Abaramuzi 6 - Ebibulia 2001

Abamidiani nibabonesa Isiraeli enaku

¹ Abaisiraeli bakagokera Omukama; aho yabanaga omu mikono y'Abamidiani emyaka mushanju.

² Abamidiani bakiza Abaisiraeli amani. Aha rw'Abamidiani, Abaisiraeli balima ebinyanga omu mabanga, bakora n'empako n'eboma kweshelekamu.

³ Aha rw'enshonga omu Baisiraeli orwo kyabaga kirumo ky'okulima, nirwo Abamidiani n'Abaamaleki n'amahanga g'oburugaizoba babatabaliraga.

⁴ Basisira kubarashanisa mara basilikya n'emyaka, kulemwa kwija bwatana Gaza, obuzira kusigira Isiraeli ekyakulya, entaama anga ente n'endogobe.

⁵ Baijaga bangi nk'enzige, n'ebitunganwa byabo n'amahema gabo. Bonene n'engamia zabo tibakushoboire kubarwa, kityo kumara kutaha omu nsi bagihindura mparamata.

⁶ Abamidiani batera muno Isiraeli ahansi; aho Abaisiraeli batakira Omukama k'abajuna.

⁷ Orwo Abaisiraeli batakiire Omukama nibazira Abamidiani,

⁸ Omukama yabatwekera omurangi, abagambira ati, “Omukama Ruhanga wa Isiraeli nagamba ati, ‘Nkabaihya Misiri omu bwiru.

⁹ Nkabaihya omu mikono y'Abamisiri na bona ababaire nibabaita kubi, nababinga orwo mulikutaha omu nsi yabo nagibaha.’

¹⁰ Nkabagambira nti, ‘N'inye Omukama Ruhanga wanyu; mutaliha kitinwa baruhanga b'Abaamori abo mulikutura omu nsi yabo.’ Kyonkai ebyo nabagambire timwabihuliire.”

¹¹ Omumalaika w'Omukama aija ashuntama aha mwaloni gwa Yoashi Omwabiezeri ahali Ofura, orw'omutabani Gideoni yabaire natera engano omw'ijungiro ly'edivai, kugisheleka Abamidiani.

¹² Amubonekera amugambira ati, “Omukama aina iwe, iwe manzi y'omushaija w'amani.”

¹³ Gideoni amugambira ati, “Rugaba, k'Omukama araba aina ichwe, ahonu kubaki ebi byona bitugwireho? Isi ebitangazobye ebyo batataichwe batubaruliraga bati, ‘Omukama akatwihya Misiri!’ Kyonkai mbwenu Omukama atuhoiremu yatunaga omu mikono y'Abamidiani.”

¹⁴ Omukama ahinduka amugambira ati, “Ogende n'amani gawe aga, oihure Isiraeli omu mikono y'Abamidiani; alikukutuma n'inye.”

¹⁵ Gideoni amubaza ati, “Waitu Mukama, nakurokora ntai Isiraeli? Leba oruganda rwange rujege muno omuli Manase, kandi nanye ndi muke muno omu ka ya tata.”

¹⁶ Omukama amugambira ati, “Kyonkai ndakwemamu oite Abamidiani oti noita omuntu omoi.”

¹⁷ Gideoni amugambira ati, “Mbwenu onsingire onyoleke akabonero okwo niwe olikufumora nanye.

¹⁸ Otaruga hanu olikasinga, kuhika orwo ndakuletera egabo yange nkagikuteka omu maisho.” Omukama agamba ati, “Ndaikaraho kuhika orw'oragaruka.”

¹⁹ Aho Gideoni ataha omwe, aita omwana gw'embuzi, ataho n'obukeki butatumbisiibwe obw'ekilo ikumi z'ensano. Enyama agiteka omu kiibo, kandi omukubi aguteka omu nyungu, abimuletera aha mwaloni abimubonekya.

²⁰ Omumalaika wa Ruhanga amugambira ati, “Okwate enyama n'obukeki butatumbisiibwe obiteke aha rwazi obishesheho omukubi.” Gideoni akora atyo.

²¹ Aho omumalaika w'Omukama araisiliza akora aha nyama n'aha bukeki butatumbisiibwe akozaho enshonga y'enkoni eyo yabaire akwete. Omuliro gufumuka omu rwazi gwokya bwokya enyama n'obukeki butaina itumbyo; kandi amubura aha maisho.

