Danieli 10 - Ebibulia 2001

Danieli nabonekerwa aha Mwiga gwa Tigirisi

¹ Omu mwaka gwa kashatu Koreshi Omukama wa Perisia aliire engoma, Danieli owo bayetaga Beliteshaza, agya ashurulirwa ekigambo. Ekigambo ekyo kikaba kili ky'amazima, nikimanyisa okwo haliho endashana y'amani. Wenene akishobokerwa, ashobokerwa n'ebyo yabonekeirwe.

² Omu biro ebyo, inye Danieli, nkamara amalimansi gashatu ninchura.

³ Amalimansi gashatu entute tinaliire kyakulya kishaire, tinaliire nyama, tinanyoire divai, n'amajuta tinazilize kugesiiga.

⁴ Aha kiro kya makumi gabili na binai omu mwezi gwa mbere, nyemeleire aha rukungu rw'Omwiga guhango gwa Tigirisi,

⁵ kugya kunaga amaisho mbona omuntu ajwete kitani (omu nyugunyu) ayekomire omukandara gw'ezahabu ya Ufazi.

⁶ Omubili akaba nashusha beruro, aha maisho nashusha orurabyo, amaisho gonene muli z'omuliro, emikono n'amaguru mulinga gumunywire, k'alikugamba eiraka wakumanyire mbaga yona.

⁷ N'inye nyenkai ayabonekeirwe. Abo nabaire nyinabo ebyo naboine tibabiboine. Kyonkai kandi bakachundwa muno, bairuka bayesheleka.

⁸ Kityo kabairukire, inye nasigara nyenkai, nabona ebishobeize n'amani gampwamu. Nkaba ntakyera aha rw'obutini, nayoroba jegejege.

⁹ Ahanyuma mpulira Gaburieli nangambira, nirwo najumaire ahansi nkanagira oturo tungi muno.

¹⁰ Omumalaika anyimukya kyonkai nyikara nsimbire emikono n'amaguru, ndi omu rujugumbo.

¹¹ Yangira ati, “Iwe Danieli, omushaija endonkwa, orayekomya ebyo ndakugambira, mara oyemelere kurungi, kuba bakuntumaho.” Kayabaire ali omu kungambira atyo, nyemelera njugumba.

¹² Angira ati, “Otatina Danieli. Kwema kiro ekyo wataireho amani kushobokerwa n'okwetohya ahali Ruhanga, eby'ogambire abihuliire; kandi kyonene ekyo nikyo kyandeta.

¹³ Omumalaika omulinzi w'engoma ya Perisia amazire ebiro 21 nampakanisa. Kyonkai Mikaili, omoiho omu bamalaika bakuru, aizire yanjuma. Nikwo inye kumusigaho n'omumalaika omulinzi w'engoma ya Perisia

¹⁴ nkaija kukumanyisa ebiligwa aha ihanga lyawe omu makiro agalija. Eby'oboine omu kubonekerwa tibilikwija kubaho juba, biligobelera irai.”

¹⁵ K'amara kungambira atyo ndeba ahansi, nkuba orulimi.

¹⁶ Ahanyuma omumalaika emishusire muntu, ankwata aha minwa, nkinguka akanwa, mbanza kugamba. Okwo akanyemeleire omu maisho mugambira nti, “Mukama wange, ebyo mboine omu kubonekerwa bindeteire obunenwa, n'amani tinyinago.

¹⁷ Omwiru wawe taina gagamba na iwe. Tinyina mani, ninyorobelera muno.”

¹⁸ Omumalaika nashusha omuntu ashuba ankwataho, angumisa.

¹⁹ Angira ati, “Iwe mushaija endonkwa, otatina; gira emilembe, ogume, omanzare.” Kumara kungambira atyo, nguma, nshuba mugira nti, “Hanga, Rugaba, kuba amani wagantungire.”

²⁰ Ambaza ati, “Ekyandeta ahali iwe nokimanya? Mbwenu nagarukayo, ngye ndashane n'omumalaika omulinzi w'engoma ya Perisia. Kandamara kumusinga, aho omumalaika omulinzi w'engoma ya Bugiriki yaija.

²¹ Kyonkai ebihandikire omu Kitabo ky'Amazima ninyija kubikugambira. Kandi ow'okunyemamu kurashanisa abamalaika abalinzi ab'engoma ya Perisia na Bugiriki taliho, shana Mikaili wenkai, omumalaika mulinzi wa Isiraeli.”