Amosi 3 - Ebibulia 2001

¹ Inywe Baisiraeli muhulire ebyo ndikubagambaho, eihanga lyona elyo naihire Misiri:

² “Omu mahanga gona omu nsi manya inywe. Aha rw'ekyo ndibabonabonyia mbature entambara zanyu.”

Omulimo gw'omurangi

³ “Abantu babili bakugenda babili batategekire kugira batyo?

⁴ Isi entare yakwema omu kibira esinda etaisire? Ekyana kyayo kyakururumira omu mpako kitaina kyokikwasire?

⁵ Enyonyi yakugwa ahansi omu mutego gutategire? Isi omutego gwonene gwakubarashuka gutaina kyogukwasire?

⁶ Enzamba yakujuga omu kigo abantu batatinire? Isi ekigo kyonene kyakugwerwa akabuta Omukama atakikateize?

⁷ Omukama taina ky'akora atabandize kusherulira bairube abarangi enamaye.

⁸ Entare yamazire kusinda, atatine n'ohai? Omukama Ruhanga yagambire; n'ohai arabura kuranga?”

Ekibonabonyio kya Samaria

⁹ Mugambire aba Asiria na Misiri omu bigo by'eboma muti, “Muhurulire aha mabanga ga Samaria, mubone okwo halimu etabangu nyingi, mubone n'okwo balikubonesangana enaku.”

¹⁰ Omukama nagamba ati, “Ab'omu boma abakora obukatili nibaka banu ebyabo, tibamanya kukora kurungi.”

¹¹ Aha rw'ekyo Omukama Ruhanga nagamba ati, “Omubisha alizingora ensi yona, enkuta zawe ezikulinda azikumbye, kandi eboma zawe azinyage.”

¹² Omukama nagamba ati, “Okwo omushumba ayaka entare omu kanwa kayo obuguru bubili bw'entaama anga okutwi kwayo, nikwo ndirokora ntyo Abaisiraeli ba Samaria abali omu bitebe bagoijagiire.”

¹³ Omukama Ruhanga w'amahe nagamaba ati, “Hulira oshube otatire baijukuru ba Yakobo

¹⁴ okwo kiro ekyo ndibabonabonyia kubatura amafu gabo, ndikambura altare za Betheli, nziteme amahembe gagwe ahansi.

¹⁵ Enju ey'ekirumo ky'omunena n'ey'ekyanda ndizikambura; kumoi n'enju z'emino y'enjoju zilitemwa, kutyo n'amaju agahango.” Alikugamba Mukama.