Amosi 5 - Ebibulia 2001

Abaisiraeli nibagambirwa kwechuza

¹ Iwe ihanga lya Isiraeli, hulira ninkuchulira:

² “Omwisiki Isiraeli agwire, taliimuka rundi. Takiijukwa mwabo, mara taliho wa kumwimukya.”

³ Kuba Omukama Ruhanga nagamba ati, “Omw'ihanga lya Isiraeli, ekigo ekirugwamu abaisherukale 1,000 bakatabara, kilisigara na 100. Ekirugwamu 100 kilisigara na 10.”

⁴ Kuba Omukama nagambira eihanga lya Isiraeli ati, “Mumpige murore.

⁵ Betheli mutagyayo, anga kugya Giligali, n'orwo kwakuba okugya Berisheba. Aha rw'okuba Giligali eligya omu buzahe, kandi Betheli elihwaho.”

⁶ Muhige Omukama murore, atalija akabaliira oruganda rwa Yozefu nk'omuliro. Gutalija gukokya abantu ba Betheli, mara ow'okuguraza akabura.

⁷ Zabalya inywe abatalikukoza mazima. Nimugobeza abantu, nimubaaka ehaki zabo!

⁸ Ayatonzire enyanyinyi za Puleyadesi na Orioni, aihyaho omwilima elindindi obwire bukakya, nyemishana akagihindura kiro, atuuma amaizi g'enyanja akagatuuma aha rukaru; eibaralye aba Mukama.

⁹ Ab'amaani abasilikya bataraliire, n'ekigo ky'eboma kiranduka.

¹⁰ Abantu alikubahanira aha kihigi nibamunoba, n'alikugamba amazima nibamutamwa.

¹¹ Orwo mulikulibatilira abanaku mukabaihyaho n'engano, amaju g'amabare gabaizire timuligaturamu. Mulimire endimiro zirungi z'emizabibu, kyonkai timuliginywaho divai.

¹² Nimanya okwo entambara zanyu zili zingi n'okwo amafu ganyu gasikire. Inywe abalikubonesa abarungi enaku, mukalya na rushwa; kandi abajege nimubateza enkokora omu bihigi, nimbamanya!

¹³ Aha rw'ekyo enyegendeleza erayesiza, kuba akanya ako kabi.

¹⁴ Mukore ebirungi muleke ebibi, nirwo murarora. Omukama Ruhanga w'amahe araikara nainywe nk'okwo mumugamba.

¹⁵ Munobe ebibi mugonze ebirungi; aha bigi mukolereho eby'amazima. Aho rundi Omukama Ruhanga w'amahe yakusingira ab'oruganda rwa Yozefu abasigaireho.

¹⁶ Omukama Ruhanga w'amahe nagamba ati, “Hona mbali akatare kali abantu balichura, kandi omu mbarabara zona baligamba bati, ‘Ai bambi! Ai bambi!’ Abaliba bagiire kulima balibeta omu rufu, kwakwo n'abalikumanya kutongya balibeta kuchura.

¹⁷ N'omu ndimiro z'emizabibu balichura, ndibabonabonyia.” Alikugamba Mukama.

¹⁸ Mulikagwamu inywe abalikuramiliza ekiro ky'Omukama ky'eiramu! Mbwenu ekiro ekyo ky'Omukama nimukyenderaki? Ekyo kiliba kiro ky'omwilima, tikiliba kya mushana.

¹⁹ Biliba okw'obona omuntu airukire entare akagwa aha dubu. Anga bilishusha omuntu agire omu nju akegamira orukuta arutaireho omukono, enjoka ekamutema.

²⁰ Ekiro ekyo ky'Omukama guliba mwilima, tiguliba mushana. Guliba mwilima ogutainamu kakuhengezamu.

²¹ “Amagenyi ganyu ngatamwa, ngagaya. Kandi okuterana kwanyu kw'enshara tikulikunshemelera n'akake.

²² Mulikampongera bitambo byanyu bya kwokibwa, n'ebihongo byanyu by'emyaka, timbikunde. N'ebihongo byanyu by'emilembe eby'ente n'eshajwa timbilebe.

²³ Munyiheho eyombo y'empoya zanyu. N'enanga zanyu ezilikujuga tinzihulilize.

²⁴ Shana mukore ebirungi bigere nk'amaizi, mukore ebishemeire bigere nk'omugera gwasire.”

²⁵ “Inywe ihanga lya Isiraeli, ninye mwaleteraga ebitambo n'ebihongo omu myaka 40 omw'irungu?

²⁶ Mulishutura Sakuti omukama wanyu, na Kaiwani enyanyinyi ruhanga wanyu, ebishushani ebyo mwayekoleire.

²⁷ Aha rw'ekyo ndibatwara buseli bwa Damasiko omu buzahe.” Alikugamba Mukama; Ruhanga w'amahe nilyo ibaralye.