²² Aho Gideoni amanya okwo yabaire ali mumalaika w'Omukama. Agamba ati, “Waitu Mukama Ruhanga! Mbwenu nabonangana n'omumalaika wawe.”

²³ Kyonkai Omukama amugambira ati, “Ogire emilembe, otatina, tofe.”

²⁴ Aho Gideoni ayombekeraho Omukama alutare, agyeta “Omukama milembe.” Kugoba kir'eki ekyayemeleire Ofura ey'Abaabiezeri.

Gideoni nakambura alutare ya Baali

²⁵ Omu kiro omwo, Omukama agambira Gideoni ati, “Okwate enumi ya sho, enumi eya kabili ebe eina emyaka mushanju, okambure elutare eyo sho yayombekeire Baali, oshube oteme Ashera egili aha rubaju.

²⁶ Oyombekere Omukama Ruhanga wawe elutare eiguru y'eboma hanu aha, amabare gagyeho kurungige. Aho okwate enumi eya kabili ogihonge ekihongo ky'okwokibwa, okyokese Ashera ez'oratema.”

²⁷ Kityo Gideoni akwata abairube 10, akora nk'okwo Omukama yabaire amugambiire. Kyonkai aha rw'okutina abanyarugandabe n'abanyakigo kukikora bwamushana, akakikora ekiro.

²⁸ Orwo abanyakigo baimukire omu rubungubungu, leba elutare ya Baali ekambwirwe na Ashera aha rubaju rwayo etemirwe, n'enumi ya kabili ehongirwe aha elutare eyabaire eyombekirwe.

²⁹ Babazangana bati, “Ayakora ati n'ohai?” Kababaire bahigahigire, babalize, bagamba bati, “Gideoni mutabani wa Yoashi niwe yakora atyo.”

³⁰ Aho abanyakigo bagambira Yoashi bati, “Oshohoze mutabani wawe afe, enshonga yakambura elutare ya Baali, na Ashera eyaba eli aha rubaju yagitema.”

³¹ Kyonkai Yoashi abaza ababaire bamuzinzire ati, “Nimurwanilira Baali? Anga nimwenda kumurabira? Wena wena aramurwanilira bamwite bwankya obu. K'araba ali ruhanga ayerwanilire orwo bakambura elutareye.”

³² Aha rw'ekyo kir'ekyo Gideoni bamweta Yerubaali, nikwo kugir'oti, “Baali amurwanise,” enshonga akakambura elutareye.

Gideoni nayeta Isiraeli kurashana

³³ Abamidiani bona n'Abaamaleki n'abantu b'oburugaizoba bahikana bashabuka Yorudani basisira omu Ruhanga rwa Yezireeli.

³⁴ Kyonkai Mwoyo wa Mukama atungamira Gideoni; Gideoni atera enzamba Abaabiezeri kuturuka kumuhondera.

³⁵ Atuma entumwa omuli Manase yona kubeta kumuhondera. Atuma entumwa ezindi Asheri, Zabuloni na Nafutali; batemba kubabuganganwa.

Akabonero k'oruhu rw'entaama

³⁶ Gideoni agambira Ruhanga ati, “K'oraba orarokoza Isiraeli amani gange nk'okwo ogambire,

³⁷ leba, nayara oruhu rw'entaama aha rwano. K'oruhu rushai ruragira orume, ensi yona ekoma, aho ndamanya okwo orarokoza Isiraeli amani gange nk'okw'ogambire.”

³⁸ Mara nikwo byhakabaire. Orwo Gideoni yaimukire omu rubungubungu, oruhu akarukamuramu orume rungi orw'okwijuza epakuli.

³⁹ Aho agambira Ruhanga ati, “Otangilira kiniga. Kangambe eli limoi lyonkai; ninshaba ndengese oruhu rw'entaama eli limoi lyonkai; ninshaba oruhu rushai rwome, kandi ensi yona egire orume.”

⁴⁰ Ruhanga aba nikwo akora atyo omu kiro omwo, enshonga oruhu rushai nirwo rwasigaire rwomire, kandi ensi yona yagira orume.