Danieli 1 - Ebibulia 2001

Danieli na batahibe omu kikaare kya Nebukadineza

¹ Omu mwaka gwa kashatu, Yehoyakimu Omukama wa Yuda alire engoma, Nebukadineza Omukama wa Babiloni atabalira Yerusalemu agibunda.

² Ruhanga anaga Yehoyakimu Omukama wa Yuda omu mikono ya Nebukadineza n'ebikwato bimoiho bya Rwensinga. Nebukadineza abileta omu nsi ya Babiloni, abiteka omuli rwensinga ya ruhangawe, abibiika omuli buhanika ya rwensinga egyo.

³ Omukama Nebukadineza aragira Ashipenazi omukobe mukuru kutwara Abaisiraeli, ab'oruganda rw'obukama n'abarangira n'abandi.

⁴ Abasigazi abataina kamogo, bemirege, mara ababuya aba buli ngeli, abaina obumanyi bungi, enshobokerwa abakugasha kukora omu kikaare ky'Omukama, abo begesibwe kushoma n'okuhandika Orukalidayo.

⁵ Omukama aragira bahabwe ebyakulya buli kiro aha nkorogo y'Omukama n'edivai eyo wenene yanywaga. Begesibwe emyaka eshatu, n'aha nzindo y'elyega elyo babalete bakolere Omukama.

⁶ Omuli abo ni Danieli, Hanania, Mishaeli na Azaria, ab'oruganda rwa Yuda.

⁷ Omukobe mukuru abashambagiza. Danieli emweta Beliteshaza, Hanania emweta Shadiraki, Mishaeli emweta Meshaki na Azaria emweta Abedinego.

⁸ Kyonkai Danieli ayanga limoi limoi kulya n'okunywa aha nkorogo ataija akahagara. Aha rw'ekyo atagiliza omukobe mukuru k'amujubura kutalya aha nkorogo egyo, ataija akahagara.

⁹ Ruhanga asingira Danieli, aganja omukobe mukuru amukolera n'obufura;

¹⁰ amugambira ati, “Nintina Omukama wange agambire kamuhabwa ebyakulya n'edivai ataija akashanga mutebire kushaga abandi ab'omuteko gwanyu. Aho murannaga omu kabi, Mukama wange anyite.”

¹¹ Aho Danieli agambire omusigire w'omukobe mukuru ayabaire atairweho kulebelera Danieli, Hanania, Mishaeli na Azaria, ati,

¹² “Abairu bawe otulenge omu biro 10 notuha omulili n'eshwiga, tube nibyo tulya n'amaizi tube nigo tunywa.

¹³ Aho oije otulebe okwo turaba nitushusha aha maisho, ichwe chwenene n'abasigazi abalikulya aha nkorogo y'Omukama. Oshube okolere abairu bawe okwo orabona tuli.”

¹⁴ Ekigambo ekyo omusigire ogwo akikiliza, abalenga omu biro 10.

¹⁵ Ebiro 10 kabyahoire kiboneka bonene balige, bagomokire nibashaga abasigazi bona abalyaga aha nkorogo y'Omukama.

¹⁶ Kityo omusigire agarurayo ebyakulya by'aha nkorogo n'edivai ebyo bakulire bakanywa, abaha omulili n'eshwiga.

¹⁷ Abasigazi abo banai Ruhanga abasingira bamanya okuhandika kurungi bagira n'obumanyi. Okubonekerwa kwa buli ngeli n'ebiroto, Danieli yabishobokerwaga.

¹⁸ Akanya kakagobire ak'Omukama Nebukadineza yabaire aragire kababamuletera, omukobe mukuru abamuletera.

¹⁹ Omukama afumora nabo, kyonkai tihazokiremu n'omoi ow'okushusha Danieli, Hanania, Mishaeli anga Azaria. Aha rw'ekyo abanai barondwa kuba baramata b'Omukama.

²⁰ Buli kimoi kyona eky'Omukama yababalize, ekikwete obumanyi n'amagezi, akashanga nibakira emirundi 10 abamanyi n'embandwa zona ezabaire zili omu bukamabwe bwona.

²¹ Danieli akaikara omu buramata kulemwa kugoba omu mwaka gwa mbere ogw'Omukama Koreshi yaliliiremu engoma.