Abaramuzi 8 - Ebibulia 2001

Gideoni naita abatwazi ba Midiani

¹ Abantu ba Efuraimu babaza Gideoni bati, “Kiki eki eky'otukozire, kutatweta orwo otabalire Abamidiani?” Bamukunganisa muno.

² Abahorora ati, “Inye nkozireki ekyo twakwiganisa n'ebyo inywe mukozire? Ezabibu z'okurondaronda eza Efuraimu tizilikukira ez'okuhurura eza Abiezeri?

³ Ruhanga abanagire omu mikono abakuru ba Midiani abalimu Orebu na Zeebu. Nkozireki ekyo twakwiganisa n'ebyo inywe mukozire?” Orwo yagambiire atyo ekiniga kyabo kihora.

⁴ Gideoni agoba Yorudani ashabuka n'abaisherukale 300 abo yabaire ainabo, balemirwe kyonkai babingire omubisha.

⁵ Aho agambira abantu ba Sukoti ati, “Nimbashaba mumpere abantu balikumpondera ekyakulya, aha rw'okuba balemirwe, mara nimbinga Zeba na Salumuna abakama ba Midiani.”

⁶ Abakuru ba Sukoti bamubaza bati, “Ichwe kuha eihe lyawe ekyakulya, wasingiire Zeba na Salumuna?”

⁷ Gideoni agamba ati, “Ahonu kayo, orwo Omukama araba yanagire Zeba na Salumuna omu mikono yange emibili yanyu ndagitaguza amahwa g'eirungu n'orukwatango.”

⁸ Aruga aho atemba Penueli, abagambira emigambire yonene egyo. Abantu ba Penueli nabo bamuhorora nk'okwo aba Sukoti babaire bamuhoroire.

⁹ Abagambira ati, “Kandaihurura eli milembe, ndakambura omunara ogu.”

¹⁰ Aho Zeba na Salumuna bhakaba bali Karikori hamoi n'eihe ly'abantu 15,000. Eli nilyo ihe ly'abantu b'oburugaizoba ababaire bahonokireho. Abafire baisherukale 120,000.

¹¹ Gideoni araba nyaihanda aha rubaju rw'eirungu oburugaizoba bwa Noba na Yogibeha; atera eihe litetegeire.

¹² Zeba na Salumuna abakama ba Midiani bairuka; ababinga abakwata, n'eihe lyona alitatamya.

¹³ Ahanyuma Gideoni eya Yoashi atabaruka, aletwa orushozi rwa Heresi.

¹⁴ Akwata omusigazi wa Sukoti amubaza; amuhandikira amabara g'abakuru n'abagurusi ba Sukoti, abashaija 77.

¹⁵ Agoba abantu ba Sukoti agamba ati, “Leba Zeba na Salumuna abo munjumisize nimugamba muti, ‘Ichwe kuha eihe lyawe alilemirwe ekyakulya, wasingiire Zeba na Salumuna?’ ”

¹⁶ Akwata abagurusi b'ekigo ashuba akwata amahwa g'eirungu n'orukwatango, abantu ba Sukoti abakora omulimo nakoza amahwa aga.

¹⁷ Omunara gwa Penueli agukambura, n'abanyakigo abaita.

¹⁸ Aho agambira Zeba na Salumuna ati, “Abashaija abo mwaitiire Tabori bhakaba bemire batai?” Bahorora bati, “Okwo oli, nikwo babaire bali bona. Bhakaba nibashusha abana b'omukama.”

¹⁹ Agamba ati, “Bhakaba bali barumuna bange, bana ba mawe. Obuso bw'Omukama kuba mwabahungize, inywe tinakubaisire.”

²⁰ Agambira Yetheri omuzigaijowe ati, “Imuka obaite.” Kyonkai omusigazi tiyashohoroire mbandaye enshonga hakaba akyali mulenzi.

²¹ Ahanyuma Zeba na Salumuna bagamba bati, “Oimuke iwe wenene otubundikire, aha rw'okuba okw'omushaija ayemire nikwo amanige gali.” Gideoni aimuka aita Zeba na Salumuna; atwara n'emilengyo y'enono eyabaire eli omu ngoto y'engamia zabo.

Eby'amalekeelera ga Gideoni

²² Abaisiraeli bagambira Gideoni bati, “Otutware, iwe na mutabani wawe na mwijukuru wawe, waturokora omu mikono y'Abamidiani.”

²³ Gideoni abagambira ati, “Timbatware, na mutabani wange tabatware, Omukama niwe arabatwara.”

²⁴ Ashuba abagambira ati, “Kambashabe ekintu kimoi, buli omoi omuli inywe aihye eheleni omu minyagoye azimpe.” (Abamidiani bhakaba baina eheleni z'ezahabu, aha rw'okuba bhakaba bali Baishimaeli.)

²⁵ Bahorora bati, “Twagondokerwa, turazikuha.” Bayara ekijwaro, buli muntu anagaho eheleni z'ezahabu naihya omu minyagoye.

²⁶ Obusikizi bw'eheleni z'ezahabu ezo yayenzire bukagoba nk'ekilo 20; emilengyo y'enono, obubare bw'eiguzi bw'omu bikya n'ebijwaro bya nyabagana ebyajwarwaga abakama ba Midiani ebyo bitabulimu, otatairemu na mikofu eyabaire ejwetwe engamia zabo omu ngoto.

²⁷ Gideoni aziheshamu efodi azita Ofura omu kigokye. Isiraeli yona egifukamira, kandi Gideoni n'ekaye ebanaga omu kabi.

²⁸ Abaisiraeli basinga batyo Abamidiani, baba batakibatinisa. Omu milembe ya Gideoni ensi echulera emyaka 40.

²⁹ Yerubaali eya Yoashi agenda atura omwe.

³⁰ Gideoni ogu hakaba aina abana b'abojo 70, oruzarorwe nyabwe, aha rw'okuba hakaba aina abakazi bangi.

³¹ N'ensholekeye eyabaire eli Shekemu nayo emuzalira omwana w'omwojo, amuruka eibara amweta Abimeleki.

³² Gideoni eya Yoashi agwa omu bugurusi obugundu, nziiko omu nyanga ya Yoashi ishe omuli Ofura ey'Abaabiezeri.

Obushengi bwa Isiraeli

³³ Orwo Gideoni yafire ati, Abaisiraeli bashuba bafukamira Ababaali. Baaliberiti bamuhindura ruhanga wabo.

³⁴ Tibaijukire Mukama Ruhanga wabo ayabarokoire omu mikono y'ababisha babo aba buli rubaju.

³⁵ N'eka ya Yerubaali (niwe Gideoni) tibagigiliire kisha aha rw'ebirungi byona ebyo yabakoleire.