Amosi 1 - Ebibulia 2001

¹ Amosi omushumba wa Tekoa, ebigambo ebi ebikwete ahali Isiraeli, akabibona omu makiro g'Omukama Uzia owa Yuda, n'Omukama Yeroboamu eya Yoashi owa Isiraeli, emyaka ebili eyayebembeire omusisi.

² Akagamba ati, “Omukama ayemire Sioni nasinda, nataishura eiraka ayemire Yerusalemu. Amalisizo g'abashumba nigachura, n'akatwetwe ka Karimeli kahotoka.”

Eiramu ly'Omukama ahali batabani ba Isiraeli Siria

³ Omukama nagamba ati, “Aha rw'abantu ba Damasiko kwikara nibafakara, tindiburwa kubabonabonyia. Kuba bakozire kubi abantu ba Gileadi, babakoleire obukatili obutabayo.

⁴ Kityo ekikaare kya Hazaeli ndikichumika omuliro, gwokye n'eboma za Benihadadi.

⁵ Emihingo ya Damasiko ndigihyenda, abanyansi b'Oruhanga rwa Aveni mbaihemu, n'akwete enkoni y'obukama mwihye Betiedeni. Kandi abantu ba Siria baligya Kiri omu buzahe.” Alikugamba Mukama.

Filisitia

⁶ Omukama nagamba ati, “Aha rw'abantu ba Gaza kwikara nibafakara, tindiburwa kubabonabonyia. Kuba bakwasire eihanga lyona baliguza abantu ba Edomu.

⁷ Kityo enkuta za Gaza ndizitaho omuliro, gulyokya n'eboma zayo.

⁸ Abanyansi omuli Ashidodi ndibaihyamu, n'akwete enkoni y'obukama omuli Ashikeloni ndimwihyamu. N'ekigo kya Ekironi ndikitera, kandi ensigalira z'Abafilisiti ziliranduka.” Alikugamba Mukama.

Tiro

⁹ Omukama nagamba ati, “Aha rw'abantu ba Tiro kwikara nibafakara, tindiburwa kubabonabonyia. Kuba bakwasire eihanga lyona baliguza abantu ba Edomu, tibaijuka ndagano yabo ya mukago.

¹⁰ Kityo enkuta za Tiro ndizitaho omuliro, n'eboma zayo guzisosotore.”

Edomu

¹¹ Omukama nagamba ati, “Aha rw'abantu ba Edomu kwikara nibafakara, tindiburwa kubabonabonyia. Enshonga baikara nibarashanisa barumuna babo Abaisiraeli, taliho rwo babagilira buganyizi. Ebiro byona batura babatamirwe, bakabagilira enzigu.

¹² Kityo ekigo kya Temani ndikichumika omuliro, gulyokya n'eboma za Bozira gulizisosotora.”

Amoni

¹³ Omukama nagamba ati, “Aha rw'abantu ba Amoni kwikara nibafakara, tindiburwa kubabonabonyia. Aha rw'okuba bakafumura abakazi b'enda amabunda omuli Gileadi, bagondize kulya ensi egyo.

¹⁴ Kityo enkuta za Raba ndizichumika omuliro, gusosotore n'eboma zayo. Endashana egyo elibateza eborogo, halibaho n'akazimu baterwe enkomaizi.

¹⁵ Omukama wabo aligya omu buzahe, aligenda n'abatwazibe.” Alikugamba Mukama.