oku by'ekyoma, nikwo n'obukama buliba: Oku buligira amani kandi oku bulyoroba.

⁴² Kandi nk'okwo ebyara by'amaguru bibaire bili by'ekyoma n'eibumba nikwo engoma egyo eliba. Ekichweka ekimoi kiligira amani kandi ekindi kijegare.

⁴³ Oboine ekyoma kitabirainwemu eibumba, nikwo abatwazi b'engoma egyo balisiigirana, babe bamoi, kyonkai tibaliikara babaire bamoi nk'okwo ekyoma kitajwangana na ibumba.

⁴⁴ Kandi omu mirembe y'abakama abo, Ruhanga asingiire omw'iguru alitaho obukama obundi obutalirugaho eirai lyona. Obukama obwo tibulisingwa ngoma zindi nawe bwonene bulisinga, nirwo bwonene bulikaraho eirai lyona.

⁴⁵ Oboine eibare elyehilingisize kuruga omw'ibanga, lyashuba lyayatayata ekyoma, omulinga, eibumba, efeza n'ezahabu. Manyasi Ruhanga omukuru akumanyisize ebilibaho ahanyuma. Ekiroto kilikwo, n'omwitoitoro gwakyo nigwo gwonene.”

Nebukadineza narongora Danieli

⁴⁶ Omukama Nebukadineza agwa ahansi ajumaire aramya Danieli, nangu aragira abantu kuhongera Danieli n'okumwotera obunuma.

⁴⁷ Nebukadineza agambira Danieli ati, “Mazima Ruhanga wawe ni Ruhanga akira baruhanga bona, n'iwe Mukama w'abakama, n'iwe amanyisa ebyebisho, orwo iwe washobora kutumanyisa ekyebisho eki.”

⁴⁸ Nebukadineza aha Danieli ekitinwa kya buli ngeli, amuha n'ebintu. Amuhindura kuba gavana w'omukoa gwona gwa Babiloni mara mukuru w'abamanyi bona omuli Babiloni.

⁴⁹ Kyonkai Danieli ashaba Omukama eby'obutwazi bw'omukoa gwa Babiloni kubikwasa Shadiraka, Meshaki na Abedinego, wenene Danieli aikara omu kikaare.