Amosi 9 - Ebibulia 2001

Eiramu ly'Omukama

¹ Nkabona Omukama ayemeleire aha rubaju rwa altare, yangambira ati, “Otere emitwe y'enyomyo za Rwensinga, enti z'emilyango zitengete. Emitwe egyo ogishekashekenyulire aha mitwe y'abantu bona. Abarasigaraho ndibaisa embanda. Taliho n'omoi aliruka, taliho n'omoi alihunga.

² Balikalima Sheoli bakagitaha, ndibaihyamu. Balikatemba bakagoba aha iguru, nayo ndibahananturayo.

³ Balikesheleka aha Ibanga lya Karimeli aha katwetwe, ndibahonderayo mbaihyeyo. Balikanyesheleka mu nyanja okuzimu, ndiragira enjoka ebatemereyo.

⁴ Ababisha babo balikabafunya bakabatwara omu buzahe, ndisindikayo endashana bagwe aha mbanda. Ndiguma mbataireho elisho kubakora kubi, kutali kubakorage.”

⁵ Omukama Ruhanga w'amahe, ogwo akwataho ensi ekagilira, abagitwiremu bona bakachura, ensi egyo yona ekaijura nka Naili, ekashuba ekaijuruguka nk'omwiga ogwo gwa Misiri.

⁶ Ayayombekire omwe aha iguru, kandi omusingi gw'eiguru gwemire ahansi; Ayeta amaizi g'enyanja akagashesha aha rukaru, eibaralye aba Mukama!

⁷ Omukama nagamba ati, “Inywe Baisiraeli, ahali inye nimushusha Abaetiopia. Nk'okwo inywe nabaihire Misiri, nikwo Abafilisiti nabaihire Kafutori, n'Abasiria nkabaihya Kiri.

⁸ Inye Omukama Ruhanga, amaisho ngataire aha bukama bwanyu bwa Isiraeli obw'abafakare. Ndibusilikya mbuchwe omu nsi, kyonkai si baijukuru ba Yakobo tindibasilikiza kimoi. Alikugamba n'inye Omukama.”

⁹ “Nditaho omuku Abaisiraeli omu mahanga gona mbachechebe okwo omuntu achecheba engano omu kayungiro kyonkai enjuma n'emoi etaragaire hansi.

¹⁰ Omw'ihanga lyange bona abaliba bali bafakare, abagira bati, ‘Tuliba tubaki anga akabi kaliba katwiyahai,’ balitwa embanda.”

Ruhanga nashubiza Abaisiraeli kubaihya omu buzahe

¹¹ “Makiro ago ndimukya engoma ya Daudi elikushusha enju ekumbire ekasigara amatongo. Engoma egyo ndishuba ngiteho nk'okwo yabaire eli obunyakarai.

¹² Kityo Abaisiraeli balisinga ekichweka kya Edomu ekiliba kisigaireho n'amahanga gona agabaire gaba gange.” Omukama alikora ebi niwe alikugamba.

¹³ Omukama nagamba ati, “Amakiro galija orwo engano elyera bwangu omu kirumo eky'etayeleramu, n'ezabibu zihise omu kirumo ekyo zitajungirwamu. Amabanga galirugwamu edivai elikunura, eligera omu nshozi zona.

¹⁴ Ndigarura abantu bange ba Isiraeli abaliba batwetwe omu buzahe, baligaruka bombeke ebigo ebiliba bikambukire babituremu. Balibyara emizabibu baginyweho edivai, balime emisiri, beze balye.

¹⁵ Ndishusha alikubabyara omu nsi yabo, tibalishuba kukuurwa rundi mu nsi eyo nabahaire.” Alikugamba Mukama Ruhanga wanyu.