Amosi 6 - Ebibulia 2001

Okusilika kwa Isiraeli

¹ Balikabona abali Sioni bagoijagiire, n'abatwire aha Ibanga lya Samaria bataina kyobalikwechura, abashaija enyanwanwa ab'amahanga gakuru ag'Abaisiraeli bairukira.

² Mushabuke mugye Kalune mulebe; murugeyo mugye Hamati enkuru; ahanyuma musongoke Gati ey'Abafilisiti. Nimulenga muti ebigo ebyo nibishaga engoma ezi? Anga kugira muti ensi yabyo nekira eyanyu obuhango?

³ Nimwanga kwikiliza okwo ekiro ky'enaku kilija, kyonkai ebyo mulikukora nibyo bilikukiiliza haihi.

⁴ Zilibalya ababyama aha bitanda by'emiino y'enjoju, bakegorolera aha bitabo byabo, nibaihya obwana bw'entaama omu kisibo nibalya, enyana nibaihya omu kihongore.

⁵ Batera enanga nibazina ebizina bitainya ndyo, nibabuyabuya ebikwato by'omuziiki nka Daudi;

⁶ edivai nibaginywera omu pakuli, nibesiiga amajuta agarungi muno, kyonkai okuranduka kw'oruganda rwa Yozefu tikulikubanena!

⁷ Aha rw'ekyo nibo baliba ba mbere kugya omu buzahe, n'amalili g'abagoijagira galihwaho.

⁸ Omukama Ruhanga w'amahe ayerahiire nagamba ati, “Nintamwa kubi eikuru lua Yakobo, n'ebomaze nizintama. Kandi ekigokye ekikuru ndikihyamu emikono n'ebikilimu.”

⁹ K'abantu ikumi balisigara omu nju balifa bona.

¹⁰ Omunyabuzare wa kifa aliba ali mukuru w'emichonchozo y'okuziika, alihya omutumbi omu nju. Alishuba ayete aliba asigairemu namubaza ati, “Haliho ow'oinawe okwo?” Ogu alyemayo amuhorore ati, “Chei.” Ahanyuma omunyabuzare ogwo aligamba ati, “Murayesiza! Twelinde tutakugamba ibara lya Mukama.”

¹¹ Orwo Omukama alihanga, amaju agake n'agahango galisinjagulika.

¹² Efarasi ziirukira aha mabare? Omuntu aralimisize ente omu nyanja? Mbwenu inywe amazima mugahindwire mashagwa, ebirungi mwabihindura bibi.

¹³ Nimwesima okwo mukwete ekigo kya Lodebari. Nimweshalinga muti, “Karinaimu tugikwete aha rw'amani gaitu.”

¹⁴ Mbwenu Omukama Ruhanga w'amahe nagamba ati, “Oraleba iwe ihanga lya Isiraeli, ndikusindikira eihanga, likweme aha mbandizo ya Hamati nilikubonesa enaku likuturuke aha Kaiga ka Araba.”